इन्जिनियर एशोसिएशनको मतदान जारी, काठमाडौंमा २ हजारले हाले भोट

A+ A A-

नेपालभरका इन्जिनियरको छाता संस्था नेपाल इन्जिनियर एशोसिएशन (नेईए)को नयाँ कार्यसमिति चयनका लागि भएको निर्वाचनमा मतदान जारी छ ।

एशोसिएशनको ३३औँ कार्यकारिणी समितिका लागि आज देशभरका सातै प्रदेशको १४ स्थानमा एकैसाथ मतदान भइरहेको छ । निर्वाचनका लागि पाँच समूहको प्रतिस्पर्धा छ ।

सत्तारुढ दल नेपाली कांग्रेसनिकट सेन्टर फर डेमोक्रेटिक इन्जिनियर (सिडेन)ले ई. डा. हरिबहादुर दर्लामीको समूहलाई उम्मेदवार बनाएको छ । उक्त उम्मेदवारीप्रति रुष्ट बन्दै कांग्रेसकै दिलीपकुमार झाको नेतृत्वमा अर्को समूहसमेत चुनावी मैदानमा होमिएको छ ।

यस्तै नेकपा एमाले निकट राष्ट्रिय प्रगतिशील गठबन्धनका ई. डा. सुरज लामिछाने, नेकपा (माओवादी केन्द्र) र (एकीकृत समाजवादी) एकीकृत प्रगतिशील समूहका तर्फबाट ई डा. हरिराम पराजुली र नेपाल मजदुर किसान पार्टी निकट इन्जिनियर समाज नेपालका ई. राजेन्द्रप्रसाद हाडाको समूह प्रतिस्पर्धामा उत्रिएको छ ।

निर्वाचन समिति संयोजक ई. घनश्याम भट्टराईले बिहान ९ बजेदेखि सुरु भएको मतदानमा हालसम्म काठमाडौंमा मात्र २ हजारभन्दा बढी मत खसिसकेको जानकारी दिए । निर्वाचन समितिले २५ बुथमा मतदानको व्यवस्था मिलाएको र काठमाडौंमा मात्र ११ हजारभन्दा बढी मतदाता छन् ।

देशभरका १४ स्थानमा बिहान ९ बजेदेखि सुरु भएको मतदान साँझ ५ बजेसम्म हुनेछ । देशभर २१ हजार ६८० मतदाता छन् । निर्वाचनले २५ सदस्यीय केन्द्रीय समिति चयन गर्नेछ । नयाँ कार्यसमितिको कार्यकाल दुई वर्षको हुने एशोसिएशनले जनाएको छ ।

प्रकाशित मिति: शुक्रबार, फागुन २७, २०७८ १६:२४