रुस–युक्रेन युद्धकाे प्रभाव नेपालकाे साहसिक पर्यटनमा, व्यवसायी चिन्तित

A+ A A-

रुस–युक्रेन युद्धका कारण नेपालको पर्यटन, रोजगारी र कृषि क्षेत्र प्रभावित हुने देखिएको छ । नेपालमा आउने साहसिक पर्यटकहरूको संख्या रुसबाट धेरै रहेकाे तथ्यांक छ । नेपालमा पदमार्ग र शिकार आरक्षमा आउने रुसी पर्यटकको संख्या धेरै थियाे । तर अहिले रुस–युक्रेन युद्धकाे प्रभावले अब नेपाल आउने साहसिक पर्यटकको सख्यामा कमी आउन सक्ने पर्यटन व्यवसायीहरूले बताएका छन् ।

पदमार्ग र शिकारका लागि आउने पर्यटकले गर्ने खर्च र बसाईकाे समय लामो हुने भएकोले आकर्षक मानिन्छ । अध्यागमन विभागको तथ्यांक अनुसार सामान्य अवस्थामा रुस–युक्रेनबाट वर्षमा करिब ११ हजार पर्यटक नेपाल भित्रिने गरेका छन् ।

उनीहरू पर्वतारोहण, ट्रेकिङ, वन अध्ययन, रोजगारी र कृषि क्षेत्रको अध्ययनका लागि आउने गरेका छन् । रुस–युक्रेनबाट आउने पर्यटक कम्तीमा ३ देखि ५ महिनासम्म भिसा अनुमति थपेर नेपाल बस्ने गरेको विभागले जनाएको छ ।

ट्रेकिङ एजेन्सी एशोसिएसन अफ नेपाल (टान) का अध्यक्ष खुमप्रसाद सुवेदी रुस–युक्रेन युद्धबाट सबैभन्दा बढी पर्यटन क्षेत्रमा असर पर्ने बताउँछन् । सुवेदीका अनुसार कोरोना महामारी जस्तो स्वास्थ्य जटिलता हुँदा पनि रुस र युक्रेनबाट पर्यटक नेपाल घुम्न आएका थिए ।

सुवेदीले भने ‘रुस–युक्रेन द्वन्द्वका कारण युरोप, अमेरिका र क्यानडाबाट नेपाल आउने पर्यटकमा समेत प्रभाव पर्ने देखिन्छ । कतिपय हवाइ सेवा ती देशको आकाश प्रयोग गरेर आउनुपर्छ । अहिले प्रतिबन्ध लगाउने हाेडबाजी चलिरहेकाे छ । यसले नेपालको अर्थतन्त्रमा प्रभाव पर्ने देखिएकाे छ ।’

रुसबाट समूहगतरूपमा पर्यटकहरू नेपाल घुम्न आउने गर्दछन् र त्यसरी आउने एक समूहमा १५ देखि २० जना हुने गरेका छन् । र, उनीहरू समूहमै पदयात्रा र पर्वतारोहण गर्दै रमाउने गरेको पर्यटन व्यवसायीहरू बताउँछन् । यस्तै, युक्रेनबाट आएका पर्यटक नेपालको हिमाली क्षेत्रमा हुने खेतीपाती, विभिन्न क्षेत्रका कृषि र वन–जंगलमा घुम्नेसँग अध्ययन गर्न रुचाउने गरेका छन् ।

रुस र युक्रेनबीचकाे द्वन्द्वको प्रभाव नेपालकाे पर्यटन क्षेत्रमा पर्न सक्ने पर्यटन बोर्डका निर्देशक मणिराज लामिछानेले पनि बताए । उनले भने, 'रुस र युक्रेनका पर्यटक एडभेन्चरमा बढी चासो राख्छन् । उनीहरू अन्नपूर्ण बेसक्याम्पस, एभरेस्ट र नेपालको उच्च हिमाली भेगमा घुम्न जान्छन्, जुन खर्चिला पर्यटकीय क्षेत्र भएकोले उनीहरूबाट प्रशस्त आम्दानी हुने गर्छ ।’ नेपालको पर्यटन क्षेत्रमा फेब्रुअरी–अप्रिल र सेप्टेम्बर–नोभेम्बर गरी ६ महिना मुख्य सिजनभित्र पर्छ ।

रुसी–युक्रेन पर्यटक कहिले कति ?

अध्यागमन विभागको तथ्यांकमा जनाइएअनुसार २०२२ को जनवरी महिनामा मात्र रुसबाट १ सय २१ र युक्रेनबाट ४१ जना पर्यटक नेपाल घुम्न आएका थिए । रुसले युक्रेनमा आक्रमण गर्ने तयारीपछि फेब्रुअरी महिनाबाट रुसी र युक्रेनी पर्यटक नेपाल आएका छैनन् ।

सन् २०२१ मा रुसबाट २ हजार १ सय ७ जना पर्यटक नेपाल घुम्न आएका थिए । जसमा एक हजार १ सय ४१ पुरुष र ९ सय ६६ महिला रहेको विभागको तथ्यांक छ । त्यही वर्ष युक्रेनबाट ९ सय ९७ जना पर्यटक आएका थिए । जसमा ५ सय ७ पुरुष र ४ सय ९० जना महिला थिए ।

त्यसैगरी, २०२० मा रुसबाट ८ सय ५३ पुरुष र ८ सय ६० महिला तथा युक्रेनबाट २ सय १२ पुरुष र २ सय ६७ महिला नेपाल आएको देखिन्छ । सन् २०१९ मा नेपालमा रुसबाट करिब १० हजार पर्यटक आएका थिए भने अघिल्लो वर्ष ६ हजार ३ सय रुसी पर्यटक नेपाल घुम्न आएको विभागको तथ्यांक छ । यो अवधिमा युक्रेनबाट ४ हजार पर्यटक नेपालमा आएका थिए ।

२०१९ मा पर्वतारोहणका लागि रुसबाट ५० र युक्रेनबाट २० जना पर्यटक नेपाल आएको पर्यटन बोर्डको तथ्यांक छ । २०१८ मा रुसबाट ५१ र युक्रेनबाट १८ जना पर्वतारोहणका लागि नेपाल भित्रिएका थिए । सन् २०१९ यता रोजगारीका लागि ३ सयभन्दा बढी रुसका कामदार नेपाल भित्रिएको श्रम तथा व्यवसायजन्य सुरक्षा विभागको तथ्यांकमा उल्लेख छ । युक्रेनबाट भने घुम्न र अध्ययनका लागि मात्र पर्यटक भित्रिने गरेका छन् ।

रुस–युक्रेनमा रोजगारी र अध्ययनका लागि नेपाली पनि जाने गरेका छन् । सन् २०१८ यता रोजगारीका लागि ७ हजारभन्दा धेरै नेपाली रसिया पुगेको वैदेशिक रोजगार विभागको तथ्यांक छ । अध्ययनका लागि सोही अवधिमा १ हजारभन्दा धेरै नेपाली रसियाका विभिन्न विश्वविद्यालयका पुगेको र यो अवधिमा युक्रेनमा पनि १ सय २३ जनाभन्दा धेरै नेपाली अध्ययनका लागि गएकाे वैदेशिक शैक्षिक अध्ययन महाशाखाको तथ्यांकले देखाउँछ ।

विभागको तथ्यांक अनुसार सन् २०१९ यता युक्रेनमा रोजगारीका लागि करिब ४ सय जना नेपाली पुगेका छन् । हाल युक्रेनमा रहेका ५ सय नेपाली युद्धका कारण दोस्रो देश फर्किसकेको जर्मनीस्थित नेपाली दूतावासले जनाएको छ ।

याे पनि

जर्मनीबाट नेपाली राजदूत भन्छन्- युक्रेनमा आपत्‌मा परेका नेपालीलाई सुरक्षित शहरमा जान भनेका छाैँ, उद्धारकाे पहल हुँदैछ

युक्रेनबाट ३ सय नेपाली तेस्रो देश पुगे, उद्धारका लागि सरकारले देखाएन चासो

युक्रेनबाट नेपाली भन्छन्- रकेट बम पड्किँदै छन्, बाँचिन्छ कि मरिन्छ थाहा छैन

प्रकाशित मिति: बिहीबार, फागुन १९, २०७८ ०७:०३