साउदीका दुई जेलबाट ३० जना नेपाली कामदारहरूलाई छुटाएर स्वदेश फर्काइयो

A+ A A-

साउदीको जेलमा परेका ३० नेपाली कामदारलाई रियादस्थित नेपाली दूतावासले छुटाएर स्वदेश पठाएको छ । उनीहरूलाई गैरकानुनी रूपमा काम गर्दै बसेका कारण साउदी प्रहरीले पक्राउ गरेको दूतावासले जनाएको छ ।

साउदीको अलहासा जेलमा थुनिएका २७ र खोबरमा रहेका तीन जना कामदार दूतावासको पहलमा थुनाबाट छुटेका थिए । साउदी सरकारसँगको समन्वयमा एकै पटक यति ठूलो संख्यामा नेपालीलाई जेलबाट छुटाएर स्वदेश फर्काइएको दूतावासका स्थानीय जनसम्पर्क अधिकारी नारायण पासवानले जानकारी दिए । कम्पनीको उजुरीका आधारमा पक्राउ परेका उनीहरू विगत तीन महिनादेखि जेलमा रहेको उनको भनाइ छ ।

दूतावासका अनुसार जेलबाट छुटेर स्वदेश फर्किनेमाा शीतल प्रसाद मुखिया, प्रकाश सहनी, कुशल नोनिया, राम सेवक मुखिया, जौतिक माली, सुरेश महतो, दुर्गाबहादुर बिके, राम उमेश शाह, मुकेश शाह, रामनाथ प्यासी र वसन्त सुनार रहेका छन् ।

यस्तै सुदन दराई, रामकुमार यादव, आशाराम मुखिया, ललन राय अमट, अमिर धिमाल, विक्रम सुनार, राजेन्द्र भण्डारी, राम पुकार मुखिया, डम्बर यादव, मनोज कुमार दास, गर्भु ठाकुर, निरन खत्बे, मजिबुल नदाफ, सुरेश यादव, विजय नेपाली, हरिजन कौलेश्वर, राजकिशोर पासवान, पोमबहादुर सारु मगर र वीरवल दाहाललाई जेल मुक्त गराई स्वदेश फर्काइएको दूतावासले जनाएको छ ।

उनीहरूलाई एक सातायता विभिन्न चरणमा जजिरा एयरलाइन्सको उडानमार्फत स्वदेश फर्काइएको दूतावासले जनाएको छ । स्वदेश फर्किनेहरू सबैलाई साउदी सरकारले हवाई टिकट उपलब्ध गराएको र कागतजात दूतावासले ब्यहोरेको हो ।