दार्चुला कारागारभित्र चौकीदार र नाइकेको दादागिरी, कैदीबन्दीसँग असुल्छन् पैसा

दार्चुला कारागारभित्र चौकीदार र नाइकेको दादागिरी, कैदीबन्दीसँग असुल्छन् पैसा

कारागारको चौकीदार ललित पन्त र नाइके पुष्पराज जोशी ।

A+ A A-

जिल्ला कारागार दार्चुलाकाे कारागारभित्र नै आपराधिक गतिविधि हुने गरेको पाइएको छ । कारागारभित्रका नाइके र चौकीदार मिलेर अन्य कैदीबन्दीबाट रकम असुली गर्ने र गुणस्तरहीन खाना खुवाउने गरेको कैदीहरूले आरोप लगाएका छन् ।

१८ फागुनमा कैद सजाय भुक्तान गरेर छुटेका एक कैदीका अनुसार कारागारभित्र गाँजाको कारोबारदेखि जुवाताससम्म खेलाइने गरिएको छ । ‘म अस्तिमात्रै कैद सजाय भुक्तान गरेर आएको हुँ । कारागार त यातना गृहजस्तै भएको छ । नयाँ आउने कैदीबन्दी सुत्दा पनि नाइके र चौकीदारले पैसा असुल्छन् । सरकारले नि:शुल्क उपलब्ध गराएको औषधिको समेत पैसा तिर्नुपर्ने हुन्छ,' उनले शिलापत्रसँग भने, 'खानाको त कुरै नगरौँ कारागारभित्र जुवातास र गाँजाकोसमेत कारोबार हुन्छ ।’

कारागारको चौकीदार ललित पन्त छन् । उनी जबर्जस्ती करणीको अपराधमा जेल पुगेका हुन् । नाइकेहरूमा पदमलाल ठगुन्ना र पुष्पराज जोशी छन् । उनीहरू हत्या आरोपमा दोषी ठहर भएर जेल पुगेका हुन् ।

जेलर वीरेन्द्र सिंह धामी भने केही दिनदेखि बिदामा छन् । निमित्त जेलर लक्ष्मी खडायतले भने कारागारभित्र कनै आपराधिक गतिविधि नभएको दाबी गरिन् । ‘कारागारभित्र त्यस्तो कुनै अवैध गतिविधि भएको छैन । हामीले समय समयमा चेकजाँच गर्ने गरेका छौँ । तर, त्यस्तो गतिविधि भएको भेटाएका छैनौँ,’ खडायतले भनिन् ।

जिल्ला प्रशासनका कार्यालयका प्रमुख (सीडीओ) दीर्घराज उपाध्यायले भने कारागारभित्र कुनै अवैध गतिविधि भएको पुष्टि भए कानुनी कारबाही गरिने बताए । ‘हामी कहाँ अहिलेसम्म कुनै त्यस्तो सूचना आएको छैन । तपाईंले भनेका कुरामा हामी छानबिन गर्छौं, दोषी देखिए कारबाही गर्छौं,’ सीडीओ उपाध्यायले भने ।