एमाले छिर्न लागेका वीरगञ्ज मेयर भन्छन्- सानो पार्टीको मेयरले केही गर्न सक्दो रहेनछ

एमाले छिर्न लागेका वीरगञ्ज मेयर भन्छन्- सानो पार्टीको मेयरले केही गर्न सक्दो रहेनछ

A+ A A-

विरगञ्ज महानगरपालिकाका मेयर विजय कुमार सरावगी एमालेमा प्रवेश गर्न लागेको चर्चा छ । उनी एमाले नेताहरूको निरन्तर सम्पर्कमा रहेको समाचारहरू पनि आइ नै रहेका छन् । सरावगी पनि एमाले अध्यक्ष केपी शर्मा ओलीसँग भेट भएको कुरा स्वीकार गर्छन् ।

तर, एमाले प्रवेश गर्नेबारे भने अन्तिम निर्णय नलिइसकेको उनको भनाइ छ । एमालेमा जाँदा आफूसँगै जाने नेता-कार्यकर्ताको व्यवस्थापन कसरी हुन्छ त्यो महत्वपूर्ण हुने उनी बताउँछन् ।

सरावगी २०७४ को स्थानीय चुनावमा अहिलेको जसपा (तत्कालीन संघीय समाजवादी फोरम) बाट वीरगञ्जको मेयरमा निर्वाचित भएका हुन् । फेरि मेयरको उम्मेदवार निश्चित भए एमालेमा प्रवेश गर्ने मनस्थितिमा उनी रहेको बताइन्छ । तर, उनले अहिले नै यो विषयमा बोल्न नमिल्ने बताए । तर, एमाले नेताहरूसँग कुराकानी भइरेको कुरालाई भने उनले अस्वीकार गरेनन् ।

प्रस्तुत छ सरावगीसँग शिलापत्रले गरेको कुराकानीः

एमाले नेताहरूसँग भेट गरिरहनुभएको छ, उहाँहरूले तपाईंलाई के भन्नुभएको छ ?

उहाँहरूले २/३ महिनादेखि नै पार्टीमा आउन भनिरहनुभएको थियो ।

तपाईंलाई चाहिँ एमालेमै गएर वीरगञ्जमा राम्रो काम गर्न सकिन्छ जस्तो लागेको हो ?

एमाले राष्ट्रियस्तरको पार्टी हो । कति दिनदेखि काम गरेर संस्थागत भइसकेको पार्टी हो । अरु नयाँ पार्टीहरूमा जानुभन्दा त पुराना पार्टीमै जाँदा राम्रो हुन्छ जस्तो लागेको छ ।

भनेपछि एमालेबाहेक अरु पार्टीमा पनि जाने सम्भावना छ ?

राजनीतिक कुरा मिल्यो भने हुनसक्छ । जान पनि सकिन्छ । तर, त्यस्तो अन्य दलसँग कुरा भएको छैन । एकैचोटी धेरै ठाउँमा कुरा गर्ने कुरा पनि भएन । अहिले जहाँ कुरा भइरहेको छ, त्यहीँ टुंग्याउने प्रयास छ ।

एमालेले तपाईंलाई मेयरमा अफर गरेको छ भन्ने सुनिन्छ, ठूलो पार्टीबाट लड्दा सजिलो हुन्छ भनेर एमालेमा जान लाग्नुभएको हो ?

हो । किनभने भरतपुरमा पाँच वर्षमा एक हजार करोडभन्दा बढी अतिरिक्त पैसा गएको छ । ठूलो पार्टीमा भयो भने कमसे कम विकासका लागि पैसा त ल्याउन सकिन्छ । सानो पार्टीमा हुँदा न प्रदेश सरकारले केही दियो न केन्द्र सरकारले केही दियो । त्यसैले मैले जुन गतिमा विकास गर्न चाहिरहेको छु संशाधन नै भएन भने विकास कसरी गर्ने ? ठूला पार्टीमा रहियो भने बजेट ल्याउन सकिन्छ ।

वीरगञ्ज देशको आर्थिक राजधानी हो । ६० प्रतिशतभन्दा बढी आयात-निर्यात यहीँबाट हुन्छ । ४० प्रतिशतभन्दा बढी राजस्व यहीँबाट उठ्छ । त्यसअनुसारको लगानी वीरगञ्जमा आजसम्म कुनै पनि पार्टीले गरेको छैन । त्यसैले ठूलो पार्टीबाट वीरगञ्जको मेयर या प्रतिनिधिसभामा जितिन्छ भने कमसे कम बजेट ल्याएर राम्रोसँग विकास गर्न त सकिन्छ ।

वीरगञ्जमै पनि एमालेविरुद्ध ठूला प्रदर्शनहरू भए । वीरगञ्जमा एमालेको जनमत कमजोर छ भन्नेहरू पनि छन् नि !

मान्छेहरूको बुझाइ फरक हुँदै जान्छ । त्यहीअनुसार नै जनमत बन्ने हो । जुन बेला मधेस आन्दोलन उठाइयो थुप्रै कुराहरू पूर्ण पनि गरियो । थुप्रै कुरा पूर्ण गर्न पनि सकिएन । अहिले म जुन पार्टीमा छु त्यो पार्टी ठूलो बनेर आउनै सकेन । धेरै मुद्दाहरू सम्बोधन भएका छन् । केही मुद्दाहरू बाँकी छन् । विस्तारै हुँदै जान्छन् ।

अहिले जुन पार्टीमा हुनुहुन्छ त्यो पार्टीका नेताहरूले केही भन्नुभएको छ ?

मेरो पार्टीका नेताहरूले त भनिहाल्नुहुन्छ नि नजाउ भनेर । त्यो त स्वाभाविक कुरा हो ।

अहिलेको पार्टीका खासगरी कोसँग बढी कुरा भएको छ ?

मेरो अहिले केन्द्रीय र प्रदेश लेबलसँग कुरा भएको छैन । स्थानीय नेताहरू, स्थानीय तहका प्रमुखहरूसँग कुरा भएको छ । केन्द्रीय अध्यक्षसँग पनि कुरा भएको छैन । उहाँहरूको कुरा आयो भने कुरा गरौँला ।

पार्टी प्रवेशबारे के गर्ने भन्ने निर्णय कहिले गर्नुहुन्छ ?

छिटै गरौँला । हाम्रो बुझ्ने बुझाउने कुरा पनि चलिरहेको छ । धेरै कुरा नबुझी पार्टी परिवर्तन गर्दा गाह्रो हुन्छ । म एक्लै जाने होइन मसँग अरु साथीहरू पनि जान्छन् । उनीहरूको व्यवस्थापनको कुरा पनि छ । राष्ट्रिय पार्टी हो । सबैको व्यवस्थापन हुन्छ/हुँदैन भन्ने कुराहरू पनि छ ।

तपाईंको कुरा सुन्दा एमालेमा जानै लाग्नुभयो भन्ने बुझाइ रह्यो, यो बुझाइ ठिक छ ?

ठ्याक्कै अहिले त्यसै भन्न त मिल्दैन । राजनीति हो, कुनै कारणले एउटा सानो कुराले त धेरै कुरा अड्कन्छ ।

एमाले अध्यक्ष केपी ओलीसँग पनि भेट भएको थियो ?

उहाँसँग काठमाडौंमा भेट भएको थियो ।

उहाँले के भन्नुभयो त ?

उहाँ त स्वागत गर्न तयार नै हुनुहुन्छ ।

भनेपछि एमालेबाट ग्रिन सिग्नल पाउनुभएको रहेछ होइन ?

हजुर हजुर । पहिलादेखि नै कुराहरू भइरहेको थियो । हामी कोसिस गर्दै थियौँ । उहाँ त तयारै हुनुहुन्छ । मचाहिँ यता हाम्रा साथीहरूसँग कुरा गरिरहेको छु । हेरौँ साथीहरूको मत के आउँछ ।

तपाईंलाई मेयर, केन्द्रीय सदस्य बनाउँछु भन्ने आश्वासन दिनुभएको हो ?

धेरै कुराहरू छन् । पार्टीले कुनै पनि नेतालाई ल्याउँदा उसले गरेको योगदानको पनि मूल्यांकन गरेको हुन्छ । म व्यावसायिक र सामाजिक क्षेत्रमा काम गरेको मान्छे हुँ । मैले निजीक्षेत्रमा पनि नेतृत्व गरेको छु । हामी गयौँ भने सोहीअनुसारको मूल्यांकन पार्टीले गर्ला ।

तपाईंले चाहिँ ओलीलाई के भन्नुभयो ?

म भेट्न गएको थिएँ । उहाँको राष्ट्रिय नेताको छवि छ । उहाँमा ठूलो राजनीतिज्ञ र देशमा केही गर्नुपर्छ भन्ने भावना देखियो । उहाँमा ठूलो अनुभव देखियो । त्यो भेटमा एमालेका नेताहरू हुनुहुन्थ्यो । म एक्लै गएको थिएँ । उहाँसँग पहिले पनि भेटघाट भएको थियो ।

तपाईंले स्थानीय तह नलडेर संघ या प्रदेशमा लड्न खोजेको हो ?

अहिलेसम्म त्यस्तो कुनै निर्णय गरिसकेको छैन । तर, भोलिको दिनमा म जुन पार्टीमा रहन्छु त्यसले जुन उपयुक्त ठाउँमा राख्छन् होला नि !

उपेन्द्र यादवहरूप्रति चाहिँ कस्तो दृष्टिकोण छ त ?

केही छैन । उपेन्द्रजी राम्रो नेता हो । उहाँले मलाई पार्टीमा ल्याउनुभयो । पार्टीमा ल्याएर जिताउनु पनि भयो ।

उपेन्द्र यादवलाई किन छाड्नुभयो ?

अहिले म यही पार्टीमा छु । पछि आइहाल्छ नि धेरै कुराहरू ।

प्रकाशित मिति: शुक्रबार, फागुन २७, २०७८ २०:४४