नेपाली युवाले मान्छे नपुग्ने ठाउँमा पुग्ने रोबोट बनाए

A+ A A-

मेकानिकल इन्जिनियरिङ अध्ययनरत युवाले मानवरहित यन्त्र बनाएका छन् । उनीहरुले बनाएका मानवरहित यन्त्रमा ट्राफिक कन्ट्रोल सिस्टम, तापक्रम, माटोको प्रकार पत्ता लगाउने, सवारी साधनलाई दुर्घटनाबाट जोगाउन सचेत गराउनेलगायतका विशेषता छन् ।

टेक्नोमाइन्ड रोबोटिक्स क्लब र द रोबो क्रियु नामक संस्थामा आबद्ध ६ जना युवा मिलेर ती यन्त्रहरुको निर्माण गरेका छन् । दीपक साहको नेतृत्वमा रहेको टोलीमा साहिल गुप्ता, शशांक कर्ण, सुभास शर्मा, जितेन्द्र शर्मा र शेखरकुमार नामक युवा छन् । उनीहरु सबै मेकानिकल इन्जिनियरिङ अध्ययनरत विद्यार्थी हुन् ।

ती युवाले म्यानुअल ट्राफिक कन्ट्रोल सिस्टम, अटोमेटिक ट्राफिक लाइट कन्ट्रोल, मार्स रोबोट, अब्सटेकल रोबोट, लाइन फोलोइङ रोबोटलगायतका यन्त्र बनाएका हुन् ।

अटोमेटिक ट्राफिक लाइट कन्ट्रोलले कुनै मानवीय सहयोगबिना ट्राफिक लाइटलाई नियन्त्रण गर्न सकिनेछ । उनीहरुले निर्माण गरेको अब्सटेकल रोबोटबाट सडकमा गुडिरहेको सवारी साधनलाई दुर्घटनाबाट जोगाउन सकिन्छ । त्यो रोबोट सवारी साधनमा जडान गरिए अगाडि रहेको बाधालाई २० सेन्टिमिटर अगाडि नै पहिचान गरेर सवारी साधनलाई बाटो परिवर्तन गर्न सक्ने बनाउन सकिन्छ ।

त्यस्तै, मार्स रोबोटले मान्छे पुग्न नसक्ने स्थानमा पुगेर त्यहाँको वस्तु स्थिति, त्यहाँको वातावरण, माटो पानी आदिको विषयमा जानकारी संकलन गर्न सहयोग गर्छ । नासाले मार्समा पठाएको क्युरोसिटी रोबोटबाट प्रेरित भएर ती युवाले याे रोबोट निर्माण गरेका हुन् । शाहील गुप्ताले याे रोबोटलाई मान्छे जान नसक्ने कुनै पनि ठाउँमा पठाउन सकिने बताए ।

सरकारी सहयोगको खाँचो

मानवरहित यन्त्र निर्माण गरेका ती युवाले जनकपुरधाममा एउटा रिसर्च सेन्टर स्थापना माग गरेका छन् ।

उनीहरुले सरकारी सहयोगमा रिसर्च सेन्टर स्थापना गर्न माग गरेका हुन् । ती युवाको नेतृत्वकर्ता दीपक साहले मिथिला रिसर्च सेन्टरको नाममा जनकपुरधाममा संस्था स्थापना गरिए आफूहरुलाई अन्य अविष्कारका लागि सहयोग पुग्ने बताए । उनले सरकारी सहयोग पाएमा जनकपुरधाममै अटोमेटिक ट्राफिक लाइट कन्ट्रोल कम लागतमै जडान गर्न सकिने बताए । साहले ५ लाखको लागतमा कुनै एक स्थानमा यो प्रणाली जडान गर्न सक्ने दाबी गरे । जसमा सीसीटिभी क्यामरासमेत जडान गरिएको हुन्छ ।

प्रकाशित मिति: मंगलबार, असार १७, २०७६ ००:५१