विभाजनको सँघारमा एनआरएनए, पन्त र लामा समूह छुट्टाछुट्टै महाधिवेशनको तयारीमा

विभाजनको सँघारमा एनआरएनए, पन्त र लामा समूह छुट्टाछुट्टै महाधिवेशनको तयारीमा

A+ A A-

विश्वका विभिन्न देशमा रहेका गैरआवासीय नेपालीहरूको साझा संस्था गैरआवासीय नेपाली संघ (एनआरएनए) विभाजनको सँघारमा पुगेको छ । दुई पक्षबीचको टकरावका कारण संस्था विभाजनको सँघारमा पुगेको हो ।

नेपालको प्रगतिमा सघाउनुका साथै प्रवासी नेपालीहरूको हकहित, अधिकार र नयाँ पुस्तालाई नेपालसँग जोडिराख्ने उद्देश्यका साथ २० वर्षअघि एनआरएनएको स्थापना भएको थियो ।

एनआरएनएको १०औँ महाधिवेशनका लागि प्रतिनिधि चयनलगायतका विषयमा उत्पन्न विवाद आन्तरिक रूपमा समाधान हुन नसकेपछि परराष्ट्र मन्त्रालय र अदालतसम्म पुगेको छ ।

एनआरएनएका वर्तमान अध्यक्ष कुमार पन्त पक्षधर समूह र उपाध्यक्ष सोनाम लामा पक्षधर समूहले अलग-अलग रूपमा महाधिवेशनको मिति तय गरी निर्वाचनको प्रक्रियासमेत थालनी गरिसकेका कारण संस्था अब एक ढिक्का हुन सक्ने सम्भावना कम रहेको देखिएको छ । यद्यपि संघका केही पदाधिकारी र संरक्षकहरूले सहमतिका लागि प्रयास गरिरहेका पनि बुझिएको छ ।

संघको महाधिवेशन तथा विश्व सम्मेलनको तयारीका लागि पन्त समूहले नयाँ नेतृत्व चयनका लागि निर्वाचनका अधिकांश प्रक्रिया सम्पन्न गरिरहेको जनाएको छ । सो समूहले यही १० र ११ चैतमा मतदान गर्ने तयारी निर्वाचन समितिले गरेको संघका प्रवक्ता डीबी क्षत्रीले जानकारी दिए ।

यस्तै, महाधिवेशन आयोजक समितिका संयोजक तथा संघका उपाध्यक्ष लामा समूहले यही ८ चैतदेखि ११ सम्मका लागि एनआरएनएको १०औँ महाधिवेशनको मिति तय गरेको जनाएको छ । महाधिवेशन तथा अन्तर्राष्ट्रिय सम्मेलनको तयारी अन्तिम अवस्थामा पुगेको लामाले बताए । उनका अनुसार महाधिवेशन भव्य र सभ्य रूपमा सम्पन्न गर्न विभिन्न समिति पनि गठन गरिएको तथा महाधिवेशनका लागि प्रतिनिधि नेपाल आउने क्रम जारी छ ।

संघको विधानअनुसार गत २३–२५ अक्टोबरमा अधिवेशनको तयारी गरिए पनि प्रतिनिधि छनोटको प्रक्रियागत विवादका कारण अधिवेशन स्थगित भएको थियो । त्यसपछि गत १५ डिसेम्बरमा पुनः अर्को निर्वाचनको मिति तय गरिएको थियो ।

संघको कार्यसमितिले विवाद सुल्झाउनुको सट्टा गत २ मार्चमा आकस्मिक बैठक बसी उच्चस्तरीय समिति र संरक्षक परिषद् खारेज गर्ने निर्णय गरेपछि विवाद झनै चुलिएको थियो ।

प्रकाशित मिति: बुधबार, चैत २, २०७८ १४:२३