पल शाह प्रकरणः नाबालिग गायिकाबारे जथाभावी बाेल्ने हरि उदासीसहित युट्युबर चिलुवाल पक्राउ

पल शाह प्रकरणः नाबालिग गायिकाबारे जथाभावी बाेल्ने हरि उदासीसहित युट्युबर चिलुवाल पक्राउ

आफूलाई कलाकार भन्ने हरि उदासीले कलाकार पल शाहको प्रकरणमा पीडित भनिएकी नाबालिगकाे चरित्र हुनेगरी अभिव्यक्ति दिँदै आएका थिए ।

A+ A A-

अदालतमा विचाराधीन मुद्दाबारे युट्युब च्यानलमा जथाभावी बोल्दै हिँड्ने एक 'कलाकार' र भिडियाे प्रसारण गर्ने युट्युबर पक्राउ परेका छन् । नागार्जुन नगरपालिका-८ भीमढुंगा बस्ने ५३ वर्षीय हरि उदासी भन्ने हरि परियार र तारकेश्वर नगरपालिका-४ शेषमती बस्ने लमजुङ राईनास नगरपालिका स्थायी ठेगाना भएका २७ वर्षीय निशान चिलुवाललाई बुधबार नियन्त्रणमा लिइएकाे प्रहरी प्रधान कार्यालय साइबर ब्युरोका प्रवक्ता नविन्द अर्यालले जानकारी दिए ।

उनीहरूले युट्युब च्यानलमार्फत गम्भीर प्रकृतिको अपराध अनुसन्धानको प्रक्रियालाई प्रभावित गर्नेगरी पीडितको मानमर्दन र चरित्र हत्या गरेकाे अर्यालले बताए ।

नेपाल मिडिया नामको युट्युब च्यानलमार्फत भ्रामक समाचार सम्प्रेषण गरेको तथा अनर्गल वक्तव्यबाजी गरेको आरोप उनीहरूविरुद्ध छ । अदालतको आदेश लिएर उनीहरूलाई पक्राउ गरेको प्रहरीले अनुसन्धानका लागि सात दिन म्याद थपेर दुवै जनालाई दरबारमार्गस्थित हिरासतमा राखेको छ । परियार र चिलवालविरुद्ध विद्युतीय कारोबार ऐन २०६३ को परिच्छेद ९ को दफा ४७ अनुसार मुद्दा चलाइने अर्यालले बताए ।

आफूलाई कलाकार भन्ने हरि उदासीले कलाकार पल शाहको प्रकरणमा पीडितको चरित्र हुनेगरी अभिव्यक्ति दिँदै आएका थिए । उनले बलात्कार पीडित भनिएकी बालिकालाई विभिन्न आरोप लगाउँदै बाेलेका भिडियाे अहिले पनि युट्युबमा थुप्रै भेटिन्छन् ।युट्युबर चिलवालले नेपाली रियाक्सन नामक आफ्नो युट्युब च्यानलमार्फत अदालतमा विचाराधीन मुद्दाबारे निरन्तर भिडियाे बनाइरहेका थिए । साइबर ब्युरोका प्रवक्ता अर्यालले अरुको चरित्र हत्या गरिएका र भ्रामक सूचनासहितका भिडियोलाई फेसबुक, टिकटकजस्ता माध्यममा नफैलाउन सबैलाई आग्रह पनि गरे ।