फ्रन्टलाइन अस्पतालको नेतृत्वमा डा. चक्रराज पाण्डे, भन्छन्– बेस्ट हस्पिटल बनाइदिन्छु

फ्रन्टलाइन अस्पतालको नेतृत्वमा डा. चक्रराज पाण्डे, भन्छन्– बेस्ट हस्पिटल बनाइदिन्छु

A+ A A-

२ सय शय्याको 'फ्रन्टलाइन अस्पताल'को नेतृत्व सोमबारदेखि वरिष्ठ अर्थोपेडिक सर्जन डा. चक्रराज पाण्डेले सम्हालेका छन् । उक्त अत्याधुनिक अस्पताल एक महिनाभित्रै सञ्चालमा ल्याउने भर्खरै मेडिकल नेतृत्व सम्हालेका डा. पाण्डेले जानकारी दिए ।

राजधानीको पुरानो बानेश्वर ओरालोमा रहेको फ्रन्टलाइन अस्पतालको ‘चिफ अफ द प्रेसिडेन्ट क्लिनिकल सर्भिसेज’का रूपमा आफूले काम थालेको डा. पाण्डेले पुष्टि गरे । ‘चिफ अफ द प्रेसिडेन्ट क्लिनिकल सर्भिसेजका रूपमा सबै विभागहरूलाई कोअर्डिनेट गर्ने गरी मैले आजबाट काम सुरु गरिसकेको छु,’ उनले भने, ‘हेड अफ द क्लिनिकल सर्भिसेजका रूपमा मैले काम गर्नेछु ।’

व्यवस्थापनले प्रमुख कार्यकारी अधिकृत (सीईओ)लगायतका जिम्मेवारी लिन आग्रह गरे पनि आफ्नो क्लिनिकल पक्ष सम्हाल्ने रुचिअनुसार यो जिम्मेवारी लिएको उनको भनाइ छ ।

‘उहाँहरूले सीईओलगायतका जिम्मेवारी पनि अफर गर्नुभएको थियो,’ उनले थपे, ‘तर, डाक्टरका रूपमा बेस्ट हस्पिटल बनाइदिन्छु भनेर मैले यो जिम्मेवारी लिएँ ।’ उनले आफूले इथिकल, बिरामीलाई माया गर्ने हस्पिटलका रूपमा फ्रन्टलाइन हस्पिटललाई विकास गर्न चाहेको उल्लेख गरे । ‘ठाउँ पनि राम्रो छ, यसलाई नेपालको नमुना अस्पताल बनाउने गरी काम गर्छु,’ उनले भने, ‘यो फिनिस प्रोडक्ट विश्वस्तरीय हुनेछ ।’

ग्राण्डी अस्पतालका परिकल्पनाकारसमेत रहेका डा. पाण्डे केही महिनाअघि ग्राण्डीको मेडिकल निर्देशकबाट बाहिरिएका थिए । उनी त्यसपछि लाजिम्पाटस्थित आफ्नै अनामिवा क्लिनिक र नर्भिक अस्पतालमा सक्रिय थिए ।

फ्रन्टलाइन अस्पतालको मेडिकल नेतृत्व सम्हालेसँगै उनले नर्भिक अस्पताल छाडेका छन् । अब डा. पाण्डे बिहान ८ बजेदेखि दिउँसो १ बजेसम्म फ्रन्टलाइन अस्पतालमा रहनेछन् । त्यसबाहेकको समय भने उनले लाजिम्पाटस्थित अनामिवा क्लिनिकलाई दिने बताए ।

डा. पाण्डेका अनुसार सेटअप तीव्र गतिका साथ भइरहेको अस्पतालमा २५—२६ वटा विभाग हुनेछन् । ‘अलिकति समय लाग्ला ६ महिनादेखि एक वर्षसम्म,’ उनले भने, ‘अर्थोपेडिक्स, जनरल सर्जरी, न्युरो सर्जरी, गाइनो, पेडियाट्रिक्स, डर्माटोलोजी, कार्डियाक, इन्डोक्राइनोलोजीलगायतका २५—२६ वटा विभाग बनाउँछु ।’

अस्पतालको मुख्य फोकस भने बजेट ट्रमा केयरमा हुने उनले सुनाए । ‘हामी मिडिल क्लासबाट आएका हौँ,’ उनले भने, ‘त्यसैले मेरो मुख्य फोकस बजेट ट्रमा केयरमा हुन्छ ।’ यो केयरमा जतिखेर पनि शल्यक्रिया हुने, जनरल वार्डमा राखेर उच्च टेक्नोलोजीबाट उपचार हुने उनले सुनाए । ‘मिडिल क्लास फ्यामिलीलाई यो केयरमा अलिक राहत हुन्छ,’ उनले प्रस्ट्याए, ‘१०० रुपैयाँमा हुने सर्जरी हामी ६० रुपैयाँमा गर्छौं ।’

उनका अनुसार अस्पतालका चारवटा शल्यक्रिया कक्षमध्ये तीनवटा तयार भइसकेको र एउटा शल्यक्रिया कक्ष दुईदेखि तीन हप्ताभित्र तयार हुनेछ । त्यस्तै, अस्पतालको आईसीयू ३० बेडको हुनेछ । अस्पतालमा हेलिकोप्टरबाट इमर्जेन्सी रेस्क्युसहितको सुविधा हुनेछ । अस्पतालमा डाक्टर, नर्स, कर्मचारी गरी झण्डै ५ सयको टिम हुने उनको आकलन छ ।

डा. पाण्डेले भने, ‘अस्पतालमा मेरो बौद्धिक लगानी मात्र हुन्छ, लगानी त ग्राण्डीमा गरिसकेँ ।’ अस्पताललाई एरिया मात्रै नभएर नेपाल अधिराज्यभरिका नागरिकलाई फाइदा हुने गरी अगाडि बढाउने उनले बताए ।

सिनामंगलस्थित नोबेल अस्पतालको व्यवस्थापन फ्रन्टलाइनको मुख्य व्यवस्थापन हो । नोबेलको व्यवस्थापनले विराटनगरस्थित नोबेल मेडिकल कलेजसँग नाम जुधेपछि अस्पतालको नाम परिवर्तन गरेर फ्रन्टलाइन अस्पताल राखेको हो ।

प्रकाशित मिति: सोमबार, फागुन १६, २०७८ १८:४९