दलहरूले निर्वाचन आयोगलाई भने- आचारसंहिता कडाइका साथ पालना होस्

A+ A A-

निर्वाचन आयोगले स्थानीय तह चुनावको तयारीको सम्बन्धमा राजनीतिक दलहरूसँग छलफल गरेको छ ।

आयोगले शुक्रबार स्थानीय तह चुनावको प्रयोजनका लागि आयोगमा दर्ता भएका राजनीतिक दलहरूसँग आगामी वैशाख ३० गते हुने स्थानीय तह चुनावको सम्बन्धमा छलफल गरेको हो ।

छलफलका क्रममा आयोगले निर्वाचन तयारीको सम्बन्धमा गरेका कामहरू दलका प्रतिनिधिहरूलाई सुनाएको र निर्वाचन आचारसंहिता लगायतको विषयमा छलफल भएको आयोगका प्रवक्ता शालिग्राम शर्मा पौडेलले बताए ।

‘आयोगले जारी गर्ने आचारसंहिता पूर्ण कार्यान्वयन होस् । हामी सबै राजनीतिक दल आचारसंहिता पालना गर्न प्रतिबद्ध छौँ । र यसमा निष्पक्ष, स्वतन्त्र, स्वच्छ निर्वाचन गराउने सन्दर्भमा आयोग यो आचारसंहिता पालन गर्न सफल होस् भन्ने उहाँहरुको शुभकामना रह्यो,' पौडेलले भने ।

राष्ट्रिय मान्यता नपाएका दलहरूले पनि पार्टी दर्ताको क्रममा पाएको चुनाव चिह्न चुनावमा पनि पाउनुपर्ने माग गरेको पौडेलले जानकारी दिए । 'राष्ट्रिय मान्यताप्राप्त दलबाहेक अन्य ७३ दलहरूले दल दर्ता गर्दा पाएको निर्वाचन चिह्न पाउनुपर्छ । यसमा आयोगले सहयोग गरोस् भन्ने उहाँहरूको धारणा रह्यो,’ उनले भने ।

राष्ट्रिय मान्यता नपाएका राजनीतिक दलहरूलाई पनि उनीहरूकै निर्वाचन चिह्न दिने कुरालाई आयोगले सकारात्मक रूपमा लिएको पौडेलले बताए । प्रमुख निर्वाचन आयुक्तले यसको सम्बन्धमा भएका कानुनी जटिलताहरू फुकाउने सम्बन्धमा कानुनी परामर्श गरिरहेको र दलहरूको बीचमा सोही कुरा राखिएको पौडेलको भनाइ छ ।

पौडेलका अनुसार केही दलहरूले निर्वाचनमा खर्च गर्न पाउने सिलिङ बढाउनुपर्ने माग गरेका थिए भने केहीले खर्च नियन्त्रण गर्न खर्चको सिलिङ बढाउनु नहुने धारणा राखेका थिए । ‘एक/दुई दलहरूले यो खर्च अलि सान्दर्भित्र छैन, अलि वैज्ञानिक छैन, महंगी, मूल्यवृद्धि, डलरको भाउ, मुद्रास्फीति आदिका आधारमा यसलाई वैज्ञानिक बनाउनुपर्छ भन्ने धारणा थियो,' छलफलबारे जानकारी दिँदै पौडेलले भने, 'तर, अधिकांश दलहरूले खर्च नियन्त्रण गर्नुपर्छ, खर्च बढी भए अनियमितता बढ्न सक्छन् । त्यसो भएको हुनाले यो आयोगले निर्धारण गरेको खर्च ठिक छ भन्ने लाइनमै कुरा आयो ।’

प्रकाशित मिति: शुक्रबार, फागुन २७, २०७८ १७:०१