हेलिकोप्टरमा पोखरा आउँदै ओली, के-के छन् कार्यक्रम ?

A+ A A-

प्रमुख प्रतिपक्षी दल नेकपा एमाले अध्यक्ष केपी शर्मा ओली पोखरा आउँदै छन् । चारवटा कार्यक्रममा सहभागी हुन अध्यक्ष ओली एक दिन पोखरा नै बस्ने गरी आज आउन लागेका हुन् ।

आज मध्याह्न १२ बजेपछि हेलिकोप्टरबाट अध्यक्ष ओली पोखरा आउने एमाले प्रदेश कमिटीले जनाएको छ । नवलपुरमा एउटा शैक्षिक संस्थाको वार्षिकोत्सवलाई सम्बोधन गरेर पोखराका निर्धारित कार्यक्रममा सहभागी हुन ओली पोखरा आउने एमाले प्रदेश सचिव एवं प्रदेशसभा सदस्य धनञ्जय दवाडीले जानकारी दिए ।

पोखरा आएलगत्तै उनी राष्ट्रिय मानवअधिकार तथा सामाजिक न्याय मञ्च नेपाल (मानव अधिकार एलाइन्स) को पाँचौ राष्ट्रिय महाधिवेशनको उद्घाटन सत्रमा सहभागी हुनेछन् । त्यसपछि एउटा पत्रिकाको वार्षिकोत्सव कार्यक्रमलाई सम्बोधन गर्नेछन् । त्यसपछि पश्चिमाञ्चल क्षेत्रीय अस्पतालमा एमालेको भ्रातृसंस्था प्रवासी नेपाली मञ्चले गत साउनमा स्थापना गरेको अक्सिजन प्लान्ट उद्घाटन गर्ने कार्यक्रम छ । गत ६ साउनमा ४० देशमा रहेका एमाले कार्यकर्ताले चिनियाँ कम्पनीमा निर्मित प्लान्ट पोखरा पठाएका थिए । सञ्चालनमा आएको आठ महिनापछि अध्यक्ष ओलीले उक्त प्लान्ट उद्घाटन गर्न लागेका हुन् ।

उनी एक रात पोखरा नै बस्ने छन् । अध्यक्ष ओली कास्कीको रूपा गाउँपालिकास्थित रुपाकोट रिसोर्टमा बस्ने एमालेले जनाएको छ । एमाले गण्डकी प्रदेश कमिटीले मंगलबार पार्टी प्रवेश कार्यक्रम आयोजना गरेको छ । त्यो कार्यक्रममा सहभागी भएर अध्यक्ष ओली मंगलबार काठमाडौं फर्कने सचिव दवाडीले जानकारी दिए ।

लोकतान्त्रिक समाजवादी पार्टी (लोसपा) का नेता देवी सुवेदीको नेतृत्वमा एमाले प्रवेश गर्न लागेकाहरूलाई अध्यक्ष ओलीले स्वागत गर्ने कार्यक्रम छ । फागुनमा अध्यक्ष ओली दोस्रोपटक पोखरा आउन लागेका हुन् । यसअघि गत १३ फागुनमा पनि पार्टी प्रवेश कार्यक्रमलाई ओली पोखरा आएका थिए । एमालेनिकट पत्रकारको संस्था प्रेस चौतारीको राष्ट्रिय महाधिवेशनलाई सम्बोधन गर्न आउँदो २७ फागुनमा अध्यक्ष ओली फेरि पोखरा आउने कार्यक्रम छ ।