डेढ दशक पुरानो फाइल पल्टाउँदा प्रहरीले जब हत्या आरोपित बहराइनमा लुकेको चाल पायो

डेढ दशक पुरानो फाइल पल्टाउँदा प्रहरीले जब हत्या आरोपित बहराइनमा लुकेको चाल पायो

A+ A A-

१३ वर्षअघि बहराइन पुगेका कास्कीका अशोक गुरूङ त्यसपछि नेपाल फर्केका थिएनन् । बहराइनमा सेक्युरिटी गार्ड रहेका अशोक मंगलबार हत्कडी लगाएर नेपाल ल्याइएका छन् । हत्या आरोपित ४६ वर्षीय अशोकलाई अन्तर्राष्ट्रिय प्रहरी संगठन (इन्टरपोल)को सहयोगमा कास्की प्रहरीले मंगलबार नेपाल ल्याएको हो ।

कास्की प्रहरीको कमाण्ड सम्हालेपछि प्रहरी उपरीक्षक (एसपी) रमेश थापाले पुराना घटनाको फाइल खोलेका थिए । पुराना फाइल खोतल्दा घटनाको १६ वर्षपछि पोखरा, ३२ सातमुहाने (तत्कालीन लेखनाथ नगरपालिका, १३) का अशोक प्रहरीको फन्दामा परेका हुन् । गुरूङले २०६३ सालमा धरानका २० वर्षीय रोजन राईको हत्या गरेको आरोप छ ।

अशोक एक पुसमा बहराइनमा पक्राउ परेका हुन् । अशोकलाई मंगलबार दिउँसो नै जहाजमा पोखरा ल्याइएको थियो । हत्या आरोपित अशोकमाथि जिल्ला अदालतबाट बुधबार सात दिनको म्याद थपेर अनुसन्धान थालिएको कास्की प्रहरीका सूचना अधिकारी डीएसपी सुन्दर तिवारीले जानकारी दिए ।

यस्तो थियो घटना

सुनसरीको धरान घर भई पोखरामा काम गर्ने रोजनलाई २०६३ साल २९ वैशाखमा अशोकले मरणासन्न हुने गरी कुटेका थिए । कास्कीको तत्कालीन लेखनाथ नगरपालिका, १३ सातमुहानेमा अशोकले कुटपिट गरेको तीन दिनपछि रोजनको मृत्यु भएको थियो ।

सातमुहानेकै खुदीखोलामा ग्याबिन जाली भर्ने, मजदुरी गर्ने रोजनलाई उनले मरणासन्न हुनेगरी कुटपिट गरेर भागेका थिए । अशोकले त्यतिबेला कटुसको दाउराले रोजनको टाउकोमा हानेको प्रहरीले बताएको छ । रोजनको समूहले होहल्ला गरेको र आफूले नगर्न भन्दा झगडा सुरू भएको अशोकले प्रहरीलाई बताएका छन् ।

रोजनको उपचारकै क्रममा २०६३ साल २ जेठमा पश्चिमाञ्चल क्षेत्रीय अस्पतालमा मृत्यु भएको थियो । गम्भीर घाइते बनेका रोजनको दायाँ हातको कुम र पाखुरामा छाला खुइलिएको र घस्रिएको चोट देखिएको प्रहरी मुचुल्कामा उल्लेख छ ।

आरोपित अशोकलाई पक्राउ गर्न जिल्ला अदालत कास्कीबाट गत ६ असोजमा प्रहरीले अनुमति लिएको थियो । अनुमति लिएको पाँच दिनपछि १२ असोजमा कास्की प्रहरीले १२ असोजमा इन्टरपोलको नेपालस्थित कार्यालयमा रेड नोटिस जारी गर्न प्रक्रिया थाल्यो । नेपालस्थित कार्यालयमा निवेदन दिएको साढे दुई महिनापछि २७ मंसिरमा इन्टरपोलले अशोकको नाममा रेड नोटिस निकालेको थियो । त्यसको तीन दिनमै एक पुसमा बहराइन प्रहरीले अशोकलाई पक्राउ गरेर तीन महिनापछि मंगलबार नेपाल डिपोर्ट गरेको हो ।

प्रहरीले पनि उनको मुद्दामा चासो दिएन र पक्राउ प्रक्रिया अघि बढेन । अशोक आफैँ प्रहरीसँग भागिरहेका थिए । २०६३ सालको घटनापछि अशोक काठमाडौं पुगेका थिए ।

तीन महिना उनी काठमाडौंमा होटलमा लुकेर बसेका थिए । प्रहरीका अनुसार कुनै पनि होटलमा उनी एक हप्ताभन्दा बढी बस्दैनथे । काठमाडौं गएपछि बीचमा पोखरा आएका थिए तर प्रहरीले उनलाई पक्रन सकेन ।

काठमाडौंमा तीन महिना लुकेका उनी भारत हुँदै कुवेत गएको प्रहरीको अनुसन्धानले देखाएको छ । ‘आर्थिक समस्या भएपछि तीन महिना काठमाडौं बसेर एक दिन राति दुई बजे पोखरा आएको देखिएको छ । यहाँबाट १० हजार रुपैयाँ खर्च लिएर दिल्ली हुँदै कुवेत गए,’ डीएसपी तिवारीले भने, ‘पछि फर्केर काठमाडौंमा ५–६ महिना डेरा गरेर बसे । तर, पोखरा फर्कने आँट गरेनन् ।’ कुवेतबाट काठमाडौँ फर्केपछि उनी सन् २००९ मा बहराइन गएका थिए ।

प्रहरीको सम्पर्कमा छैन परिवार

घटनाको १६ वर्षसम्म मृतक रोजनको परिवार र आफन्त कोही पनि प्रहरीको सम्पर्कमा छैनन् ।
प्रहरीले सुनसरी जिल्ला प्रहरी कार्यालयसँग सहकार्य गरेर रोजनको परिवारलाई खोजी थालेको छ । त्यतिबेलाको मिसिलमा उल्लेख भएको ठेगानाका आधारमा प्रहरीले सम्बन्धित जिल्लाको प्रहरीसँग सहकार्य गरिरहेको एसपी थापाले बताए । ‘उहाँको परिवारसँग सम्पर्कको प्रयास गरेका छौँ । तर, सम्पर्कमा नभएकाले प्रहरी प्रतिवेदनकै आधारमा मुद्दा अघि बढाएका छौँ,’ एसपी थापाले भने ।

रोजनसँग काम गर्नेको पनि खोजी प्रहरीले गरिरहेको छ । मजदुरी गर्न बाहिरबाट आएकाले पहिचान गरेर सम्पर्क गर्न कठिन भएको प्रहरीको भनाइ छ । ‘जतिसुकै लामो अवधि भए पनि कानुनी दायरामा आउनुपर्छ । पीडितको न्यायका लागि झकझकाउने कोही नभए पनि राज्य छ भन्ने भयो,’ एसपी थापा भन्छन्, ‘अपराध गरेर कुनै सिमाना पार गर्दैमा उन्मुक्ति पाउँदै भन्ने उदाहरण बनेको छ ।’

कास्की प्रहरी अन्य ‘अशोक’हरूको खोजीमा जुटेको छ । पुराना मुद्दालाई अनुसन्धान गरेर कानुनको दायरामा ल्याउन आफूहरूले पहल थालेको एसपी थापाले बताए । उनकाअनुसार अर्को एउटा पुरानो आपराधिक घटनाका प्रतिवादीलाई पक्राउ गर्न इन्टरपोलसँग सहकार्य भइरहेको छ ।

प्रकाशित मिति: बुधबार, फागुन २५, २०७८ १९:३८