शिक्षक महासंघसँग भएको सहमति संघीयताविरोधी छैनः शिक्षामन्त्री पौडेल

A+ A A-

शिक्षा, विज्ञान तथा प्रविधिमन्त्री देवेन्द्र पौडेलले शिक्षक महासंघसँग गरिएको ५५ बुँदे सहमति संघीयताविरोधी नभएको दाबी गरेका छन् ।

मंगलबार काठमाडौंमा आयोजित एक कार्यक्रममा पौडेलले शिक्षक महासंघका मागहरू अघि बढाउने क्रममा संघीय प्रणालीलाई हस्तक्षेप हुनेगरी कुनै पनि प्रकारको सहमति नगरेको बताए ।

'शिक्षक महासंघका कतिपय मागहरूलाई अघि बढाउँदा संघीय प्रणालीलाई तलमाथि हुने गरेर कानुन उल्लंघन गर्ने कुनै पनि प्रकारको सम्झौता, सहमति हामीले गरेका छैनौँ,’ पौडेलले भने ।

शैक्षिक क्षेत्रको सुधारका लागि स्थानीय तहको अधिकार संघले नलिने गरी कानुनी प्रावधानहरूको व्यवस्था गर्न लागेको पौडेलको भनाइ छ । ‘कुनै पनि प्रकारको स्थानीय तहको अधिकार संघले लिन चाहँदैन । संघमा रहेको अन्य थप अधिकार पनि स्थानीय तह र प्रदेशलाई दिने गरेर कानुनी प्रावधानको हामीले व्यवस्था गर्दैछौँ,' उनले भने ।

केही सञ्चारमाध्यमहरूले स्थानीय तहलाई दिएको अधिकार संघले फेरि फिर्ता लिन खोजेको भन्ने कुराप्रति लक्षित गर्दै संविधान, कानूनले स्थानीय तहलाई दिएको संघीयतासँगको कुनै पनि अधिकार संघ वा शिक्षा मन्त्रालयले नलिने बताए ।

आगामी वर्षबाट प्रदेशमा परीक्षा बोर्ड स्थापना गरी एसईईको परीक्षा लिने प्रक्रिया अघि बढाइएको पौडेलले जानकारी दिए । 'अर्को सालदेखि नै परीक्षा बोर्ड पनि प्रदेशमा स्थापित गरेर प्रदेशबाट नै एसईईको परीक्षा लिने गरी प्रक्रिया अघि बढाइसकेका छौँ,' उनले भने ।

केही वर्षयता सार्वजनिक विद्यालयहरूको शैक्षिक गुणस्तर कमजोर रहेको म्यासेज आइरहेको भन्दै सरकार सार्वजनिक विद्यालयलाई गुणस्तरयुक्त बनाउनेतर्फ अग्रसर भएको पौडेलले बताए । शिक्षकहरूले मेहनत नगरेसम्म विद्यालयहरू सुध्रिन नसक्ने उनको भनाइ थियो ।

शिक्षकको दरबन्दी, आन्तरिक व्यवस्थापन र १८ हजार शिक्षकको दरबन्दी पूरा गर्न प्रक्रिया अघि बढीसकेको पौडेलको भनाइ थियो ।

प्रकाशित मिति: मंगलबार, चैत १, २०७८ १८:४७