विराटनगरको मेयरमा मन्त्रीदेखि केन्द्रीय नेतासम्म आकांक्षी, कांग्रेसले जोगाउला आफ्नो विरासत ?

विराटनगरको मेयरमा मन्त्रीदेखि केन्द्रीय नेतासम्म आकांक्षी, कांग्रेसले जोगाउला आफ्नो विरासत ?

A+ A A-

३० वैशाखमा हुने स्थानीय तहको चुनावको मिति नजिकिन थालेपछि मोरङमा चुनावी सरगमी बढ्न थालेको छ । प्रदेश १ को एक मात्र महानगरपालिका भएकाले पनि विराटनगरको मेयरमा ठूला पार्टीले कसलाई उम्मेदवार बनाउलान् र कसले जित्ला भन्ने बहस र चर्चा चोक-चौतारोदेखि चिया पसलसम्म हुन थालेको छ ।

विराटनगर महानगरपालिकाको मेयरका लागि मन्त्रीदेखि पार्टीका केन्द्रीय नेतासम्मले आकांक्षा देखाएका छन् । मेयरका लागि नेकपा एमालेबाट स्थायी कमिटी सदस्य गुरु बराल, प्रदेश १ का पूर्वमन्त्री जीवन घिमिरे, केन्द्रीय सदस्य रामलाल साह, एमाले मोरङका उपाध्यक्ष बाबुराम कार्की र विराटनगर महानगर कमिटी अध्यक्ष सागर थापाले आकांक्षा राखेका छन् ।

२०७४ सालको निर्वाचनमा एमालेका उम्मेदवार विनोद ढकाल कांग्रेसका भीम पराजुलीसँग पराजित भएका थिए । अघिल्लो पटक नै एमालेबाट मेयरमा दाबी गरेका विराटनगर महानगर कमिटी अध्यक्ष थापाले यस पटक आफूले टिकट पाउने दाबी गर्छन् । ‘यसपटक हामी चुनाव जित्छौँ,’ उनले भने, ‘पार्टीले अवश्य मूल्यांकन गर्छ भन्ने लाग्छ ।’

त्यस्तै कांग्रेसबाट मेयरका लागि आधा दर्जन आकांक्षी देखिएका छन् । कांग्रेस केन्द्रीय सदस्य समेत रहेका मेयर पराजुली, अमृत अर्याल, डिला संग्रौला, मोरङ उपसभापति नागेश कोइराला, उपमेयर इन्दिरा कार्की र महानगरका पूर्वकार्यकारी अधिकृतसमेत रहेका गोपाल रेग्मीले मेयरमा दाबी गरिरहेका छन् ।

मेयर पराजुलीले आफ्नो कार्यकालमा सुरु भएका योजना सम्पन्न गर्न उम्मेदवार बन्ने बताए । उनले संकटका बेला विराटनगरको मेयरमा जितेको र आफ्नो नेतृत्वमा विराटनगरमा धेरै काम भएकाले पार्टीले पुनः टिकट दिने दाबी गरे । कांग्रेसबाटै निर्वाचित उपमेयर कार्की आफूले उपमेयर भएर गरेको कामको मूल्यांकनका आधारमा पार्टीले टिकट दिनुपर्ने बताउँछिन् ।

केन्द्रीय सदस्य अमृत अर्याल र कांग्रेस मोरङका उपसभापति कोइरालाले पनि आफ्नो लविङ सुरु गरिसकेका छन् ।महानगरपालिकाको मेयरमा कांग्रेस केन्द्रीय सदस्य तथा सांसद डा. डिला संग्रौलाको पनि चर्चा छ । तर, मेयरमा उठ्नेबारे संग्रौलाले मुख खोलिसकेकी छैनन् ।

नेकपा माओवादी केन्द्रबाट भोगेन्द्र यादवले दाबी गरिरहेका छन् । जनता समाजवादी पार्टीबाट अध्यक्ष उपेन्द्र यादवका छोरा अमरेन्द्र यादव, प्रदेश १ का बहालबाला स्वास्थ्यमन्त्री जयराम यादव, अघिल्लो पटक मेयरमा उठेर पराजित भएका उमेश यादव, पूर्वउपमेयर भूराज राई र जसपाका केन्द्रीय सदस्य तेजलाल कर्णले मेयरमा दाबी गरिरहेका छन् ।

जसपाबाट मेयरको दाबी गरिरहेकाहरूले टिकटका लागि दौडधुप सुरु गरिसकेका छन् । स्वास्थ्यमन्त्री यादवले पार्टीले गर्ने निर्णय आफूलाई मान्य हुने बताए । ‘अहिले नै यो वा त्यो पदमा उठ्छु भन्ने मेरो कुनै कुरा छैन,’ उनले शिलापत्रसँग भने, ‘पार्टीले जे जिम्मेवारी दिन्छ, त्यो निर्णय मान्छु ।’

एकीकृत समाजवादीबाट पोलिटब्युरो सदस्य महेश रेग्मीले पनि मेयरमा उठ्ने आकांक्षा राखेका छन् । ‘पार्टीले निर्णय गर्ने कुरा हो । पार्टीले निर्णय गरेर पठाउँछ भने पछि हट्ने कुरा आउँदैन,’ उनले भने ।

यस्तो थियो २०७४ सालको मत परिणाम

२०७४ सालको स्थानीय तहको चुनावमा कांग्रेसका भीम पराजुली २३ हजार ३१ मत प्राप्त गर्दै मेयरमा निर्वाचित भएका थिए । उपमेयरमा कांग्रेसकै इन्दिरा कार्की २० हजार १४६ मत प्राप्त गरी विजयी भएकी थिइन् ।

विजय गच्छदार नेतृत्वको तत्कालीन फोरम लोकतान्त्रिकसँग तालमेल गरेको एमाले दोस्रो भएको थियो । एमालेका विनोद ढकालले १७ हजार ३२१ मत प्रप्त गरेका थिए । माओवादी केन्द्र र तत्कालीन संघीय समाजवादीको गठबन्धनबाट उठेका उमेश यादवले १४ हजार ९ सय ९८ मत पाएका थिए भने राप्रपाका प्रल्हाद साहले ५ हजार ५ सय २४ मत प्राप्त गरेका थिए ।

प्रकाशित मिति: सोमबार, फागुन ३०, २०७८ १६:५९