प्रहरीको कुटाइपछि युवकको मृत्यु भएको भन्दै सुर्खेतमा तनाव

A+ A A-

कालिकोटका एक युवाको सुर्खेतमा रहस्यमयमृत्यु भएपछि सुर्खेत वीरेन्द्रनगर अहिले तनावग्रस्त बनेको छ ।

कालिकोटको तिलागुफा नगरपालिकाका ३४ वर्षीय मिनी हमालको प्रहरीको कुटाइबाट मृत्यु भएको भन्दै आफ्न्तहरू प्रदर्शनमा उत्रिएका हुन् । मृतकका आफन्तहरूले अहिले मंगलगढी, एरिचोक सडक खण्डमा प्रदर्शन गर्नुका साथै प्रहरीमाथि ढुंगामुडा गरेका छन् ।

हमाल शुक्रबार राति नेपालगञ्जबाट गाडीमा सामान लिएर आउँदै गर्दा सुर्खेतस्थित सुब्बा कुना चेकपोष्टका असईले निर्घात कुटपिट गर्दा मृत्यु भएको मृतकका भाइ नाता पर्ने देविकृष्ण पाण्डेले बताए । पाण्डेले दिएको जानकारी अनुसार हमाल शुक्रबार बिहान पसलका लागि सामन लिन नेपालगञ्ज गएका थिए ।

‘पसलको लागि सामान लिन हिजो गाडी लिएर जानुभएको थियो । फर्किनेबेला सुब्बाकुनामा प्रहरीले ड्राइभरले लाइसेन्स मागेछ । ड्राइभरले लाइसेन्स छैन भनेपछि फाइन काट्ने विषयमा विवाद भएछ । दाइले बाटोमा हल्का रक्सी पनि खानुभएकाले प्रहरीसँग भनाभनपछि असईले भित्र लगेर निर्घात कुटेछन्’, ड्राइभरले आफूलाई दिएको जानकारीबारे हामीलाई सुनाउँदै पाण्डेले भने, ‘कुटपिटपछि राति गाडी त्यहीँ छोडेर इन्ट्री गर्न रोकेको ट्रकमा चढेर बजार आउनुभएछ । तर, ट्रक तीन सय मिटर यता आएपछि रोकिएछ । फेरि गाडीमै गएर ड्राइभर र दाई सुतेका रहेछन् । बिहान अर्काे ड्राइभर गएर गाडी ल्याउन खोज्दा दाई नउठेपछि सवा दश बजेतिर सिधै सुर्खेत अस्पताल पु¥याए । त्यहाँ आइसकेपछि डाक्टरले मृत घोषणा गरिदिए । पुलिसले हानेको प्रष्टै देखिन्छ अण्डकोसभन्दा माथि, ढाड, मुटुको साइटमा निलडाम छ ।’

अस्पतालले विज्ञप्ति जारी गर्दै हमाललाई उपचारका लागि विहान अस्पताल ल्याइएको र चिकित्सकले चेकजाँच गर्दा अस्पताल ल्याइनुपूर्व नै मृत्यु भइसकेको जनाएको छ । के कति कारणले मृत्यु भयो भन्नेबारे अनुसन्धान भइरहेको सुर्खेत प्रहरीका प्रवक्ता रामप्रसाद घर्तीले जानकारी दिए । घटनाको छानविन गरी दोषिमाथि कारबाही नभएसम्म तथा मृतकका परिवारलाई क्षतिपूर्ति नदिएसम्म आन्दोलन गर्ने मृतकका आफन्तहरूले बताएका छन् ।

अनुसन्धानका लागि तीन सदस्यीय समिति गठन

घटनाको छानविनका लागि जिल्ला प्रशासन कार्यालय सुर्खेतले सहायक प्रमुख जिल्ला अधिकारीको संयोजकत्वमा तीन सदस्यीय समिति गठन गरेको छ।

शनिबार जिल्ला प्रशासन कार्यालयमा बसेको जिल्ला सुरक्षा समितिको बैठकले सहायक प्रजिअ इश्वरी प्रसाद पाण्डेको संयोजकत्वमा तीन सदस्यीय छानविन समिति गठन गरेको हो । समितिलाई तीन दिनभित्र सत्य तथ्य छानविनगरी प्रतिवेदन पेस गर्न भनिएको छ ।