कर्पाेरेटपेमा अब अनलाइन रजिस्टर गर्न सकिने सुविधा

A+ A A-

व्यावसायिक भुक्तानीको प्लेटफर्म कर्पाेरेटपेमा अनलाइन रजिस्टर गर्न सकिने सुविधा ल्याइएको छ । कर्पाेरेटपे प्रणालीको स्तरोन्नति गरी विभिन्न सुविधाहरूसँगै अब अनलाइन रजिस्टर गर्न सकिने सुविधा पनि थप गरेको हो ।

बैंक/वित्तीय संस्थाहरूका साना तथा मझौला व्यावसायिक तथा विभिन्न संस्थागत ग्राहकहरूले अब अनलाइन माध्यमबाट नै प्रारम्भिक रजिस्ट्रेसन प्रक्रिया पूरा गरी सम्बन्धित बैंक/वित्तीय संस्थाबाट सेवा सुचारु गर्न सक्नेछन् ।

साथै, उक्त प्रणालीमा उपयोगिता तथा क्रेडिटरहरूलाई बल्क भुक्तानी, पटक–पटक गरिने भुक्तानीका लागि क्वीक पेमेन्ट, खाताको स्टेटमेन्ट हेर्ने सुविधालगायत अन्य सेवा सुविधा पनि थप गरिएका छन् ।

अनलाइन रजिस्ट्रेसनका निम्ति बैंक/वित्तीय संस्थाका व्यावसायिक ग्राहकहरूले कर्पोरेटपे डट कनेक्ट आईपीएस डटकममा गई मागिएका कम्पनीसम्बन्धी विवरण दाखिला गरी, कम्पनीको आवश्यकताअनुरुप पदानुक्रमिक भूमिका असाइन गरी, बैंक खातासम्बन्धी विवरण दाखिला गरी एक पटकको अनलाइन रजिस्ट्रेसन प्रक्रिया पूरा गर्न सक्नेछन् ।

सो अनलाइन रिक्वेस्टका आधारमा सम्बन्धित बैंक/वित्तीय संस्थाले सब्मिट गरिएका कागजपत्रका आधारमा सेवा सुचारु गर्न सक्नेछन् । यस अनलाइन सुविधासँगै ग्राहकहरूले बैंक/वित्तीय संस्थाको शाखा नपुगीकनै प्रारम्भिक रजिस्ट्रेसन प्रक्रिया पूरा गरी बैंकबाट एक पटक मात्रै स्वीकृति लिई सेवा सुचारु गर्न सकिने हुँदा कर्पाेरेटपे प्रणालीमा आबद्ध हुन झन् सहज हुने अपेक्षा गरिएको छ ।

एनसीएचएलद्वारा सञ्चालन गरिएको उक्त प्रणालीमा हाल ४८ बैंक/वित्तीय संस्थाहरूमार्फत व्यावसायिक ग्राहकहरूलाई फन्ड ट्रान्सफर, तलब भुक्तानी, भेन्डर पेमेन्ट, नेपाल सरकारको राजस्व भुक्तानी, उपयोगितासम्बन्धी भुक्तानीलगायतका विभिन्न भुक्तानीहरू गर्न सकिने व्यवस्था छ ।

साथै, यस प्रणालीमा एउटै प्ल्याट्फर्ममा एकभन्दा बढी बैंक खाताहरू लिंक गरी कारोबारहरू गर्न सक्ने व्यवस्थासमेत छ ।

प्रकाशित मिति: मंगलबार, फागुन २४, २०७८ १३:३३