बीपीजस्तै 'राजनेता'को खोजी गर्दै ‘राजद्रोही राजनेता’

A+ A A-

देशमा अहिले बीपीजस्तै 'राजनेता'को आवश्यक भएको राजनीतिक एवं कला मनोरञ्जन क्षेत्रमा सक्रिय व्यक्तित्वले बताएका छन् ।

सुशील कोइराला मेमोरियल फाउन्डेसन र अन्वेषण न्युज डटकमले अलथ्री मिडियाको सहकार्यमा निर्माण गरेको बीपीको जीवनको वि.सं. २०३१ देखि २०३६ सम्मका घटना समेटिएको वृत्तचित्र ‘राजद्रोही राजनेता’ हेरेपछि विवेकशील साझा पार्टीका संयोजक रवीन्द्र मिश्रले अहिले देशले बीपीजस्तै सबैभन्दा माथि देशलाई राख्ने राजनेता खोजेको बताए ।

'स्वार्थभन्दा देशलाई शिरमा राख्ने, आफ्ना दुःखका आधारमा धारणा नबनाउने राजनेता देशले खोजेको छ, अहिलेका नेताले आफूलाई केन्द्रमा राखेर धारणा बनाउँदा समस्या आएको छ, दुई तिहाइका प्रधानमन्त्री बीपीले आठ वटा मृत्युदण्डका मुद्दा खेपेर आठ वर्षभन्दा लामो समय जेल जीवन बिताए पनि देशकै लागि आफूलाई दुःख दिने राजासँग सयकार्यकै कुरा गर्नुभयो, आफू केन्द्रित राजनीति गर्नुभएन,' मिश्रले भने ।

नायक शिव श्रेष्ठले राजनेता बीपी कोइरालाको जीवनको अंशमा बनेको वृत्तचित्रले लुकेर रहेको ऐतिहासिक विषय खुलेको बताए । देशका लागि कसले के गरे भन्ने पहिचान वृत्तचित्रले गराएको विषय वृत्तचित्रमा देखिएको उनले सुनाए ।

मनोविद् करुणा कुँवरले वृत्तचित्रले ऐतिहासिक विषयमा धेरै ज्ञान दिएको बताए । यस्तो वृत्तचित्र अरु पनि बन्नुपर्ने उनको भनाइ थियो ।

नेकपा (एमाले)का नेता गुरु बरालले इतिहासलाई वृत्तचित्रले दस्तावेजीकरण गरेको बताए । नयाँ पुस्तालाई नेपाली प्रजातान्त्रिक आन्दोलनका विषयमा, मित्रराष्ट्रले चासो राख्ने विषय, असंलग्न परराष्ट्र नीतिलगायत विषयमा जानकारी दिएको उनको भनाइ थियो ।

राजासँग जनताको दूरी बढ्नु नै राजतन्त्रका लागि खतरनाक छ भन्ने सन्देश त्यसबेला बीपीले राजालाई दिएको विषयलाई वृत्तचित्रले उजागर गरेको बरालले सुनाए ।

राजनीतिक इतिहासका विषय समेटिएका एक दर्जन वृत्तचित्र निर्माणको तयारीमा फाउन्डेसन लागेको सदस्य सचिव अतुल कोइरालाले बताए । वृत्तचित्रमार्फत हराउन लागेका इतिहासको अन्वेषण गर्ने लक्ष्य लिइएको छ । यसका लागि अन्वेषण यात्रा पनि जारी रहने वृत्तचित्रको लेखन र निर्देशन गरेका पत्रकार जगत नेपालले सुनाए ।

प्रकाशित मिति: सोमबार, फागुन ३०, २०७८ १९:४३