रंगेलीका मेयर र उपमेयर भित्र्याएको एमाले वीरगञ्जका सरावगीलाई पनि स्वागत गर्ने तयारीमा

रंगेलीका मेयर र उपमेयर भित्र्याएको एमाले वीरगञ्जका सरावगीलाई पनि स्वागत गर्ने तयारीमा

A+ A A-

नेकपा एमाले अहिले मधेस–तराईका जनप्रतिनिधिलाई आफ्नो पार्टीमा भित्र्याउने अभियानमा लागेको छ । उसले त्यसका लागि नेकपा माओवादी केन्द्रबाट निर्वाचित जनप्रनिधि र जनता समाजवादीबाट निर्वाचित जनप्रतिनिधिलाई आफूतर्फ तान्ने रणनीति लिएको छ ।

यसैक्रममा उसले २५ फागुनमा रंगेलीका मेयर दिलिप बगडिया र उपमेयर केशवकुमारी खराललाई पार्टीमा भित्र्याएको थियो । अध्यक्ष केपी शर्मा ओली उनीहरूलाई पार्टीमा स्वागत गर्न आफै मोरङको रंगेली पुगेका थिए । यी दुबै २०७४ मा माओवादी केन्द्रबाट निर्वाचित भएका थिए ।

अब एमालेको आँखा मधेस प्रदेशको एकमात्र महानगरपालिका वीरगञ्जका मेयर विजय कुमार सरावगीमा लागेको छ । एमाले सरावगीसँग निरन्तर सम्पर्कमा रहेको एमाले उपाध्यक्ष सुवास नेम्वाङले बताए । उनले सरावगी पहिलादेखि नै एमालेसँग निकट रहेको बताए ।

उता सरावगीले पनि आफू एमालेसँग वार्तामा रहेको बताएका छन् । उनले शिलापत्रसँग भने, ‘म एमालेसँग सम्पर्कमा छु । अहिले कुरा मिलिसकेको छैन । दुई चार दिनमा स्पष्ट हुन्छ ।’ उनले आफू एक्लै एमालेमा प्रवेश गर्न लागेको नभई अरु साथीहरूलाई पनि लिएर जाने बताए । तर, उनीहरूको व्यवस्थापन कसरी हुन्छ, त्यो महत्वपूर्ण हुने सरावगीको भनाइ छ ।

२०७४ को स्थानीय निर्वाचनमा जसपा (तत्कालीन संघीय समाजवादी फोरम) बाट निर्वाचित एकमात्र महानगरका मेयर हुन् सरावगी । उनी एमालेबाट फेरि मेयरको उम्मेदवार निश्चित भए एमालेमा प्रवेश गर्ने मनस्थितिमा रहेको बताइन्छ । तर, उनले अहिले नै यो विषयमा बोल्न नमिल्ने बताए । उनले भने, ‘धेरै कुरामा डिल भइरहेको छ । डिलको विषय अहिले बाहिर ल्याउने कुरा भएन । दुई चार दिनमा स्पष्ट भइहाल्छ ।’