लुम्बिनी प्रदेशको प्रादेशिक भलिबल टिम छनोट

A+ A A-

लुम्बिनी प्रदेशबाट भलिबल खेलमा प्रतिनिधित्व गर्ने खेलाडीहरूको छनोट गरिएको छ । प्रदेश खेलकुद परिषद् लुम्बिनीको आयोजनामा खेलाडी छनोट कार्यक्रम सम्पन्न गरेको हो ।

भलिबल प्रशिक्षक अर्जुन घिमिरको संयोजकत्वमा सदस्यहरू हरिबहादुर वली, प्रदेशका सहायक प्रशिक्षक भीम डाँगीको ३ सदस्यीय छनोट समितिले प्रदेश टिम छनोट गरेको हो ।

प्रदेशका १२ जिल्लाको खेलकुद विकास परिषद्बाट छनोट भई सिफारिसका आधारमा आएका खेलाडीहरू छनोट खेलमा सहभागी भएको समितिका संयोजक अर्जुन घिमिरेले बताए । जसबाट १२ जना प्लेईङ खेलाडी र ४ जना वैकल्पिक खेलाडी छनोट गरिएको उनले बताए ।

रुपन्देहीका लोकेन्द्रबहादुर भण्डारीको कप्तानीमा प्रताप खवास (रुपन्देही), दिपेन्द्र श्रेष्ठ (गुल्मी), आदर्श रसाइली (रुपन्देही), विनोद विक (रुपन्देही), चिरन्जीवी खड्का (गुल्मी), महेन्द्र चौधरी (नवलपरासी), प्रविन बुढाथोकी (गुल्मी), रूपबहादुर गुरौ (नवलपरासी), बबिन थापा (गुल्मी), आशिष सुनार (रुपन्देही), जीवन रसाइली (रुपन्देही) छानिएका छन् । यसैगरी वैकल्पिकमा सरोज चौधरी (रुपन्देही), थम्मान खत्री (रुपन्देही), दिपेश कुँवर (रुपन्देही), डोलबहादुर थापा (गुल्मी) छन । कुल ३२ जना खेलाडीहरू छनोटमा सहभागी भएका थिए ।

खेलाडी छनोट कार्यक्रममा प्रदेश खेलकुद परिषद् लुम्बिनीका प्रदेश सदस्यसचिव जयप्रकाश भट्टराईले लुम्बिनी प्रदेश खेलकुदमा उर्वरभूमि भएको बताउँदै दिगो विकासको योजनाअनुसार कार्ययोजना अघि बढाउने तयारीमा लागेको बताए ।

चैत ७ गतेबाट सुदूरपश्चिममा हुने दोस्रो मुख्यमन्त्री कप पुरुष राष्ट्रिय भलिबल प्रतियोगितालाई लक्षित गरी प्रदेशको खेलाडी छनोट सम्पन्न गरिएकाे उनले बताए ।

सुदूरपश्चिम प्रदेश खेलकुद परिषद्को आयोजनामा ७-१२ गतेसम्म लिगकम नकआउटका आधारमा हुने प्रतियोगितामा सात प्रदेश र तीन विभागीय टाेलीले भाग लिनेछन् । उपाधि विजेताले नगद ४ लाख रुपैयाँ, कप, मेडल, प्रमाणपत्र तथा उपविजेताले नगद २ लाख रुपैयाँ, कप, मेडल, प्रमाणपत्र पाउनेछ ।

यसैगरी, तेस्राे हुनेले नगद १ लाख तथा चाैथाे हुने टाेलीले नगद ५० हजार रुपैयाँसहित कप, मेडल, प्रमाणपत्रबाट पुरस्कार पाउनेछ । उत्कृष्ट प्रदर्शनका आधारमा विधागत खेलाडीले पनि पुरस्कार प्राप्त गर्नेछन् ।

प्रकाशित मिति: सोमबार, फागुन ३०, २०७८ ०९:२५