एमालेनिकट पत्रकारलाई ओलीको सुझाव: अनावश्यक ट्वीट र फेसबुकमा स्टाटस नलेख्नुस्

एमालेनिकट पत्रकारलाई ओलीको सुझाव: अनावश्यक ट्वीट र फेसबुकमा स्टाटस नलेख्नुस्

A+ A A-

प्रमुख प्रतिपक्षी दल नेकपा एमालेका अध्यक्ष केपी शर्मा ओलीले अनावश्यक ट्वीट र फेसबुकमा स्टाटस नलेख्ने आफूनिकट पत्रकारलाई सुझाव दिएका छन् ।

एमालेनिकट पत्रकारको संगठन प्रेस चौतारी नेपालको नवौँ राष्ट्रिय महाधिवेशनलाई शुक्रबार पोखरामा सम्बोधन गर्दै अध्यक्ष ओलीले जिम्मेवार पत्रकारिता गर्न देशभरबाट सहभागी एमालेनिकट पत्रकारलाई सुझाए । `अनावश्यक ट्वीट नहोस्, स्टाटस लेख्दा पनि आवश्यकमात्रै होस्,´ ओलीले भने, `हामी पानी खाँदा पनि स्टाटस हाल्न थालेका छौँ । हो कि होइन ?´

पत्रकारले अधिकार लिए पनि कर्तव्यको पूर्ण पालना नगरेको भन्दै उनले गुनासो पोखे । थरीथरीका पत्रकारिता आजको समस्या भएको अध्यक्ष ओलीको भनाइ थियो । `अधिकारको सम्बन्धमा संविधानले काफी कुरा दिएको छ । स्वार्थी, गैरजिम्मेवार र पित पत्रकारिता होइन । देश, जनता, सत्य, विकासबारे पत्रकारिता गर्नु आजको आवश्यकता हो,´ उनले भने ।

उनले जीवन छोटो भएकाले सकारात्मक र परिणाममुखी बनाउन सुझाव दिए । `जीवन भने बाँचेदेखि मर्दासम्मको समय हो । यो छोटो छ ,´ उनले थपे, `हामी एउटा पहाड, खोला, रुख जति पनि बाँच्दैनौँ । कति छोटो छ जिन्दगी । त्यसैले सकारात्मक र परिणाममुखी ढंगले प्रयोग गरौं । हाम्रो समाचार, स्टाटस, युट्युबले अरुको समय बर्बाद नगरोस् ।´

अध्यक्ष ओलीले गठबन्धनलाई `गोरुबाट ब्याएको बाच्छा´को संज्ञा दिए । नेपालको सर्वोच्च अदालतमा `गोरु ब्याएको´ भन्दै कटाक्ष गरेका हुन् । `गोरु ब्याउँदैन भन्थे । २०५२ सालतिरै यो भनिएको थियो । हाम्रो सर्वोच्च अदालतमा गोरु ब्यायो । ब्याएन मात्रै, अहिले पाँच बाच्छा पायो सर्वोच्चबाट,´ ओलीले भने ।