ट्याक्सी व्यवसायीले संस्थागत रूपमै स्वीकारे राइड सेयर, नीतिगत अन्याेल कायमै

ट्याक्सी व्यवसायीले संस्थागत रूपमै स्वीकारे राइड सेयर, नीतिगत अन्याेल कायमै

A+ A A-

१० चैत २०७७ मा नयाँ बसपार्कका ट्याक्सी चालकले पठाओ राइडरलाई निर्घात कुटे । सस्तोमा यात्रु चढाएको भन्दै ट्याक्सी व्यवसायीहरू आक्रोशित बनेका थिए । टुटलले नेपालमा राइड सेयर सुरु गरेदेखि नै ट्याक्सी व्यवसायीहरूले यसको चर्को विरोध गरिरहेका थिए ।

गैर कानुनी तरिकाले रातो नम्बर प्लेटका मोटरसाइकलले यात्रु बोकेको भन्दै यसलाई रोक्न नेपाल राष्ट्रिय मिटर ट्याक्सी व्यवसायी तथा चालक सेवा समाजका नेताहरू यातायात व्यवस्था विभागदेखि मन्त्रालयसम्म धाए । तिनै नेताहरूले अहिले नयाँ खुलेको राइड सेयर कम्पनी ‘जायर’ को समर्थन् मात्रै होइन फेसबुकमा प्रचार गरिरहेका छन् ।

व्यक्तिगत रूपमा मात्र नभई समाजले संस्थागत रूपमै ‘जायर’प्रयोग गर्न आह्वान गरेको छ । गत फागुन २४ मा होटल मेरिएटमा भएको जायरको उद्घाटन कार्यक्रममा समाजका अध्यक्ष पूर्णलाल मोक्तान, वरिष्ठ उपाध्यक्ष राजकुमार श्रेष्ठ, सचिव दिलिप श्रेष्ठ, महासचिव टोप खत्री लगायत उपस्थित थिए ।

जायरले व्यवसायीलाई सेवा सुविधा दिने भएकोले यो एपमा आवद्ध हुन संस्थागत आह्वान गरिएको समाजका सचिव दिलिप श्रेष्ठले बताए । कम्पनीले चालकहरूको वीमा, नाफाको पाँच प्रतिशत दिने र भवितब्य परेकाे समयका लागि भलाई कोष बनाइदिने भएकाले यो एपसगँ आवद्ध हुन लागेको उनले बताए ।

‘हामी पहिले पनि प्रविधिको विरोधी होइनाैँ । ऐन कानुन बनाउनुपर्छ भन्ने मात्र हो । चार वर्षसम्म पनि नीति नियम नबनेपछि हामी बाध्य भएर प्रविधिमा आवद्ध हुनुपर्‍याे,’ उनले भने, ‘नीति नियम छैन भनेर कति दिन टुलुटुलु हेरेर बस्ने ? एक न एक दिन प्रविधlमा जानैपर्छ । त्यही भएर हामी जायरमा आवद्ध हुन लागेका हौं ।’

नीतिगत अन्याेलता कायमै

राइड सेयरको विषयमा नीतिगत अन्याेलता भने कायमै छ । यो विषयमा हाल केही प्रगति नभएको यातायात व्यवस्था विभागका प्रवक्ता डा लोकनाथ भुसालले जानकारी दिए ।

‘उनीहरूले हामीसगँ स्वीकृति लिनुपर्ने हो । तर, त्यसका लागि स्वीकृति लिने कानुुन बनाउनुपर्छ । संसद अवरोध भएका कारण काम अगाडि बढेको छैन,’ उनले भने । संसदबाट पास भएर ऐनमा उल्लेख नभई विभागले कार्यविधि बनाउन नमिल्ने उनले स्पष्ट पारे ।

प्रकाशित मिति: सोमबार, फागुन ३०, २०७८ १८:४२