प्रचण्डको गठबन्धन ‘मोडालिटी’ले प्रवेश पाएन, अझै अन्योलमा कांग्रेस

A+ A A-

२० फागुनमा माओवादी केन्द्रको केन्द्रीय समिति बैठकमा अध्यक्ष पुष्पकमल दाहाल प्रचण्डले स्थानीय तहको चुनावी गठबन्धनको मोडालिटीबारे बताएका थिए ।

सत्ता गठबन्धनमा रहेका दलहरू कांग्रेस, माओवादी केन्द्र, जसपा र एकीकृत समाजवादीबीच स्थानीय चुनावको सम्भावित गठबन्धनबारे बैठकमा प्रचण्डले मोडालिटी बताएको भए पनि गठबन्धनमा थप छलफल भने भएको छैन । २४ फागुनमा कांग्रेसले ७७ जिल्लामा पठाउने केन्द्रीय प्रतिनिधिलाई सभापति शेरबहादुर देउवाले सत्ता गठबन्धनको चित्त दुख्ने गरी नबोल्न निर्देशनसम्म दिएर गठबन्धनको संकेतसम्म गरे तर विस्तृत बताउन चाहेनन् ।

एकीकृत समाजवादीका अध्यक्ष माधव नेपालले २५ फागुनको केन्द्रीय कमिटीको बैठकमा मिलेर जाने सहमति जुटेको बताएका छन् । यद्यपि नेपालले आशंका चाहिँ गरेका छन् कि सबै ठाउँमा गठबन्धन नहुन सक्छ । त्यसैले नेपालले सबै पालिकामा गठबन्धन नभए पनि पारस्परिक हितका आधारमा गठबन्धन हुने बताएका छन् ।

प्रचण्ड र माधव नेपालले प्रस्टैसँग कांग्रेसको साथमा आगामी निर्वाचन ‘फेस’ गर्ने बताइरहेका बेला कांग्रेसमा दुई धार देखिएको छ । यसबारे केन्द्रीय कमिटी बैठकमा झलनाथ खनालले प्रस्ट पारेका छन् । खनालले कांग्रेस महामन्त्री गगन थापाहरूको सन्दर्भ निकालेर कांग्रेसभित्र एकल निर्वाचनमा जानुपर्ने मत रहेको बताएका थिए ।

गठबन्धनको मोडालिटी

कांग्रेसको नेतृत्वमा मिलेसम्म गठबन्धन गर्ने प्रयास भइरहेको छ । गठबन्धनको मोडालिटी कस्तो हुन्छ भन्ने चाहिँ अहिलेसम्म प्रस्ट भइसकेको छैन । कांग्रेसभित्र उपसभापति धनराज गुरुङ, महामन्त्री गगन थापा र केन्द्रीय सदस्य शेखर कोइरालाहरूको मत बलियो बनेको अवस्थामा गठबन्धन नबन्ने खतरा बढ्ता छ ।

त्यस्तो अवस्थामा कांग्रेस, एमाले र माओवादी-एकीकृत समाजवादी गरी तीनवटा समूह बन्न सक्छ । तर, सभापति शेरबहादुर देउवाले गठबन्धन गर्ने संकेतमात्र दिएका छैनन्, जिल्ला निस्कन लागेका केन्द्रीय प्रतिनिधिलाई गठबन्धनमा रहेका दलहरूको चित्त नदुखाउन सुझाव दिइसकेका छन् ।

प्रचण्डले २० फागुनमा केन्द्रीय सदस्यलाई बताएको मोडालिटीमा चाहिँ अहिले जुनजुन पार्टीले पालिका प्रमुख जितेका छन्, त्यसैलाई निरन्तरता दिने र एमालेसहित विपक्षी दलले जितेका पालिकामा भने ०७४ को चुनावमा दोस्रो भएको वा उम्मेदवार राम्रो भएको दललाई प्राथमिकतामा राखेर गठबन्धन गर्ने भन्ने थियो ।

त्यसमा नयाँ बनेको दल एकीकृत समाजवादीलाई कसरी व्यवस्थापन गर्ने भन्नेचाहिँ समस्या हुन्छ । स्थानीय जनप्रतिनिधिको ठूलो संख्या एमालेबाट विभाजित एकीकृत समाजवादीमा समाहित भएका छैनन् । गत निर्वाचनमा एमाले सबैभन्दा ठूलो दल भएको थियो । एमालेले स्थानीय तहमा ७५३ मध्ये २९४ वटा पालिकाको प्रमुख जितेको थियो । त्यसैगरी, कांग्रेसले २६६ पालिका र माओवादीले १०६ वटा पालिका प्रमुख जितेको थियो ।

अहिलेसम्म एमाले छोडेर एकीकृत समाजवादीमा कतिवटा पालिकाका प्रमुख समाहित भए भन्ने यकिन संख्या आइसकेको छैन । तुलनात्मक रूपमा स्थानीय तहमा माधव नेपालको नयाँ पार्टीले एमालेलाई १० प्रतिशतजति मात्रै प्रभाव पारेको अनुमान छ । प्रचण्डको प्रस्तावित मोडालिटीबारे छलफलका लागि अन्य दलभित्र औपचारिक प्रवेश भने पाइसकेको छैन । एकीकृत समाजवादीका उपमहासचिव गंगालाल तुलाधरले गठबन्धन गरेर चुनावमा जाने विषयमा सहमतिजस्तो भए पनि औपचारिक रूपमा छलफल भने भइनसकेको बताउँछन् ।

शिलापत्रसँग कुराकानी गर्दै तुलाधरले गठबन्धन गर्नेबारेमा छलफल भए पनि मोडालिटीका विषयमा छलफल नभएको बताए । त्यसो त, कांग्रेसभित्र पनि गठबन्धन र त्यसको मोडालिटीबारेमा छलफल भएको छैन । सामान्यत: उपसभापति पूर्णबहादुर खड्का, नेताहरू रामचन्द्र पौडेल, कृष्ण सिटौला र विजय गच्छदारलगायतका गठबन्धनको पक्षमा देखिन्छन् ।

यद्यपि उनीहरूले पनि मोडालिटी भने बताउन सकेका छैनन् । उपसभापति खड्काले स्थानीय चुनाव केन्द्रित छलफल नभएको बताए । शिलापत्रसँग कुराकानी गर्दै खड्काले गठबन्धनको विषयमा केन्द्रीय कार्यसमितिको बैठकमा छलफल हुने बताए ।

खड्काले भने, ‘गठबन्धनको विषयबारे अबको केन्द्रीय कार्यसमितिको बैठकमा एजेण्डा बन्छ र त्यहाँ छलफल भएपछि मात्रै केही भन्न सकिन्छ ।’

एमाले पनि जोडिँदै साना दल

एमाले अहिले एक्लै चुनावमा जाने बताइरहेको छ । तर, केही साना दलहरूसँग अनौपचारिक छलफल भने गरिरहेका छन् । कमल थापा नेतृत्वको राप्रपा नेपाल र महन्थ ठाकुर नेतृत्वको लोसपा भने एमालेसँगै गठबन्धन गर्ने प्रयासमा छन् ।

मधेसमा कमजोर देखिएको एमाले ठाकुरलाई साथमा लिएर सम्मानजनक उपस्थिति देखाउन चाहन्छन् । ठाकुरनिकट एक नेताका अनुसार एमालेसँग गठबन्धन गर्ने अनौपचारिक सहमति भइसकेको छ । त्यसैगरी कमल थापा पनि निरन्तर छलफलमा जुटेका छन् ।

ओलीसँग संवादमा रहेका थापाले आफ्नो नयाँ पार्टीका पदाधिकारीलाई एमालेसँग सहकार्य हुने बताइरहेका छन् । एमाले उपाध्यक्ष विष्णु पौडेलले गठबन्धनको विषयमा अहिले छलफल सुरु नभएको बताए । शिलापत्रसँग पौडेलले भने, ‘अहिलेसम्म हामी एक्लै चुनावमा जाने तयारीमा छौँ, गठबन्धनका विषयमा छलफल भएको छैन ।’

प्रकाशित मिति: बुधबार, फागुन २५, २०७८ २०:३४