प्रहरी अनुसन्धानले खुलाएको रहस्य- ५० रुपैयाँको विवादमा हत्या

A+ A A-

अटो रिक्साको भाडा तिर्ने क्रममा विवाद गरेपछि अटो चालक र उनका साथीले धनगढीमा केही दिनअघि एक भारतीय युवकको हत्या गरेको खुलेको छ ।

धनगढीको वडा नम्बर ५ केराबारीमा एक युवकको हत्या गरी र शव नालीमा फालिएको घटनामा प्रहरीले दुई जनालाई पक्राउ गरेपछि ५० रुपैयाँ भाडाको विवादमा हत्या गरेको रहस्य खुलेको हो ।

भारतको साहजहाँपुरका ४२ वर्षीय कुलदीप गुप्ताको फागुन २३ गते हत्या गरेको अवस्थामा शव फेला परेको थियो । अनुसन्धानका क्रममा प्रहरीले अटो चालक बाजुराको खप्तडछेडेदह- २ का २४ वर्षीय राजेन्द्र बुढा र सोही अटोमा सवार उनका साथी २० वर्षीय भूपेन्द्र बुढालाई पक्राउ गरी पत्रकार सम्मेलनमार्फत सार्वजनिक गरेको छ ।

प्रहरीका अनुसार प्रदेशसभा अगाडिबाट अटोमा बसेका गुप्तासँग उनीहरूको चक्मेली बजार पुगेपछि विवाद भएको थियो । प्रहरीका अनुसार गुप्ताले भाडाको विषयमा विवाद गरी अपशब्द बोलेकोले आवेगमा आई हात हालाहाल र हानाहान भएको उनीहरूले बयान दिएका छन् ।

त्यस क्रममा गुप्ता नालीमा खसेपछि भुपेन्द्रले अटोमा रहेको काठको टुक्राले हिर्काउँदा उनको मृत्यु भएको बयान दिएका छन् । घटनाअघि राजेन्द्र र भुपेन्द्रले मदिरा सेवन गरेको जनाएका छन् भने गुप्ताले पनि मदिरा सेवन गरेको खुलेको छ ।

हेर्नुस् पत्रकार सम्मेलनमा प्रहरीले जारी गरेको प्रेस विज्ञप्तिः

भारतीय नागरिकको हत्यामा संलग्न दुई जना पक्राउ

१. मिति २०७८/११/२३ गते अं. ८:०० बजे जिल्ला कैलाली धनगढी उप–महानगरपालिका वडा नं. ५ केराबारीस्थित सडक किनाराको नालीमा पछि नामथर वतन खुलेको भारत उत्तर प्रदेश सहेजापुर बस्ने वर्ष अं. ४२ को कुलदीप गुप्ताको हत्या गरी शव फालेको भन्ने सूचना प्राप्त हुनासाथ सुदूरपश्चिम प्रदेश प्रहरी कार्यालय र यस कार्यालयको विशेष अनुसन्धान टोलीसहित यस कार्यालयका प्रमुख प्रहरी उपरीक्षक विश्व अधिकारी अपराध अनुसन्धानका लागि घटनास्थल पुगी अनुसन्धान सुरु गरेको ।

२. अनुसन्धानको क्रममा निज कुलदीप गुप्ता विगत केही वर्षदेखि धनगढी उप–महानगरपालिका वडा नं. ४ शिवपुरीधामनजिक डेरा गरी बसेकोमा विगत आठ महिनाअघि सपरिवार भारत गई मिति २०७८/११/२१ गते बिहान निज भारतबाट आई धउनमपा–८ स्थित निजको कान्छो भाई सुमित गुप्तासँग बसी मिति २०७८/११/२२ गते बिहान अं. ९:०० बजेतिर त्यहाँबाट काम खोज्न जान्छु भनी निस्की धउमनपा–१ स्थित Milky Fun Ice Cream का सञ्चालक वंश गोपाल मिश्रालाई भेटी निजबाट Ice Cream को ठेला लिई दिनभरी बिक्री बितरण गरी राति बिक्री गरेको रकम निज मिश्रालाई दिई कमिशन वापत प्राप्त रु. १२४०/- बुझी लिई हिँडेको र तत्पश्चात् निज राति करीब ८:३० बजेतिर वडा नं. १ अदालत रोडस्थित निजको दाजु प्रदिप गुप्ताको घरमा मादक पदार्थ सेवन गरेको अवस्थामा आई केही बेर कुरा गरी त्यहाँबाट हिँडेको पाइएको ।

३. अनुसन्धानकै क्रममा निज कुलदीप गुप्ता २०७८/११/२२ गते राति ९:१२ मिनेटमा धनगढी मेनरोडस्थित कारागार जाने बाटोबाट पश्चिम गइरहेको CCTV footage मा देखिएको । तत्पश्चात् निज पशुपतिटोल जाने बाटोबाट मेनरोडमा निस्की पार्कमोडतिर गएको र त्यसपछि प्रदेशसभाअगाडि निलो रङको अटोको अगाडिको भागमा बसी पूर्वतर्फ आई नैनादेवीसम्म पुगेको CCTV Footage बाट देखिएको ।

४. अनुसन्धानको क्रममा नीलो रङको अटोको खोजी गर्दै जाँदा मिति २०७८/११/२७ गते बिहान ८:०० बजे कुलदीप गुप्ता चढेको से १ ह २८६६ नं. को अटो पहिचान गरी अटो चालक जिल्ला बाजुरा खप्तड छेडेदह गापा- २ बस्ने वर्ष २४ को राजेन्द्र बुढालाई सोधपुछ गर्दा उक्त राति निज र निजको साथी ऐ. वतनको वर्ष २० को भुपेन्द्र बुढाले रुवस होटलअगाडिको एउटा पसलमा मदिरा सेवन गरी जाई स्थित राजेन्द्र बुढाको डेरामा जानको लागि हिँडेकोमा पार्कमोडस्थित प्रदेशसभा अगाडि निज कुलदीपलाई भेटाई निजले जाली जाने भनेपछि निजलाई समेत अगाडि बसाई नैनादेवी मन्दिर हुँदै चक्मेली बजारबाट शिवनगरको बाटो हुँदै अगाडि बढेको र सोही क्रममा निजहरूबीच भाडाको बिषयमा विवाद हुँदा शिवनगरबाट जाई जाने सडकको कल्वट नजिक पुगेपछि कुलदीप गुप्ताले 'नेपाली लोग' भनेर गाली गलौज गर्न थालेपछि निजहरूबीच हात हालाहाल हानाहान भएको र निज गुप्ता सडकछेउ नालीमा खसेपछि भुपेन्द्र बुढाले अटोमा रहेको काठको टुक्रा प्रहार गरी निजको हत्या गरेको ।

५. मादक पदार्थ सेवन गरेको अवस्थामा तत्कालको रीस आवेग थाम्न नसकी कुलदीपको हत्या गरेको निजहरूले स्वीकार गरेको ।

६. निज दुवैलाई पक्राउ गरी ज्यानसम्बन्धी कसुरमा थप अनुसन्धान भइरहेको ।

(वेद प्रकाश जोशी)
प्रहरी नायब उपरीक्षक
तथा प्रवक्ता

प्रकाशित मिति: शुक्रबार, फागुन २७, २०७८ १५:००