सेबोन अध्यक्ष हमालका ६ प्राथमिकता, रियल सेक्टर भित्र्याउनेदेखि कमिसन शुल्क घटाउनेसम्म

सेबोन अध्यक्ष हमालका ६ प्राथमिकता, रियल सेक्टर भित्र्याउनेदेखि कमिसन शुल्क घटाउनेसम्म

A+ A A-

पुँजी बजार सुधारका लागि नेपाल धितोपत्र बोर्डले ६ प्रकारका काम तत्काल सुरु गर्ने योजना अगाडि सारेको छ ।

सोमबार धितोपत्र बोर्ड (सेबोन) ले आयोजना गरेको पत्रकार अन्तर्क्रिया कार्यक्रममा बोर्डका नवनियुक्त अध्यक्ष रमेश हमालले धुमिलिएको छविलाई सुधार्दै शेयर बजारमा रियल सेक्टर भित्र्याउनेदेखि शेयर खरिदविक्री गर्दा लाग्ने शुल्कसमेत घटाउन पहल गर्ने बताएका छन् ।

धितोपत्र बोर्डका पूर्व अध्यक्ष भिष्मराज ढुंगाना बर्खास्त भएसँगै झण्डै पाँच महिना अध्यक्षविहीन बनेको बोर्डमा अध्यक्ष हमालको कार्यकाल चुनौतीपूर्ण छ । ४ वर्षको कार्यकालमा अध्यक्ष हमालले दुई वर्षमात्रै रहन पाउने प्रावधानका कारण पनि छोटो समयमा योजनाबद्ध रूपमा काम अगाडि बढाउन ६ बुँदे योजना अगाडि सारेका छन् । जसमा शेयर बजार क्षेत्रमा निगरानीको कामलाई थप बलियो बनाउन अटोमेटिक सर्भिलेन्स जडित सफ्टेवरको विकास गर्ने, शेयर बजारलाई थप विस्तार गर्दै रियल सेक्टर भित्र्याउनेदेखि बण्ड मार्केट र इन्फ्राइन्ट्रक्चर मार्केटको विकास गर्ने उल्लेख छ । अध्यक्ष हमालले बैंकिङ, जलविद्युत लगायतका क्षेत्रमा मात्रै बजार सीमित भएको भन्दै रियल सेक्टरदेखि ठूला कम्पनीहरूलाई समेत धितोपत्र बजारमा भित्र्याउने काम अगाडि बढाउने बताए ।

‘बजार केही सीमित क्षेत्रमा मात्रै खुम्चियो, यसले लगानीकर्ता मात्रै नभएर बजार पनि व्यवस्थित बन्न सकिरहेको छैन, अब बुकविल्डिङमार्फत ठूला कम्पनीहरूलाई पनि धितोपत्र बजारमा प्रवेश गर्ने बतावरण बनाउँछौँ,’ उनले भने ।

सर्बोत्तम सिमेन्टको शेयर बुकविल्डिङ विधिमार्फत निष्कासनको तयारी हुँदैगर्दा नियामक निकायका प्रमुखबाटै भित्री कारोबार भएपछि बदनाम बनेको यो प्रणाली आफै नराम्रो भने नभएको उनको बुझाइ छ । ‘बुकविल्डिङ विधि आफैमा नराम्रो छैन’, उनले भने, ‘यो त उत्कृष्ट नै देख्छु तर, यसलाई नियमन गर्ने व्यक्तिको भने स्वच्छ छवी हुन जरुरी छ ।’ हमालले बुकविल्डिङ विधिबाट अब छिट्टै रियल सेक्टर लगायतका क्षेत्रलाई धितोपत्र बजारमा भित्र्याउने बताएका हुन् ।

पछिल्लो समय शेयर बजारमा लगानी गर्ने लगानीकर्ताको संख्या लाखौँमा पुगिसकेको छ भने बजार पुँजीकरण पनि ४० खर्ब रुपैयाँमाथि पुगेको छ । यस्तो अवस्थामा समग्र शेयर बजार क्षेत्रको व्यवस्थापनका लागि जनशक्ति अपुग भएको भन्दै कर्मचारी विस्तारमा समेत लाग्ने अध्यक्ष हमालको योजना छ ।

उनले कर्मचारी विस्तारदेखि क्षमता अभिवृद्धि,बोर्डको भवन निर्माण, वित्तीय साक्षरता विकासका लागि मर्चेन्ट बैंक, ब्रोकर, नेप्से तथा सीडीएससी लगायतका निकायसँग मिलेर साक्षरता अभियान सञ्चालन गर्ने लगायतका योजना आफ्नो कार्यकाल भित्रै सक्ने गरी अगाडि सारेका छन् ।

शेयर खरिदविक्री गर्दा लगानीकर्ताले तिर्नुपर्ने कमिसन शुल्क बढी भएको गुनासोमा भने अध्यक्ष हमाल लगानीकर्ताको हित हुने गरी कमिसन दर परिमार्जन गर्न पनि आफू अध्ययनरत रहेको बताए।

नयाँ स्टक एक्स्चेन्जको लाइसेन्स वितरणको काममा भने अध्यक्ष हमाल मौन रहेका छन् । ‘अहिले अध्ययन हुँदैछ नेपालमा नयाँ स्टक एक्स्चेन्जको आवश्यकताबारे । त्यसैले अहिले नै दिने नदिने कुनै निणर्य गरेको छैन’, उनले भने ।

प्रकाशित मिति: सोमबार, फागुन २३, २०७८ १६:३६