रतुवामाईका मेयरलाई आफ्नै पार्टीका जनप्रतिनिधिको असहयोग, प्रस्ताव अस्वीकृत भएपछि नगरसभा स्थगित

रतुवामाईका मेयरलाई आफ्नै पार्टीका जनप्रतिनिधिको असहयोग, प्रस्ताव अस्वीकृत भएपछि नगरसभा स्थगित

A+ A A-

मोरङको रतुवामाई नगरपालिकाको नगरसभामा स्थगित भएको छ । नगरपालिकाको नवौँ अधिवेशनमा मेयर रविन राईको आफ्नै पार्टीबाट निर्वाचित जनप्रतिनिधिहरूले चर्को विरोध गरेपछि स्थगित भएको हो ।

मेयर राईले नवौँ नगरसभामा केही योजना संशोधन र रकमान्तर प्रस्तावसहित ५ वर्षमा धेरै उपलब्धि हासिल गरेको प्रगति प्रतिवेदन प्रस्तुत गरेका थिए । त्यसैगरी न्यायिक समितिको अहिलेसम्मको प्रतिवेदन उपप्रमुख दमयन्तादेवी चुडालले प्रस्तुत गरेकी थिइन् ।

प्रस्तुत प्रतिवेदनमाथि नगरसभा सदस्य रतुवामाई–८ का वडाध्यक्ष गोपी चापागाईंले आठौँ नगरसभासम्म आफूले प्रस्तुत गरेका कुनै पनि एजेण्डा सुनुवाइ नभएको आरोप लगाउँदै मेयर राईका सांकेतिक विरोध गरेका थिए । वडाध्यक्ष चापागाईंले सांकेतिक भाषामा बोल्दै बोली नसुन्ने भनी व्यङ्ग्य गर्दै हातको इसाराबाट बुझाउने प्रयास गरेका थिए ।

केही बेर सांकेतिक रुपमा हातको इसारामा बोलेका वडाध्यक्ष चापागाईंले त्यसपछि मात्रै कार्यक्रम झुटको पुलिन्दा भएको आरोप लगाए । त्यसैगरी वडा नम्बर ९ का वडाध्यक्ष इन्द्रबहादुर लिम्बुले ह्युम पाइप खरिदमा अनियमितता भएको आरोप लगाए ।उनले वडाको सिलिङ बजेट ७ लाखबाट विभिन्न साइजका ह्युम पाइप उपभोक्ता समितिबाट खरिद गर्दा ९३ वटा आउने भए पनि नगरपालिकाले ५३ वटा मात्र खरिद गरी अनियमितता गरेको आरोप लगाए ।

वडा नम्बर १० का वडाध्यक्ष टंक ढकालले वडाको सिलिङ बजेट समेत वडालाई सञ्चालन गर्न नदिई नगरले ठेक्काबाट काम गराउँदा गुणस्तरहीन बाटो निर्माण भएकाले आफूले कुनै हालतमा योजना फरफारक गर्न सिफारिस नगर्ने घोषणा गरे । वडा नम्बर ६ का वडाध्यक्ष तुलाराम लुइटेलले नगरले पक्षपातपूर्ण कार्य गरेको आरोप लगाउँदै जनप्रतिनिधिकै हैसियतमा बस्न मेयर राईलाई चेतावनी दिए ।

नगरसभाका प्रस्ताव निणयार्थ प्रस्तुत गर्दा पारित नभएपछि मेयर राईले अर्को विशेष अधिवेशन बोलाउने र छलफल गर्ने घोषणा गर्दै नगरसभा स्थगित भएको घोषणा गरे । रतुवामाई नगरपालिकाको नगरसभामा मेयर राईसहित कांग्रेसबाट निर्वाचित जनप्रतिनिधिको बहुमत भए पनि प्रस्तुत प्रस्ताव अस्वीकृत भएपछि नगरसभा नै स्थगित भएको वडाध्यक्ष चापागाईंले जानकारी दिए ।

प्रकाशित मिति: मंगलबार, फागुन १७, २०७८ ११:४६