त्यस्तो के निर्णय भयो जसले शेयरमा लगानीकर्तालाई उत्साहित बनायो ?

A+ A A-

आइतबार एकैदिन नेप्से परिसूचक १ सय १ अंकले बढ्दा कतिपय कम्पनीको शेयर मूल्य प्रतिकित्ता ५ सय रुपैयाँभन्दा धेरै बढ्यो ।

१५ फागुनमा २६ सय ६१ मा रहेको नेप्से परिसूचक घट्दै बुधबार २५ सय ७१ मा झरेको थियो । गत साता कारोबार बन्द हुँदा २५ सय ७५ को बिन्दु रहेको नेप्से आइतबार २६ सय ६८ बिन्दु पुगेको छ । आइतबार केही त्यस्ता कम्पनी पनि रहे, जसले गुमाउनु पर्‍यो ।

कारोबार भएका २ सय २८ मध्ये २ सय ११ कम्पनीले नाफा कमाएका छन् । नेपालको शेयर बजारमा सबैभन्दा बढी प्रभुत्व रहेको बैंकिङ समूहमा ५४ अंकले बढ्यो । आइतबारको बढोत्तरीमा सबैभन्दा बढी योगदान बैंकिङ समूहको नै रह्यो ।

बैंकहरूमा निक्षेप आकर्षित गर्न पुन: ब्याजदर वृद्धि हुन्छ कि भन्ने आशंकाबीच बैंकर्स संघले ब्याजदर वृद्धि नगरेपछि शेयर लगानीकर्ता बैंकिङ समूहमा आकर्षित भएको विज्ञहरूको भनाइ छ । आइतबार वाणिज्य बैंकअन्तर्गतका समूहको शेयर बढेर ५४.७१ अंकले बढेर १ हजार ७ सय १९ बिन्दुमा पुगेको छ ।

आइतबार ११ वटै उपसमूह उकालो लागेका छन् ।

के थियो कारण ?

वाणिज्य बैंकहरूको बढोत्तरीमा लगानीकर्ताले ब्याजदर नबढाउने निर्णयको प्रभावका रूपमा लिएका छन् । सबैभन्दा बढी बढोत्तरी भने जीवन बीमा र निर्जीवन बीमा कम्पनीको छ । यी कम्पनीको कारोबार बढ्नुको कारण भने साधारणसभाको मिति तोक्नु र लाभांश वितरण हुने आशमा कारोबार बढेको बताइएको छ ।

'बीमा कम्पनीहरूले भटाभट साधारणसभाको मिति तोकेका छन्, डेभिडेन्टको आशमा पनि लगानीकर्ताहरू यता आकर्षित भएको पाइन्छ,' शेयर लगानीकर्ता राजन तिवारीले भने, 'केही नहुँदा पनि बीमा कम्पनीहरूले १५ प्रतिशत बढीको डेभिडेन्ट दिने भएकाले लगानीकर्ताहरूको आकर्षण स्वाभाविक देखिएको छ ।'

आइतबारको मूल्य बढी देखिए पनि समग्रमा भने अघिल्लो महिनाको तुलनामा धेरै माथि भने नपुगेको उनको भनाइ छ । त्यस्तै कम्पनीगत रूपमा आइतबार राष्ट्रिय बीमा कम्पनीको प्रोमोटर शेयरको मूल्य प्रतिकित्ता १४ सय ७७ र राष्ट्रिय बीमा कम्पनी लिमिटेडको ८ सय ७२ रुपैयाँले बढेको छ ।

बीमा कम्पनीले पुँजी वृद्धिको योजना अघि बढाएकाले लगानीकर्ता आकर्षित भएको देखिएको छ ।

यो पनि पढ्नुस् :

सबै उपसमूह एकै पटक चम्किँदा शेयरबजारमा एकैदिन १ सय १ अंकको उछाल, कारोबार कति ?

यी १२ कम्पनी जसले आइतबार पनि शेयर बजारमा गुमाए

राष्ट्रिय बीमा कम्पनीको शेयरमूल्य एकैदिन १४ सयले बढ्यो, यी हुन् धेरै मूल्य बढेका १२ कम्पनी

प्रकाशित मिति: आइतबार, फागुन २९, २०७८ १५:४१