माओवादी र एकीकृत समाजवादीलाई धनराज गुरुङले किन भने ‘हात्तीको कानमा ओत लागेका चमेरा’ ?

माओवादी र एकीकृत समाजवादीलाई धनराज गुरुङले किन भने ‘हात्तीको कानमा ओत लागेका चमेरा’ ?

A+ A A-

सत्तारुढ दलहरूबीच स्थानीय तह चुनावमा कसरी गठबन्धन गर्नेबारे छलफल भइरहँदा कांग्रेस उपसभापति धनराज गुरुङले दिएको अभिव्यक्तिले माओवादी केन्द्र र एकीकृत समाजवादीका नेताहरू चिढिएका छन् ।

प्रधानमन्त्री एवं सभापति शेरबहादुर देउवा उपस्थित पार्टीनिकट कर्मचारी युनियनको महाधिवेशनलाई सम्बोधन गर्दै उपसभापति गुरुङले ती पार्टीको नामै नलिई हात्तीको कानमुनि ओत लाग्न आएका चमेरो भन्दै कटाक्ष गरेका थिए ।

चुनावी गठबन्धनबारे कांग्रेसको संस्थापन र शेखर कोइराला समूहबीच मतभेद रहँदै आएको छ । कोइराला समूहले कम्युनिस्टले कांग्रेसलाई भोट नहाल्ने भएकाले एक्लै चुनाव लड्नुपर्ने बताउँदै आएको छ । कोइरालाले माओवादी केन्द्रका अध्यक्ष पुष्पकमल दाहाल प्रचण्डलाई भेटेरै पनि स्थानीय चुनावमा गठबन्धन सम्भव नहुने बताइसकेका छन् । उपसभापति गुरुङ कोइरालानिकट नेता हुन् ।

‘कांग्रेसरुपी हात्ती अब चुनावको मैदानमा लम्किन थालेको छ । कांग्रेस चुनावको मैदानमा लम्किँदै गर्दा हात्तीको ठूलो कान देखेर चमेराहरू हात्तीको कानमा ओत लाउन खोज्दैछन्,’ गुरुङले भनेका थिए, ‘हात्तीको कानमा ओत लाग्ने चमेराको भरोसा हुँदैन । चमेराले हात्तीलाई केही सहयोग गर्दैन, बरु हात्तीको कान दुर्गन्धित बनाउँछन् । त्यसैले जनताबीच कांग्रेस एक्लै जान्छ, आफ्नो रोडम्यापमा ।’

उपसभापति गुरुङले माओवादी र एकीकृत समाजवादीप्रति भरोसा नभएरै आफूले कांग्रेसको ओत खोजेका चमेराको संज्ञा दिएको बताएका छन् । शिलापत्रसँग उनले भने, ‘गठबन्धन चाहनेले इमान्दारिता पनि देखाउनुपर्छ । सरकारमा पनि बस्ने, सडकमा ढुंगामुढा पनि गर्ने चरित्र देखाइसकेपछि उनीहरूप्रति कांग्रेसको भरोसा छैन ।’

अमेरिकी सहायता परियोजना एमसीसी संसदबाट पास गर्ने विषयमा माओवादी केन्द्र र एकीकृत समाजवादीले अड्को थापेर विवादित बनाएको उनको आरोप छ । ‘प्रचण्डको व्यवहार जता काफल पाक्यो, उतै चरी नाँच्यो जस्तो देखियो,’ गुरुङले भने, ‘कांग्रेसको काँध पाए ठीक नत्र केपी ओलीको काँध चढ्न जान्छु भनेर धम्क्याएर चुनावी गठबन्धन हुँदैन । ओलीले नबोकेकाले कांग्रेसको कानमुनि ओत लाग्न आएकै हो ।’

कांग्रेस उपसभापति गुरुङको यो कटाक्ष त्यतिबेला आयो जतिबेला माओवादी केन्द्रका अध्यक्ष प्रचण्डले सत्तारुढ दलहरूको बैठकमा स्थानीय तह निर्वाचनका लागि गठबन्धनको प्रस्ताव अघि सारेका छन् । पार्टी केन्द्रीय कमिटी बैठकमा उनले ब्रिफिङ गरेअनुसार, सत्तारुढ दलले विगतमा जितेका ठाउँमा तिनै पार्टीलाई नेतृत्व दिने माओवादी प्रस्ताव छ । एमालेले जितेका ठाउँमा तत्कालीन निकटतम् प्रतिद्वन्द्वीलाई नेतृत्व दिने प्रचण्डको प्रस्ताव छ ।

पहिलोपटक निर्वाचनमा सहभागी एकीकृत समाजवादीलाई उसको प्रभाव रहेको पालिकामा नेतृत्व दिने उनले बताएका थिए । ‘प्रचण्डजीको प्रस्ताव सहज र व्यवहारिक छैन । मुख्य कुरा कांग्रेसलाई उहाँहरूप्रति अझै पनि भरोसा छैन,’ उपसभापति गुरुङले भने, ‘कांग्रेसले प्राविधिक कारणले धेरै ठाउँमा चुनाव हारेको छ । आफ्नै स्वतन्त्र उम्मेदवारका कारण पनि क्षति व्यहोरेको छ । त्यसैले माओवादीले जितेका सबै ठाउँ छाडेर गठबन्धन गर्न सकिँदैन ।’

प्रचण्डपुत्री रेणु दाहाललाई मेयर बनाउन कांग्रेसको राम्रो पकड रहेको भरतपुर महानगरपालिका छाड्नुपरेको उनले बताए । सत्ता गठबन्धनको नाममा केन्द्रले गर्ने पालिका भागबण्डाको कुरा अवैज्ञानिक रहेको उनी बताउँछन् । त्यसो भए कांग्रेस गठबन्धनको पक्षमा छैन ? भन्ने प्रश्नमा गुरुङले भने, ‘स्थानीय तहमा कथाले मागे अनुसार जोसँग पनि गठबन्धन गर्न सक्ने बाटो खुला गरिदिनुपर्छ । तर, केन्द्रबाटै भागबण्डा सम्भव छैन ।’

प्रकाशित मिति: सोमबार, फागुन २३, २०७८ १९:०६