यस्तो रह्यो यो साताको शेयरबजार

A+ A A-

यो साताको सुरुवातमै हौसिएको शेयरबजारले सोही रूपमा साताभरि हौसिन भने पाएन । आइतबार तेहेरो अंकको उछालसँगै उत्साहित बनेका लगानीकर्ता त्यसपछिका दिनहरूमा भने उसैगरी रमाउन पाएनन् ।

किनभने, आइतबार १ सय १ अंकले नेप्से बढेर २ हजार ६ सय ६७ अंकमा पुगेको नेप्से अन्तिम कारोबार दिन भने २ हजार ६ सय ३१ अंकमा ओर्लिन पुग्यो । साताका चार दिन शेयर कारोबार हुँदा आइतबार र सोमबार बजारमा हरियाली छायो । तर, मंगलबार र बुधबार भने शेयरबजार राताम्मे हुन पुग्यो । यसर्थ आइतबारको तुलनामा बुधबार शेयरबजार परिसूचक (नेप्से) ३६.७२ अंकले घटेको देखिन्छ । यस्तै, यो साताभरि कुल ११ अर्ब ३४ करोड ७५ लाख ४५ हजार रुपैयाँबराबरको २२ करोड ८६ लाखभन्दा बढी कित्ता शेयर खरिदबिक्री भएको छ ।

आइतबार

साताको कारोबारको पहिलो दिन आइतबार १०१.०७ अंकले बढेको शेयरबजारले २ हजार ६६७.९७ बिन्दु कायम गरेको थियो । यस दिन बजार बढ्दा कारोबार रकम पनि बढेको हो । आइतबार ४ अर्ब ७ करोड ७ लाख रुपैयाँबराबरको शेयर कारोबार हुँदा ९० लाख २२ हजार कित्ता शेयर कारोबार हुन पुग्यो ।

आइतबार १०० भन्दा बढी अंकले बजार बढ्दा पाँचवटा कम्पनीको शेयरमूल्यमा सकारात्मक सर्किट लागेको छ । एसियन लाइफ इन्स्योरेन्स, ज्योति लाइफ इन्स्योरेन्स, सानिमा लाइफ इन्स्योरेन्स, इमर्जिङ नेपाल र कर्पोरेट डेभलपमेन्ट बैंकको शेयरमूल्य १० प्रतिशतले वृद्धि भएको हो । यस दिन सर्वाधिक शेयर खरिदबिक्री भने शिवम् सिमेन्ट कम्पनीको भएको छ ।

सोमबार

त्यस्तै, साताको कारोबारको दोस्रो दिन सोेमबार प्राविधिक समस्याका कारण बजार खुलेको २ घण्टामै बन्द हुन पुग्यो । जसले गर्दा नेप्सेमा ०.१५ अंकको मात्रै वृद्धि भयो । प्राविधिक समस्या देखाउँदै कारोबार बन्द गरेको नेप्सेले २ घण्टामा १ अर्ब ३४ करोड रुपैयाँको शेयर कारोबार भएको जनाएको छ । थोरै समय मात्रै कारोबार खुले पनि सो दिनको बजारमा लगानीकर्ताको सहभागिता भने उल्लेख्य देखिन्थ्यो । यद्यपि पूर्ण रूपमा कारोबार हुन नपाउँदा सहभागी कम्पनीका लगानीकर्ताले त्यति कमाउन सकेनन् ।

सो दिन सबैभन्दा बढी राष्ट्र उत्थान लघुवित्तको शेयरमूल्य ६ प्रतिशतभन्दा बढीले वृद्धि भएर प्रतिकित्ता ५ सय ३२ रुपैयाँ कायम भएको छ । सर्वाधिक शेयर कारोबार भने नेपाल लाइफ इन्स्योरेन्सको भएको हो ।

मंगलबार

कारोबारको पहिलो र दोस्रो दिन लगातार बढेको शेयरबजार तेस्रो दिन भने दोहोरो अंकले घट्न पुग्यो । मंगलबार १७.१५ अंकले घट्दै शेयरबजार २ हजार ६५०.९७ मा झरेको हो । बजार घटे पनि अघिल्लो कारोबारका दिनको तुलनामा यस दिन कारोबार रकम बढ्न गयो । ३ अर्ब ३६ करोड ४२ लाख रुपैयाँबराबरको शेयर कारोबार हुँदा ६५ लाख २९ हजार कित्ता शेयर खरिदबिक्री भएको छ ।

यस दिन इमर्जिङ नेपालको शेयरमूल्यमा सकारात्मक सर्किट लागेको छ । साथै, सर्वाधिक शेयर खरिदबिक्री नेपाल दूरसञ्चार कम्पनीको भएको छ ।

बुधबार

बुधबार पनि घट्यो शेयरबजार । बुधबार १९.७२ अंकले घटेको शेयरबजार २ हजार ६३१.२५ बिन्दुमा झरेको छ । बजार घटेसँगै यस दिन कारोबार रकम पनि ओरालो लागेको छ । यस दिन २ अर्ब ५७ करोड ४ लाख रुपैयाँबराबरको ४९ लाख ६७ हजार कित्ता शेयर खरिदबिक्री भएको हो । बजार घट्दा इमर्जिङ नेपालको शेयरमूल्यमा भने सकारात्मक सर्किट लाग्यो ।

यस दिन पनि नेपाल दूरसञ्चार कम्पनीको शेयर खरिदबिक्री सर्वाधिक भएको छ ।

बिहीबार

बिहीबार फागुपूर्णिमा परेकाले बजार बन्द रहन पुग्यो ।

शेयरमूल्यमा पोजिटिभ सर्किट लगाउनेमा इमर्जिङ नेपाल अगाडि

यो साता धितोपत्रको दोस्रो बजारमा इमर्जिङ नेपालका लगानीकर्ताले सर्वाधिक नाफा कमाउन पुगे । यो कम्पनीको यो साता चार दिनको कारोबारमा तीन दिन लगातार शेयरमूल्यमा सर्किट लाग्न पुग्यो । आइतबार प्रतिकित्ता २७ रुपैयाँले बढेको शेयरमूल्य सोमबार ७ रुपैयाँले बढेको छ । यस्तै, मंगलबार भने शेयरमूल्यमा करेक्सन देखिँदा एकैपटक कित्तामा ६९ रुपैयाँले घटन् पुग्यो । बुधबार भने ४६ रुपैयाँले शेयरमूल्य बढ्न पुग्यो ।

समग्रमा यो साता बजार

समग्रमा यो साताको शेयरबजार उतारचढावपूर्ण नै रहन पुग्यो भने लगानीकर्ता अन्योलमा देखिए । कारोबारमा आएको चार दिनमा दुई दिन ह्वात्तै बढेको बजार दुई दिन भने घट्न पुग्यो । थोरै करेक्सन देखिएको बजारमा सर्टटर्म प्रोफिट लिने लगानीकर्ता हाबी देखिन पुगे ।

तरलता अभाव, ब्याजदर वृद्धिलगायतका कुराहरूले प्रभाव पारेको बजारमा लगानीकर्ता बजारप्रतिको विश्वास बलियो हुन नसक्दा पनि बजारले स्थिरता पाउन नसकेको देखिन्छ । यद्यपि शेयरबजार विश्लेषकहरू भने यस्ता प्रभाव छोटो समयका लागि देखिए पनि दीर्घकालीन रूपमा बजार अझै माथि जाने बताउँदै आएका छन् ।

प्रकाशित मिति: शुक्रबार, चैत ४, २०७८ १६:५०