बागमतीका मुख्यमन्त्री भन्छन्– धरै मन्त्रालय भए जनताको काममा सहज हुन्छ, त्यसैले बढाएँ

बागमतीका मुख्यमन्त्री भन्छन्– धरै मन्त्रालय भए जनताको काममा सहज हुन्छ, त्यसैले बढाएँ

A+ A A-

बागमती प्रदेशका मुख्यमन्त्री राजेन्द्र पाण्डेले यसअघिको प्रदेश सरकारले चाहिने काममा बजेट नछुट्याएको आरोप लगाएका छन् । आइतवार प्रदेशसभामा सांसदहरूको प्रश्नको उत्तर दिँदै उनले यस्तो बताएका हुन् ।

मुख्यमन्त्री पाण्डेले सुरुङ जस्तो राष्ट्रिय गौरवको योजनामा जम्मा ७५ करोडको बजेट राखेको तर, निर्माण सुरु गरेदेखि सम्पन्न गर्ने बेलासम्म झन्डै २४ अर्ब लाग्ने स्थिति रहेको बताए । उनले सुरुङ र सडक निर्माणका लागि विदेशी बैंकहरूले ऋण दिन इच्छुक रहेको बताउँदै तत्काल नबन्ने काममा सानो बजेट छुट्याएर बजेट फ्रिज गर्न नमिल्ने बताए ।

उनले चार्जिङ स्टेसन नबनिकन र विद्युतीय बस चलाउन लायक सडकको नभइकन विद्युतीय बसका लागि छुट्याइएको बजेट अन्य जनहितका काममा खर्च गरिने बताए । उनले अघिल्लो सरकारले विद्युतीय बस र सुरुङका लागि छुट्याएको बजेट अहिलेसम्म खर्च नभएको पनि बताए ।

मुख्यमन्त्री पाण्डेले मन्त्रालयलाई व्यवस्थित गर्नसके जनताका धेरै काम सहज हुने र चाँडो हुने र सोही उद्देश्यका साथ मन्त्रालयको संख्या बढाएर १४ पुर्‍याएको बताए । उनले हाल १५ लाख नागरिक सवारी चालक अनुमति पत्र लिने लाइनमा रहेको र अब प्रदेश सरकारले त्यसलाई चाँडो सक्नका लागि ट्रायल सेन्टर बढाउने कार्यविधि पास गरेको बताए ।

उनले अहिले विज्ञान र प्रविधिको समय भएको उल्लेख गर्दै सवारी साधनहरूमा क्यासलेस सिस्टमको विकास गर्न आवश्यक रहेको र सोही दिशातर्फ प्रदेश सरकारले काम गरिरहेको बताए। उनले चालक सहचालकहरूको जागिर असुरक्षित भएको भन्दै प्रदेश सरकारले अब उनीहरूलाई पनि सम्मानित कर्मचारीको हैसियतमा रहेर काम गर्ने स्थिति बनाउन लागेको जनाए ।

मुख्यमन्त्री पाण्डेले यस आर्थिक वर्षमा अहिलेसम्म २० प्रतिशत बजेट मात्रै खर्च हुन सकेको भन्दै अब विकासका कार्यक्रम धमाधम सुरु हुने विश्वास व्यक्त गरे ।

प्रकाशित मिति: आइतबार, फागुन २९, २०७८ १७:३३