नेपालगञ्जमा सत्ता गठबन्धन एकठाउँ उभिन मुस्किल, यी हुन् मेयरका आकांक्षी

A+ A A-

नेपालगञ्ज उपमहानगरपालिकाको निर्वाचनमा २५ वर्षपछि नेकपा एमाले उसैगरी मुख्य प्रतिस्पर्धामा आउने संकेत देखिएको छ । जसरी ०५४ को स्थानीय निर्वाचनमा सेभ द नेसनका धवलशमशेर राणालाई पार्टीमा भित्र्याएर एमालेले मेयरको उम्मेदवार बनाएको थियो । फरक यत्ति छ, अहिले कांग्रेस, तमलोपा हुँदै हृदयेश त्रिपाठी समूहमा पुगेका पशुपति दयाल मिश्रलाई पार्टी प्रवेश गराएर चुनावी शक्तिआर्जन गरेको छ ।

स्थानीय निर्वाचनको मिति नजिकिँदै गर्दा अरू पार्टीमा आकांक्षीको भिड छ । तर, मिश्र भने एमालेबाट उम्मेदवार हुनेमा ढुक्कजस्तै देखिन्छन् । एमाले स्रोतका अनुसार, पार्टी प्रवेश हुँदै नेतृत्वले उनलाई नेपालगञ्ज उपमहानगरको मेयर बनाउने आश्वासन दिइसकेको छ । ‘पार्टीमा प्रवेश गर्नुअघि नै मैले आफ्नो आकांक्षा नेतृत्वलाई भनेको छु’ मिश्रले शिलापत्रसँग भने, ‘अब पार्टीले जे निर्णय गर्छ मान्न तयार छु ।’

अध्यक्ष केपी ओलीले १ मंसिरमा नेपालगञ्ज पुगेरै मिश्र र उनका सयौँ समर्थकलाई एकसाथ एमालेमा भित्र्याएका थिए । लगत्तै भएको दशौं महाधिवेशनबाट मिश्र एमालेको केन्द्रीय सदस्यसमेत निर्वाचित भइसकेका छन् । त्यसो त, उनी ०७४ देखि नै एमालेनिकट छन् । त्यतिबेला त्रिपाठी समूहबाट बाँके २ बाट उनी सूर्य चुनाव चिह्न लिएर प्रतिनिधिसभा सदस्य उम्मेदवार थिए ।

गत स्थानीय निर्वाचनमा एमालेबाट सम्शुद्धिन सिद्धिकी मेयरका उम्मेदवार थिए । उनी ०५४ मा धवलशमशेर राणा मेयर हुँदा उपमेयर थिए । एमाले विभाजनपछि सिद्धिकी नेकपा एकीकृत समाजवादीतर्फ लागेका छन् । नेपालगञ्जमा एकीकृत समाजवादीको उल्लेख्य प्रभाव देखिँदैन । त्यसैले संगठनात्मक मत नघटेको र आफूहरूसमेत जोडिँदा एमाले बलियो रहेको मिश्रको दाबी छ । ‘एक्ला एक्लै त अब हामीलाई कसैले हराउन सक्दैन । गठबन्धन एक भएर आए केही मिहिनेत गर्नुपर्ने हुन्छ’, उनले भने, ‘सत्तारुढ गठबन्धनलाई हराउन हामीले पनि साना दलसँग तालमेल गर्नुपर्ने हुन सक्छ । तर, अहिलेसम्म एक्लाएक्लै लड्ने स्थिति छ ।’

०५४ मा एमालेबाट मेयर निर्वाचित राणा ०६२/०६३ को जनआन्दोलनपछि गणतन्त्र नस्वीकार्ने भन्दै राप्रपामा प्रवेश गरे । ०६४ र ०७० को संविधानसभा निर्वाचनमा राप्रपाबाट उठेर पराजित उनी ०७४ को स्थानीय तह निर्वाचनमा भने उपमहानगरपालिका मेयर विजयी भए । हाल राप्रपाको महामन्त्रीसमेत रहेका राणाले मेयर नतेहेर्‍याउने घोषणा गरिसकेका छन् । नेपालगञ्जमा राप्रपाले संगठनात्मक बलले भन्दा मेयर राणाको व्यक्तित्वले जितेको विश्वास गरिन्छ । त्यसैले राणाबाहेक राप्रपा उम्मेदवारको खासै चर्चा सुनिएको छैन ।

कांग्रेसबाट उपमेयर उमा थापामगर, डा सुरेशकुमार कनौडिया र प्रशान्त विष्टकाे मेयरमा मुख्य दाबेदारी छ । उपमेयरका रूपमा आफू सफल रहेकाले मेयरमा दाबी गर्नु स्वाभाविक रहेको बताउँछिन्, थापामगर । ‘मैले क्षमताले भ्याएसम्म काम गरेँ । विकास निर्माण, जनसेवा र कोभिड महामारीका बेला गरेको कामबाट म सन्तुष्ट छु’, उनले भनिन्, ‘नेपालगञ्जमा कांग्रेस बलियो छ । शहर विकास गर्न मेरा केही सपना छन्, ती पूरा गर्न पनि म मेयर बन्नुपर्छ ।’ उनले पार्टीका शीर्ष तहका नेतासँग पनि आफूले मेयरको टिकटका लागि आग्रह गरेको बताइन् ।

अर्का आकांक्षी डा कनौडिया ०७४ को निर्वाचनमा पनि उम्मेदवार थिए । राप्रपा नेपालबाट धवलशमशेर राणाले चुनाव जित्दा उनी निकटतम प्रतिद्वन्द्वी थिए । चुनावमा पराजित भएपछि उनी सक्रिय राजनीतिमा खासै देखिएनन् । नेपालगञ्ज मेडिकल कलेजको व्यवस्थापनमै व्यस्त भए । चुनावको घोषणापछि मेयरको दाबी गर्नु स्वाभाविक नभएको कांग्रेसका प्रतिस्पर्धी आकांक्षीहरूको गुनासो छ । तर, चुनाव खर्चिलो हुने भएकाले पैसा खर्च गर्नसक्ने उम्मेदवारको रूपमा उनलाई पार्टीको एउटा पङ्क्तिले अघि सार्न खोजेको छ ।

कांग्रेसका अर्का आकांक्षी हुन्, नगर सभापति प्रशान्त विष्ट । चार महिनाअघि भएको नगर अधिवेशनमा उपमेयर थापामगरलाई फराकिलो मतान्तरले हराउँदै उनी तेस्रो पटक सभापतिमा निर्वाचित भएका थिए । सोही निर्वाचनले कांग्रेस कार्यकर्ताको चाहना पुष्टि गरेको दाबी गर्छन् । ‘तीन पटक नगर सभापति भइसकेँ । युवाले मेयर पाउनुपर्छ भन्ने कार्यकर्ताको माग सम्बोधन गर्न पनि मैले टिकट पाउनुपर्छ’, उनले भने ।

मधेसकेन्द्रित राजनीतिक पृष्ठभूमिबाट आएका र व्यक्तिगत लोकप्रियतासमेत रहेका नेता पशुपति दयाल मिश्र एमाले प्रवेश गरेकाले यसपटक नेपालगञ्ज उपमहानगरमा मुख्य प्रतिस्पर्धा कांग्रेस–एमालेबीच हुने बिष्टको आकलन छ । तर, जसपाको बलियो उपस्थितिले निर्वाचनमा त्रिपक्षीय प्रतिस्पर्धा हुने धेरैको अनुमान छ ।

नेपालगञ्ज उपमहानगरपालिका समेटिएको बाँके २ बाट ०७४ को निर्वाचनमा प्रतिनिधिसभा सदस्यमा जनता समाजवादी पार्टी (जसपा)का ईस्तियाक राईले जितेका छन् । त्यसैले सो पार्टीले नेपालगञ्जलाई आफ्नो प्रभाव क्षेत्र दाबी गर्दै आएको छ । जसपा नेता कमरुद्धिन राईको मेयरमा बलियो दाबेदारी छ ।

माओवादी केन्द्रबाट नेपालगञ्ज उद्योग वाणिज्य संघका पूर्वअध्यक्षसमेत रहेका नन्दलाल वैश्यले मेयरको टिकटका लागि लबिङ गरिरहेका छन् । त्यस्तै, अर्का व्यवसायी आदेश अग्रवाल पनि माओवादी केन्द्रबाट मेयरको उम्मेदवार बन्ने दौडमा छन् । ‘नेपालगञ्जमा माओवादी केन्द्रको स्थिति पनि कमजोर छैन । मैले दाबी गरेको छु, पार्टीले मूल्यांकन गरेरै निर्णय गर्ला’, अग्रवालले भने ।

कांग्रेस, जसपा र माओवादी केन्द्रका नेताहरूको कडा दाबेदारीबीच सत्तारुढ दलहरूबीच नेपालगञ्ज उपमहानगरमा गठबन्धन हुने सम्भावना भने कम हुँदै गएको छ । संगठनात्मक पकड हेर्दा कम्तीमा कांग्रेस र जसपाले दाबेदारी छाड्ने स्थिति देखिँदैन । ‘हाम्रो बलियो स्थिति छ । कांग्रेसले पनि तालमेलका नाममा पक्कै मेयर नछाड्ला । त्यसैले नेपालगञ्जमा पार्टीहरूबीच गठबन्धन गरेर चुनावमा जाने स्थिति म देख्दिनँ’, जसपाका आकांक्षी राईले भने ।

त्यसो त, महानगर र उपमहानगरपालिकामा सत्तारुढ दलहरूबीच केन्द्रीय तहबाट तालमेलको निर्णय हुने सम्भावना पनि छ । केन्द्रले तालमेलको निर्णय गरे के हुन्छ ? जसपा नेता राई भन्छन्, ‘स्थानीय सहमतिबिना केन्द्रले लाद्न खोज्यो भने हामी अस्वीकार गर्छौं । संघीयतामा स्थानीय सरकार केन्द्रको गुलाम होइन ।’

प्रकाशित मिति: बिहीबार, चैत ३, २०७८ १२:२३