पूर्वसचिवदेखि पूर्वमेयरसम्मको चर्चा, को बन्ला पोखराको मेयर ?

A+ A A-

आउँदो ३० वैशाखमा हुन लागेको स्थानीय तहको निर्वाचनमा पोखरा महानगरपालिकाकाे मेयरका लागि दर्जनभन्दा बढीले आकांक्षा देखाएका छन् । सबै पार्टीमा सम्भावित उम्मेदवारकाे चर्चा जारी छ । पोखरामा मुख्यतः दुई ठूला दल नेकपा एमाले र नेपाली कांग्रेसबीच प्रतिस्पर्धा हुन्छ ।

२०७४ सालको निर्वाचनमा मेयर निर्वाचित मानबहादुर जिसीले कांग्रेस-माओवादी गठबन्धनका उम्मेदवार कांग्रेसका रामजी कुँवरलाई साढे १३ हजार मतले हराएका थिए । पोखरामा एमाले बलियो छ । यहाँ एमालेबाट निर्वाचित २२ र कांग्रेसका ११ वडाध्यक्ष छन् ।

एमालेबाट क–कसको चर्चा ?

नेकपा एमालेमा हालसम्म आठ जनाभन्दा बढीको नाम मेयरको उम्मेदवार हुनेमा पार्टीभित्रै चर्चा छ । मेयरमा पूर्वमेयर, हाइड्रो सञ्चालक, होटल सञ्चालकको चर्चा छ । एमालेबाट मेयरमा कृष्णबहादुर थापा, भीम कार्की र मञ्जुदेवी गुरुङको नाम बढी चर्चामा छ ।

कृष्णबहादुर २०५४ सालमा तत्कालीन पोखरा उप-महानगरपालिकाका मेयर थिए । हाल उनी प्रदेश सांसद छन् । एकपटक मेयर हुने इच्छा भएकाले पार्टीले चाहेमा थापा प्रदेश सांसदबाट राजीनामा दिन तयार रहेको एमाले स्रोत बताउँछ । ‘पार्टीको केन्द्रीय कमिटीले भन्नुपर्‍यो । यसले मेयर हुन प्रदेश सांसद छोड्यो भनेर सन्देश त जान्छ', एमालेका एक नेता भन्छन्, ‘त्यसलाई दुई तरिकाले हेर्नुपर्छ । एउटा राजीनामा दियो भनेर, अर्को उहाँ पोखरालाई आवश्यक मान्छे रहेछ भनेर ।’

एमालेबाट मेयरको दाबी गरिरहेका मञ्जुदेवी गुरुङ, भरत पहारी, कृष्णबहादुर थापा र भीम कार्की ।

अर्का आकांक्षी भीम कार्की पार्टीको कास्की जिल्ला इन्चार्ज हुन् । पार्टीका केन्द्रीय सदस्यसमेत रहेका उनलाई मेयर बनाउन हुँदैन भन्ने मत एमालेभित्रै बलियो छ । एमाले उपमहासचिव पृथ्वीसुब्बा गुरुङनिकट स्याङ्जाका कार्की कास्कीको भूगोलको नभएकाले उनलाई टिकट दिन हुँदैन भन्ने एउटा पक्ष छ । अर्को पक्ष कार्की जिल्ला इन्चार्ज भएको र पार्टीका लागि खटिने भएकाले उनले पाउनुपर्ने बताउँछ । स्याङ्जा र मनाङको भूगोलमा काम गरेका कार्की कास्कीका लागि भने नयाँ अनुहार हो । तर, पृथ्वीसुब्बाले जोडबल गरेमा उनी भाग्यमानी साबित हुन सक्छन् ।

हालकी उपमेयर मञ्जुदेवी गुरुङ पनि मेयरको दाबेदार हुन् । उपमेयर भएकाले उनी मेयरकी स्वाभाविक दाबेदार हुन् । राष्ट्रपति विद्यादेवी भण्डारीले कुनै पालिकाको नेतृत्वमा कसैलाई रोज्न पाएमा मञ्जुलाई नै व्यवस्थापन गर्न सक्ने चर्चा एमालेभित्र छ । सांसदलाई नै राजीनामा गराएर ल्याउनुभन्दा उपमेयरलाई नै मेयर बनाउनुपर्ने एमालेका एकथरी नेताको तर्क छ ।

नेतृ मिनाकुमारी गुरुङ महिलातर्फबाट चर्चामा आएको अर्को नाम हो । पार्टीको जिल्ला सहइन्चार्ज रहेकी मिना एमाले उपमहासचिव पृथ्वीसुब्बाकी सम्धिनी हुन् । तर, पीएसले मिनाभन्दा पनि इन्चार्ज भीम कार्कीलाई साथ दिने बताइन्छ ।

यी चारबाहेक होटल सञ्चालकद्वय भरत पहारी र पुष्प अधिकारी पनि मेयरका आकांक्षी हुन् । उनीहरूले पार्टी अध्यक्ष केपी शर्मा ओली, महासचिव शंकर पोखरेल, उपमहासचिव पृथ्वीसुब्बालाई रिझाउन सक्दो प्रयास थालेका छन् । रूपाकोर्ट रिसोर्टका सञ्चालक पुष्पले गत २३ फागुनमा अध्यक्ष ओली पोखरा आउँदा आफ्नै रिसोर्टमा स्वागत गरेका थिए । त्यहाँ पुष्पले पोखरा बनाउने आफ्नो भिजन अध्यक्ष ओलीलाई सुनाएको एमाले स्रोतले बतायो ।

भ्रष्टाचार मुद्दामा मुछिएका भरत पहारी मेयरका अर्का आकांक्षी हुन् । लेकसाइडस्थित स्वीस इन्टरनेसनल होटल सरोवरका सञ्चालक पहारीले होटलको उद्घाटन गर्न २०७६ साल जेठमा अध्यक्ष ओलीलाई नै बोलाएका थिए । तर, उक्त होटल मापदण्ड विपरीत बनेको थाहा पाएपछि ओलीले उद्घाटन नगरी फर्किएका थिए । विवादास्पद पात्रलाई मेयरको उम्मेदवार बनाउँदा चुनावमा नसोचेको परिणाम आउने चिन्ता एमालेका जिल्ला नेताहरूलाई छ । ‘उहाँलाई मेयरको उम्मेदवार बनाउँदा पार्टीकै आलोचना हुन्छ । त्यसै त अहिले काम भएन भन्ने गुनासो छ', एमालेका एक नेताले भने, ‘झन् भ्रष्टाचारको आरोप खेपेकाले उहाँ उम्मेदवार बन्दा प्रतिस्पर्धी पार्टीलाई हाम्रो विरोध गर्न बल पुग्छ ।’

पछिल्लो पुस्ताका नेता दिलीप न्यौपाने र रश्मी आचार्यले पनि मेयरमा भित्रभित्रै इच्छा राखेको बुझिन्छ । तर, उनीहरू दुवै सकेसम्म महिलालाई मेयर बनाउनुपर्ने पक्षमा छन् । हालकी उपमेयर मञ्जुदेवी मेयर बनेमा आफूहरूलाई सजिलो हुने भएकाले विद्यार्थी राजनीतिका यी सहब्याची अबको चुनावमा उपमेयर हुने दाउमा छन् । अनेरास्ववियुका पूर्व केन्द्रीय उपाध्यक्ष रश्मी अहिले पार्टीको प्रदेश उपसचिव हुन् । त्यस्तै अनरेस्वावियुका पूर्व सचिवालय सदस्य न्यौपाने एमाले पोखरा महानगरका अध्यक्ष छन् ।

कांग्रेसमा क–कसको चर्चा ?

नेपाली कांग्रेसबाट मेयरको उम्मेदवारमा प्रदेशका बहालवाला मन्त्री, संघका पूर्वमन्त्री, पूर्वसचिवसम्मको चर्चा छ । पार्टीका निवर्तमान जिल्ला सभापति कृष्ण केसी सिनियर नेता भएको र उनले नै टिकट पाउने लगभग पक्का रहेको कांग्रेस स्रोत बताउँछ । त्यस्तै, प्रदेशका बहालवाला कानुनमन्त्री बिन्दुकुमार थापाको पनि मेयरमा चर्चा छ ।

‘चुनावमा खर्च गर्नुपर्छ । उहाँलाई खर्च गर्न कुनै समस्या छैन । पैसा खर्च गर्नुपर्ने अवस्था आएमा उहाँको सम्भावना छ', एक कांग्रेस नेताले भने । मेयरको उम्मेदवार बन्नुपर्ने अवस्थामा कास्की २(ख) बाट निर्वाचित थापाले प्रदेश सांसदबाट राजीनामा बुझाउनुपर्ने हुन्छ ।

कांग्रेसबाट मेयरको दाबी गरिरहेका बिन्दुकुमार थापा, सरस्वती गुरुङ, बाबुराम आचार्य र कृष्ण केसी ।

नेपाल सरकारका पूर्वसचिव बाबुराम आचार्य अर्का दाबेदार हुन् । कांग्रेस स्रोतले बताएअनुसार आचार्यलाई पार्टीका प्रदेश सभापति शुक्रराज शर्माको बलियो साथ छ । नेपाल उद्योग वाणिज्य महासंघका पूर्वाध्यक्ष आनन्दराज मुल्मीले पनि चुनाव लड्ने मानसिकता बनाएको कांग्रेस स्रोतले बतायो । संघ सरकारका पूर्व कानुनमन्त्री यज्ञबहादुर थापाको पनि मेयरको उम्मेदवारमा चर्चा छ । पार्टीका सिनियर नेता भएको र जनतामाँझ परिचित भएकाले पनि उनको सम्भावना छ ।

पार्टीका जिल्ला सभापति किशोरदत्त बराल पनि उम्मेदवार बन्न इच्छुक छन् । पार्टीका अर्का नेता वीरेन्द्र बिजुक्छेले पनि मेयर लड्न इच्छा देखाएका छन् । गत निर्वाचनमा उपमेयरमा पराजित नेतृ सरस्वती गुरुङ अर्की दाबेदार हुन् । महिला नेतृ कांग्रेस प्रदेश सहमहामन्त्री कोपिला रानाभाट, माया बराल, लक्ष्मी पाण्डेको पनि पाए मेयर, नपाए उपमेयर हुने इच्छा रहेको बुझिन्छ ।

महिला नेतृमध्ये सरस्वती बलियो दाबेदार मानिन्छिन् । गत निर्वाचनपछि उनले कांग्रेसमा आफूलाई स्थापित गर्न सफल भएकी छन् भने प्रधानमन्त्री एवं पार्टी सभापति शेरबहादुर देउवासम्म सिधा पहुँच बनाएकी छन् । मेयरमा नपाए पनि उनी फेरि उपमेयरमा उठ्न सक्ने सम्भावना छ । उनी मेयरमा उठेर उद्योगी किरण केसी उपमेयर उठ्न सक्ने चर्चा पनि छ ।

माओवादीबाट कसको सम्भावना ?

माओवादीबाट मेयरको उम्मेदवार हुनेमा तीन जनाको नाम बढी चर्चामा छ । माओवादीका एक नेताका अनुसार गठबन्धनका दल छुट्टाछुट्टै चुनाव लडेमा माओवादीबाट बखानसिंह तमु, विश्वप्रकाश लामिछाने र हरिनारायण गिरी (विज्ञान)मध्ये एक जना उम्मेदवार बन्ने सम्भावना बढी छ । ‘विश्वजी पहिला पनि मेयरको आकांक्षी हुनुहुन्थ्यो । उहाँको यसपटक पनि इच्छा देखिन्छ', माओवादीका एक नेताले भने, ‘बखानजी र विज्ञानजी जनयुद्धदेखि नै लागेका सिनियर नेता भएकाले उहाँहरूको सम्भावना छ । बाँकी पार्टी केन्द्रकै कुरा भयो ।’

माओवादी केन्द्रबाट मेयरको दाबी गरिरहेका बखानसिंह तमु, हरिनारायण गिरी र विश्वप्रकाश लामिछाने ।

बखान माओवादीको कास्की समन्वय समिति संयोजक हुन् । पोखरा उपत्यका नगर विकास समितिका पूर्वाध्यक्ष विश्वप्रकाश पार्टी पोखरा नगर कमिटीका पूर्वाध्यक्ष हुन् । विज्ञान हालै पार्टी पोखरा महानगर कमिटीका अध्यक्ष बनेका छन् । उपमेयरमा अघिल्लो निर्वाचनमा पराजित गोमा ढकाल उठ्ने चर्चा छ । तर, गठबन्धन भएमा परिस्थिति फरक बन्ने छ । गठबन्धन हुँदा कांग्रेसले मेयर लड्ने भएकाले ढकालले त्यस्तो अवस्थामा टिकट पाउने सम्भावना निकै न्यून रहन्छ ।

गठबन्धनका एक नेता अन्यभन्दा कांग्रेसको जनाधार बढी भएकाले मेयर नछोड्ने बताउँछन् । ‘गठबन्धनमध्ये पोखरामा राम्रो जनाधार भएको कांग्रेस हो । गठबन्धन नै हुने भयो भने कांग्रेसले मेयर लिएर अरू पार्टीलाई उपमेयर दिन्छ', ती नेताले भने ।

प्रकाशित मिति: आइतबार, फागुन २९, २०७८ १२:१७