जयपुर साहित्य मेलामा नेपालबाट बुद्दिसागरदेखि अमिश मुल्मीसम्म

A+ A A-

पृथ्वीकै सबैभन्दा ठूलो साहित्यिक कार्यक्रम/साहित्यको कुम्भ मेला भनेर चिनिने 'जयपुर साहित्य महोत्सव'को सन् २०२२ संस्करण केही दिनमै भारतको जयपुरस्थित होटल क्लार्क्स अमेरमा आयोजना हुँदैछ । पूर्वनिर्धारित कार्यक्रम जनवरीमा हुने भनिए पनि कोरोना भाइरसको ओमिक्रोन भेरियन्ट विश्वभर फैलिएपछि केही समयका लागि पछि धकेलिएको हो ।

घरमै बसेर पनि दर्शकहरू साहित्य महोत्सवमा जोडिऊन् भन्ने उद्देश्यले यो पटक अनलाइन र अनग्राउन्ड (मिश्रित) तरिकाले महोत्सवका सत्रहरू तय भएका छन् । ५ देखि ९ मार्चसम्म अनलाइन सत्रहरू मात्र चल्नेछन् भने १० देखि १४ मार्चसम्म दर्शकहरूको भौतिक उपस्थिति र अनलाइनमा एकैसाथ कार्यक्रम हुनेछ । साहित्यिक सत्रहरूका साथसाथै कला प्रदर्शनी, सांगीतिक साँझ र किताब प्रदर्शनी पनि महोत्सवका अरु आकर्षणमध्येमा पर्दछन् ।

विश्वभरबाट साहित्यिक अनुयायीहरू सहभागी हुने महोत्सवमा यो पटक नेपालबाट उपन्यासकार बुद्धिसागर, विश्लेषक अमिश राज मुल्मी, कालेबुङ, भारतका नेपालीभाषी आख्यानकार छुदेन काविमो वक्ताका रूपमा सहभागी हुँदैछन् ।

अनलाइनअन्तर्गत ८ मार्चमा नेपाली विश्लेषक अमिश राज मुल्मी र नेपालका लागि भारतीय पूर्वराजदूत रन्जित रे, 'नेपाल: टु द नर्थ' सत्रमा वक्ताका रूपमा सहभागी हुँदैछन् । यो सत्रमा द हिन्दुकी कूटनीतिक मामिला सम्पादक सुहासिनी हाइदरले सहजकर्ताको भूमिका निभाउँदैछिन् ।

विश्लेषक मुल्मीको 'अल रोड्स लिड नर्थ : नेपाल्ज टर्न टु चाइना' किताब प्रकाशित छ भने पूर्वराजदूत रेको 'काठमान्डु डिलेम्मा : रिसेटिङ इन्डिया नेपाल टाइज'' किताब प्रकाशित छ । दुवै किताब नेपालका उत्तर र दक्षिण छिमेकी क्रमशः चीन र भारतसँगको सम्बन्धमा आधारित छ्न् । नेपालको वरिपरि घुमिरहेको भूराजनीतिबारे यो सत्रमा चर्को बहस हुनेमा दर्शकहरू आशावादी छ्न् ।

अनलाइन र अनग्राउन्ड मिश्रित 'नेपाली ब्लुज' सत्रमा बुद्धिसागर र छुदेन काविमोसँग भारतीय उपन्यासकार तथा अनुवादक प्रभात रन्जनले सहजकर्ताको भूमिका निभाउनेछन् । उक्त सत्र ११ मार्चमा महोत्सवको 'बैठक' कक्षमा हुनेछ ।

लेखक बुद्धिसागरको उपन्यास कर्णाली ब्लुज र छुदेन काविमोको आख्यान फातसुङ अङ्ग्रेजी भाषामा अनुवाद भएर यही वर्ष बजारमा आएका छन् । बुद्धिसागरको पहिलो उपन्यास कर्णाली ब्लुजलाई सोही नाम राखी चर्चित बेलायती प्राध्यापक तथा अनुवादक माइकल हटले अनुवाद गरेका हुन् भने पेन्गुइन बुक्स इन्डियाले प्रकाशन गरेको हो ।

त्यस्तै, छुदेन काविमोको आख्यान फातसुङलाई अङ्ग्रेजीमा 'सङ अफ द सोयल' नाम दिई लेखक तथा प्रकाशक अजित बरालले अनुवाद गरेका हुन् । उक्त आख्यानलाई नेपालमा फाइन प्रिन्ट, भारतमा रच्ना बुक्स र बेलायतमा बलेस्टियर प्रेसले एकैसाथ प्रकाशन गरेका हुन् । नेपाली भाषामा दुवै लेखकका कृतिहरू फाइन प्रिन्टले प्रकाशन गरेको हो ।

विश्वचर्चित इटालियन पत्रकार तथा लेखक इटालो काल्भिनोको एउटा भनाइ छ- 'अनुवादबिना म आफ्नै देशको सिमानामा सीमित हुनेछु । अनुवादक मेरो सबैभन्दा महत्त्वपूर्ण सहयोगी हो । उसले मलाई संसारमा परिचय गराउँछ ।'

नेपाली साहित्य र भाषाको सिमानालाई विश्वका हरेक कुनासम्म पुर्‍याउन यी दुई अनुवादित किताबले महत्त्वपूर्ण योगदान पुर्‍याउने नै छ्न् । साथसाथै, विदेशी भाषामा कमै अनुवाद हुने नेपाली साहित्यलाई नयाँ आयाम थप्न पनि पक्कै मद्दत पुग्नेछ ।

आशा गरौँ, दुई अनुवादित पुस्तकका नेपाली भाषी लेखक र अनुवादक प्रभात रन्जनले सहजकर्ताको भूमिका निभाउने जयपुर साहित्य महोत्सवको नेपाली ब्लुज सत्र रोमाञ्चक हुनेछ ।

प्रकाशित मिति: शुक्रबार, फागुन २०, २०७८ १८:०७