रैथाने खाद्यान्न बिक्रीवितरण गर्दै आजु फुड्स

A+ A A-

स्वास्थ्यमा प्रतिकूल असर पार्ने चर्को विषादी प्रयोग गरिएका खाद्यान्नहरू उपभोग गर्न अहिले शहरवासीहरू विवश छन् । यही परिवेशमा आजु एग्रो प्रोडक्ट्स एण्ड सप्लायर्स प्रालिले नेपालका विभिन्न स्थानका ग्रामीण क्षेत्रमा उत्पादित रैथाने खाद्यान्न बिक्रीवितरण आरम्भ गरेको छ ।

विशेष गरी कर्णाली अञ्चलमा उत्पादित रैथाने खाद्यान्न काठमाडौंका उपभोक्तासम्म पुर्‍याउन आजु एग्रो प्रोडक्ट्सले आजु फुड्सको ब्राण्डमा खाद्य सामग्री बेच्न बालाजु चोक र स्वयम्भु चोकमा आउटलेट सञ्चालनमा ल्याएको छ । एक महिनाभित्रै ललितपुरको भनिमण्डलमा समेत आउटलेट सञ्चालनमा आउने आजु फुड्सका सञ्चालक यादव देवकोटाले जानकारी दिए ।

यसैगरी, दरबारमार्ग/कमलादीमा रहेको ब्लूबर्ड डिपार्टमेन्टल स्टोरमा पनि आजु फुड्सको ब्राण्डका सामग्री खरिद गर्ने व्यवस्था मिलाउन दुवै पक्षले तयारी अगाडि बढाएको बताइएको छ ।

जुम्लाबाट ल्याइएको सिमीको दाल, बहुचर्चित मार्सी चामल, बोडी, कागुनो, चिनो, फापर, जौ कालीकोटको सेतो मकै, जाजरकोटको भटमास, मस्याङ, गहत, सल्यानको मासको दाल, पाँचमुखे घ्यु पिँडालु, अदुवा, दैलेखको अप्रशोधित मह, रोल्पाको भाङ, म्याग्दीको सिलाम, सिस्नोको धुलो, मुस्ताङको जिम्बु, पोखरेली जेठो बुढो चामल, कपिलवस्तुको कालानमक चामल, गोरखाको इन्द्रबेली धानको चामल, भैँसीको घ्यु, बेसार, सातु, रामेछापको भटमास, सर्लाहीको बेसार, रहरको दाल, रुपन्देहीको आलस, खोकनाको कोलमा पेलेको तोरीको तेल, इलामको गाईको घ्यु, सोलुको सेतो सिमीलगायतका रैथाने खाद्यान्न बिक्रीवितरण गरिरहेको आजु फुड्सले जानकारी दिएको छ ।

बालाजु चोकको ज्योति विकास बैंकअगाडिको घरमा आजु फुड्सको बिक्री केन्द्र रहेको छ भने स्वयम्भु चोकको होटल नयनको भुइँतल्लामा यसको बिक्रीकक्ष छ । मुख्य गोदाम टेकु शुक्रपथ, प्रहरी बिटनजिक रहेको आजु फुड्सले स्थानीय किसानबाट सिधै सामान खरिद गरेर उपभोक्तामाझ पुर्‍याउन थोक र खुद्रा दुवै तवरले खाद्यान्न बिक्रीवितरण आरम्भ गरेको हो ।

किसानले उत्पादन गरेको खाद्यान्न गोदाममा ल्याएर ग्रेडिङ, प्याकेजिङ र ब्रान्डिङ गरेर उपभोक्तासम्म पुर्‍याउन विभिन्न व्यावसायिक उद्यममा संलग्न आजु समूहले आजु एग्रो प्रोडक्ट्स एण्ड सप्लायर्स सञ्चालनमा ल्याएको बताएको छ ।

गोरखा र धादिङमा उत्पादनमूलक कार्यसमेत अगाडि बढाउने गरी जमिन लिजमा लिएको आजु फुड्सले चर्को मूल्य तिरेर पनि स्वस्थकर खाद्यान्न नपाउने आजको परिवेशमा स्वस्थ, ताजा र उच्च गुणस्तरको खाद्यान्न उपलब्ध गराउने प्रतिबद्धता जनाएको छ ।

प्रकाशित मिति: शुक्रबार, फागुन २७, २०७८ १४:४४