एमाले पस्दै करिश्मा, भन्छिन्- केपी बासँग धेरै अगाडिदेखि कुरा भइरहेको थियो

A+ A A-

अभिनेत्री करिश्मा मानन्धर नेकपा एमाले प्रवेश गर्ने तयारीमा छिन् । औपचारिक कार्यक्रममार्फत छिट्टै पार्टी प्रवेश गर्ने उनले बताइन् । शिलापत्रसँग कुरा गर्दै करिश्माले भनिन्, ‘छिट्टै पार्टी प्रवेश गर्दैछु । कहिले भनेर पार्टीले तय गर्छ । पार्टी अध्यक्ष केपी ओलीसँग यसबारे कुरा भइरहेको छ ।’

केही महिनाअघि करिश्माले एमाले अध्यक्ष ओलीसँग भेटघाट गरेको फोटो सामाजिक सञ्जालमा राखेकी थिइन् । पटक–पटक उनीहरूबीच फोनवार्ता भइरहेको कुरा उनले सामाजिक सञ्जालमार्फत जानकारी गराइरहेकी थिइन् ।

करिश्माले दुई वर्षअघि बाबुराम भट्टराई नेतृत्वको तत्कालीन नयाँ शक्ति पार्टी परित्याग गरेकी थिइन् । त्यसपछि उनी राजनीतिबाट निराश भएको भन्दै कुनै पार्टीमा आबद्ध थिइनन् । एमालेमार्फत् पुनः राजनीतिमा सक्रिय हुन थालेकी करिश्मासँग शिलापत्रले गरेको कुराकानी:

पार्टी प्रवेश गर्ने कुरा साँचो हो ?

हो, साँचो हो ।

उसो भए कहिले प्रवेश गर्नुहुन्छ ?

कहिले भन्ने कुरा पार्टीले निर्णय गर्छ । कुनै औपचारिक कार्यक्रममार्फत प्रवेश गर्दैछु ।

यसअघि लगतार पार्टी अध्यक्ष केपी ओलीसँग भेटघाट भइरहेको थियो । पार्टी प्रवेशबारे निर्णयचाहिँ कहिले गर्नुभयो ?

मेरो केपी बासँग धेरै अगाडिदेखि नै कुरा भइरहेको थियो । म पहिले नयाँ शक्ति पार्टीमा सक्रिय थिएँ । पछि पार्टी परित्याग गरेँ । लामो समय खाली बसेँ । केपी बाले पार्टीमा आउनका लागि उहाँले मलाई प्रस्ताव गरिरहनुभएको थियो । मलाई पनि राजनीतिमा पुनः सक्रिय भएर काम गर्ने चाहना थियो । मैले धेरै सोचविचार गरेर यो निर्णय गरेकी हुँ ।

एमाले पार्टी नै किन रोज्नुभयो त ?

यो मेरो मनले गरेको निर्णय हो । मेरो करिअर पारिवारिक सम्बन्धलगायत हरेक कुरामा म सही छु । मैले यो पार्टीलाई लामो समयदेखि नियालेँ पनि । अरु पार्टीलाई पनि नियालेको छु । उसो त म केपी ओलीबाट धेरै प्रभावित छु । व्यक्तिगत रूपमा पनि म उहाँबाट प्रभावित छु । उहाँलाई धेरै कुराको ज्ञान छ । उहाँले मलाई पनि धेरै कुरामा सम्झाउनुहुन्छ अभिभावक भएर । त्यस कारण मैले यो पार्टीमा मेरो भविष्य देखेको छु ।

चुनाव नजिकिँदै छ । तपाईंको यसअघिको राजनीतिक अनुभव पनि सुखद् छैन । सेलेब्रिटी अनुहारलाई पार्टीले प्रयोग पो गर्न खोजेको हो कि ?

सुखद त सुरुमा कुनै पनि अनुभव सुखद हुँदैन । सिनेमामा पनि सुरुवाती अनुभव सुखद थिएनन् । तर, पछि सुखद परिस्थिति आए । सुखद छैन भने सुखद बनाउँदै लैजाने हो । अनि पार्टीले प्रयोग गर्दैन भन्नेमा ढुक्क छु । मलाई पार्टीले साथ र सहयोग नै गर्नेछ ।

फेरि केही समयपछि पार्टी छाड्नुपर्ने अवस्था आयो भने ?

त्यस्तो अवस्था आउँदैन । मैले धेरै सोचेर गरेको निर्णय हो । अब त्यस्तो हुन्न ।

उसो भए पार्टीमा तपाईंको भूमिका के हुन्छ त ?

भूमिकाको विषयमा अहिले कुरा भएको छैन । उपयुक्त भूमिका पाउँछु भन्ने नै आशा छ । मेरो पर्फमेन्स हेरेर पार्टीले दिन्छ । एमालेलाई अग्रपङ्क्तिमा सार्ने थुप्रै महिला नेतृ हुनुहुन्छ । उहाँले मेरो महत्त्व बुझेर नै दिनुहोला । अहिलेलाई यत्ति भनेँ ।

प्रकाशित मिति: बिहीबार, फागुन २६, २०७८ १५:००