संघीयता बलियो बनाउन एकताबद्ध प्रयास आवश्यकः मुख्यमन्त्री पोखरेल

A+ A A-

गण्डकी प्रदेशका मुख्यमन्त्री कृष्णचन्द्र नेपाली पोखरेलले मुलुकको राजनीतिक स्थिरतासँगै संघीयतालाई बलियो बनाउन एकताबद्ध प्रयास हुनुपर्ने बताएका छन् ।

गण्डकी प्रेदशसभाको आजदेखि सुरु भएको नवौँ अधिवेशनलाई सम्बोधन गर्दै उनले प्रदेश सरकार जनताले संघीयताको महसुस गर्ने गरी विकास निर्माण कार्य अघि बढेको बताए ।

प्रदेश सरकार अस्तित्वमा आएको चार वर्ष बितिसक्दासमेत संघले कतिपय कानुन नबनाइदिएका कारण काम अगाडि बढ्न नसकेको बताउँदै पोखरेलले निजामती ऐन नआउँदा राष्ट्रसेवक कर्मचारीको वृत्तिविकास हुन नसकेको उल्लेख गरे ।

लोककल्याणकारी राज्यको अवधारणानुसार नागरिकलाई अधिक सेवा र सुविधा दिन प्रदेश सरकार लागिपरेको बताउँलै पोखरेलले प्रदेशभित्रका नागरिकलाई निःशुल्क रगत तथा रगतजन्य सेवा उपलब्ध गराउने व्यवस्था मिलाइएको जानकारी दिए ।

'जनयुद्ध र जनआन्दोलनका घाइते, शहीद, बेपत्ता र अपाङ्गता भएका परिवारका सदस्यलाई प्रदेश सरकार मातहतका अस्पतालबाट निःशुल्क स्वास्थ्य सेवा उपलब्ध गराउने व्यवस्था भएको छ,' पोखरेलले भने, 'स्वास्थ्य सेवालाई गुणस्तरीय र सर्वसुलभ बनाउने उद्देश्यले प्रदेश स्वास्थ्य नीतिसमेत जारी गरिएको छ ।'

कोभिड–१९ का कारण निधन भएका परिवारलाई प्रतिपरिवार ५० हजार र अभिभावक गुमाएका बालबालिकाको हकमा मासिक ५ हजारका दरले राहत तथा मानवीय सहायता उपलब्ध गराइएको उनको भनाइ छ ।

नीति तथा कार्यक्रम र बजेटमा उल्लेख भएअनुसार प्रदेशलाई सडक मानवमुक्त घोषणा गरी उद्धार र संरक्षणका कार्य भइरहेको बताउँदै उनले मानव सेवा आश्रममा आश्रित प्रतिव्यक्तिलाई प्रदेश सरकारले मासिक ३ हजारका दरले सहयोग उपलब्ध गराउँदै आएको जानकारी दिए ।

गण्डकी प्रदेशको पहिलो समृद्धिको आधार पर्यटन क्षेत्रको प्रवर्द्धनका लागि प्रदेश सरकारले पर्यटन विकासको सम्भाव्यता र अन्तर्राष्ट्रियस्तरमा प्रचारप्रसारका लागि नेपालस्थित विभिन्न विदेशी राष्ट्रका राजदूत तथा अन्तर्राष्ट्रिय विकास साझेदार संस्थाका प्रमुख तथा प्रतिनिधिलाई आमन्त्रण गरिएको उनले जानकारी दिए ।

सङ्घीयताको प्रभावकारी कार्यान्वयनसँगै अस्तित्वमा आएका प्रदेश सरकारबीच अनुभव आदानप्रदान र पर्यटन प्रवर्द्धनका लागि अन्तरप्रदेश सद्भावना भ्रमण कार्यक्रम सञ्चालन गरिएको जानकारी दिँदै मुख्यमन्त्री पोखरेलले भ्रमणले प्रदेशबीच आर्थिक, सामाजिक र सांस्कृतिक सहकार्यका सम्भावनालाई बढाएको बताए ।

चालु अधिवेशनमा विभिन्न महत्वपूर्ण ऐन ल्याउने तयारी गरिएको पोखरेलको भनाइ छ । प्रमुख प्रतिपक्षी दलबाटसमेत महत्वपूर्ण सहयोगको अपेक्षा गरेको उनले बताए । पोखरा क्षेत्रीय अन्तर्राष्ट्रिय विमानस्थल सञ्चालन सहजीकरण समितिले विमानस्थल शीघ्र सञ्चालनका लागि आवश्यक समन्वय र सहजीकरण गरिरहेको चचौ गर्दै उनले काहुँखोलादेखि विमानस्थल पुग्ने भलपानी व्यवस्थापनको काम अघि बढेको र विजयपुर खोलाको कटान रोक्नका लागि सङ्घ सरकारले काम थालिसकेको बताए ।

गण्डकी प्रदेशसभामा प्रमुख प्रतिपक्षी दलका नेता एवं संस्थापक मुख्यमन्त्री पृथ्वीसुब्बा गुरुङले जनताका आधारभूत आवश्यकतासँग जोडिएका विकास निर्माणका कामले निरन्तरता पाउनुपर्नेमा जोड दिए । अघिल्लो सरकारले सुरु गरेको ‘एक घर, एक धारा’, उज्यालो प्रदेश, वातावरणमैत्री कृषि नमुना गाउँ, शिक्षा, स्वास्थ्य, सडक जस्ता विभिन्न विकास निर्माण योजनाको बजेट कटौती गर्दा समृद्धिको आधारले गति लिन नसकेको उनको भनाइ थियो ।

प्रकाशित मिति: बिहीबार, फागुन २६, २०७८ २०:३५