स्व. लता मङ्गेशकरको सम्झनामा डीएभी स्कुलमा श्रद्धाञ्जलि कार्यक्रम

A+ A A-

डीएभी सुशील केडिया विश्व भारती विद्यालयमा नेपाली साङ्गीतिक क्षेत्रमा लब्धप्रतिष्ठित व्यक्तित्व, अभिभावक र विद्यार्थीहरूको उपस्थितिबीच स्व लता मङ्गेशकरको सम्झनामा श्रद्धाञ्जलिसभा आयोजना गरियो ।

कार्यक्रममा लता मङ्गेशकरको वृत्तचित्र प्रदर्शन गरिएको थियो । नेपाली साङ्गीतिक क्षेत्रकी सदावहार गायिका मनिला सोताङ प्रमुख अतिथि रहेको सो कार्यक्रममा विशिष्ट अतिथि बबिता मानन्धर रहेकी थिइन् । दुवै गायिकाले उक्त कार्यक्रममा लता मङ्गेशकरप्रति समर्पित रही साङ्गीतिक प्रस्तुति दिएका थिए ।

सो अवसरमा विद्यालयका अध्यक्ष अनिल केडियाले लता मङ्गेशकर भारतमा मात्र नभएर विश्वमै एक उत्कृष्ट गायिकाको रूपमा स्थापित रहेको उल्लेख गरे । उनले लताप्रति समर्पित रही साङ्गीतिक प्रस्तुति दिए ।

त्यस्तै, विद्यालयकी प्राचार्य डा. भुवनेश्वरी रावले लता मङ्गेशकर स्वरको माध्यमबाट विश्व समुदायलाई प्रेम र विश्वासमा आबद्ध गर्न सफल भएको बताइन् । उनले लता मङ्गेशकरलाई एक साङ्गीतिक विश्वविद्यालयको रूपमा समेत चर्चा गरिन् ।

सोही अवसरमा प्राथमिक विद्यालय तहका विद्यार्थीहरूले ब्यालेट नृत्य, निम्नमाध्यमिक विद्यालय तहका विद्यार्थीहरूले नेपाली, हिन्दी फ्युजन नृत्य र माध्यमिक तहका विद्यार्थीहरूले थेमेटिक नृत्य प्रदर्शन गरे । त्यसैगरी संगीत विभागका प्रमुख जय श्रीवास्तव र अङ्ग्रेजी शिक्षिका शशिल्ता राईले लता मङ्गेशकरद्वारा गाइएको युगल गीत प्रस्तु गरे ।

डीएभी विद्यालयकै कक्षा ९ की एरिका चौधरी र कक्षा ११ का सुमित श्रीवास्तवले गायिका स्व लता मङ्गेशकर र गायक रामकृष्ण ढकालद्वारा गाइएको गीत बाचुन्जेलीलाई लाई प्रस्तुत गरे । कार्यक्रमलाई भव्य एवं सभ्य बनाउन प्रथम महिला सुनिता केडियालगायत सम्पूर्ण विद्यालय व्यवस्थापन समितिका सदस्यहरूको उपस्थिति थियो । सो अवसरमा नेपाल–भारतमैत्री समाज सम्बद्ध विशिष्ट व्यक्तित्वहरूको उपस्थिति थियो ।

प्रकाशित मिति: आइतबार, फागुन २२, २०७८ १८:५२