विराटनगरमा अढाइ सय विद्यार्थीलाई शैक्षिक सामग्री वितरण

A+ A A-

दक्षिणपूर्वी मोरङको रंगेलीस्थित आदर्श माध्यमिक विद्यालयमा अध्ययनरत विद्यार्थीलाई विभिन्न शैक्षिक सामग्री वितरण गरिएको छ ।

लायन्स क्लब अफ विराटनगर एलिटका नयाँ पदाधिकारीको १ जुलाईदेखि कार्यकाल सुरु भएको अवसर पारेर पहिलो सामाजिक कार्यका रुपमा रंगेली नगरपालिका–७ स्थित आदर्श माध्यमिक विद्यालयमा अध्ययनरत २ सय ५० जना विद्यार्थीलाई शैक्षिक सामग्री वितरण गरिएको हो ।

कार्यकाल सुरु भएको अवसर पारेर क्लबकी अध्यक्ष सोविका पाण्डे, प्रथम उपाध्यक्ष अनुराधा थापा, सचिव प्रेरणा जोशी, क्लबका निर्देशक सर्वजीतराज पाण्डेलगायतले सोमबारदेखि कक्षा १ देखि ५ मा अध्ययनरत २ सय ५० जना विद्यार्थीलाई कापी, पेन्सिल, इरेजर, कटर र खाजाका रुपमा बिस्कुट वितरण गरेका हुन् ।

सो अवसरमा विद्यालयका आधारभूत तहका प्रमुख कृष्णदेव दासले विद्यालयमा अत्यन्त गरिब, दलित तथा सीमान्तकृत समुदायका बालबालिका मात्र अध्ययनरत रहेको बताउँदै गरिबीकै कारण विद्यार्थीले अध्ययनमा निरन्तरता दिन नसकेको दाबी गरे ।

शैक्षिक सामग्री वितरण कार्यक्रममा क्लबकी अध्यक्ष पाण्डेले आफ्नो पहिलो कार्यकाल सोही विद्यालयमा शैक्षिक सामग्री वितरण गरेर सुरु भएको बताउँदै विपन्न तथा सीमान्तकृत समुदायका बालबालिका अध्ययन गर्ने सो विद्यालयका विद्यार्थीलाई आगामी दिनमा क्लबमार्फत निरन्तर सहयोग गर्ने प्रतिबद्धता व्यक्त गरिन् ।

लायन्सका सबै क्लबको कार्यकाल १ जुलाईदेखि सुरु हुने गरेको छ । आफ्नो कार्यकाल सुरु भएको अवसरमा लायन्स क्लब अफ विराटनगर एलिटले सो कार्यक्रम गरेको हो ।

गत वर्ष डिसेम्बरमा मलिका रिजालको अध्यक्षतामा स्थापना भएको उक्त क्लबले हालसम्म ताप्लेजुङका अनाथ बालबालिकालाई न्यानो कपडा वितरण, प्रत्येक महिना विराटनगरस्थित वृद्धाश्रमलाई खाद्यान्न वितरण, अपांगता भएका व्यक्तिलाई ह्वील चियर वितरण, विभिन्न विद्यालयका विद्यार्थीलाई न्यानो कपडा वितरण, रक्तदान, योग शिविरमा पानी वितरणलगायतका सामाजिक कार्य गर्दै आएको छ ।

प्रकाशित मिति: मंगलबार, असार १७, २०७६ ०१:३८