राप्रपा नेपालका प्रवक्ता भन्छन्- राजतन्त्र त्यागिसकेका हैनौँ, एमालेसँग गठबन्धन गर्छौं (अन्तर्वार्ता)

राप्रपा नेपालका प्रवक्ता भन्छन्- राजतन्त्र त्यागिसकेका हैनौँ, एमालेसँग गठबन्धन गर्छौं (अन्तर्वार्ता)

A+ A A-

कमल थापा यतिबेला राजनीतिक संकटमा छन् । लामो समय राजतन्त्रका पक्षमा उभिएका थापा राजनीतिको उत्तरार्द्धमा राजतन्त्रको नारा छोड्नुपर्ने अवस्थामा आइपुगे । हिजो हिन्दु धर्म र सक्रिय राजतन्त्रको पक्षमा उभिएको राप्रपा नेपाल अहिले राजतन्त्रको नारा छोडेर राजनीति गर्ने प्रयासमा छ । केन्द्रीय कमिटी र जिल्ला कमिटीहरू गठनका प्रयास भइरहेका छन् । अध्यक्षबाहेक कोषाध्यक्ष चन्द्रबहादुर गुरुङ, प्रवक्तामा वसन्तमानसिंह अधिकारी र सुरेन्द्र आचार्यलाई मनोनयन गरिएकाे छ ।

नयाँ पार्टी गठनसँगै दुई महिनापछि आउने स्थानीय तहको निर्वाचनका विषयमा केन्द्रित रहेर प्रवक्ता वसन्तमानसिंह अधिकारी सँग गरिएको कुराकानीको सम्पादित अंश:

राप्रपामा बस्नै नसक्ने अवस्था आएर कमल थापाले राप्रपा नेपाल गठन गरे । थापानिकट राप्रपाका नेताहरूबाट खासै साथ दिएको देखिएन नि ?

राप्रपामा लामो र महत्त्वपूर्ण योगदान दिनुभएका कमल थापालाई अहिलेको नेतृत्वले उचित सम्मान र पार्टीलाई नेतृत्व गराउने क्षमता देखाएन । केही समय त नेतृत्वले उचित भूमिका निर्वाह गर्छ भन्ने अपेक्षा पनि गरिएको थियो । राप्रपाको महाधिवेशनमा जसरी ‘निर्मल निवास’ ले हस्तक्षेप गर्‍यो, त्यसमाथि छलफल गर्नुपर्‍यो भन्ने सामान्य माग थियो । त्यसलाई राप्रपाको नेतृत्वले अस्वीकार मात्रै गरेन, पूरै बेवास्ता गर्‍यो । त्यस कारण हामीले त्यसलाई स्वीकारेर बस्न सक्ने अवस्था भएन । कमल थापाले राप्रपा नेपाललाई पुनर्जीवित गर्नुभयो ।

राप्रपामा कमल थापा प्यानलबाट निर्वाचित भएका पदाधिकारी र केन्द्रीय सदस्यको संख्या निकै ठूलो छ । उहाँहरूसँग निरन्तर संवाद भइरहेको छ । हामी छलफलमै छौँ । केही समयपछि उहाँहरू जोडिने सम्भावना छ । केही जिल्लामा त जिल्ला कमिटी नै राप्रपा नेपालमा समाहित भइरहनुभएको छ ।

हिजोसम्म राजतन्त्रको पक्षमा वकालत गर्नुभयो । आज त्यसलाई गाली गरेर हिँडेपछि कमल थापालाई विश्वास गर्ने परिस्थिति पनि त देखिएन नि ?

हामीले राजतन्त्रप्रति वैरभाव राखेका छैनौँ । राजतन्त्रको पक्षपाती दल र व्यक्ति भएकै कारणले हामी संकटको बेलामा पनि राजतन्त्रको पक्षमा उभिएका थियौँ । गणतन्त्रको रापतापको बेलामा जहाँ राजतन्त्र पक्षधर बोल्नसमेत सक्ने अवस्था थिएन, त्यतिबेला कफन बाँधेर सडकमा निस्कने त कमल थापाहरू नै हुन् ।

अनि, उनीहरूलाई नै अहिले निर्मल निवासले पाखा लगाउन खोज्ने ? यो त सुहाउने र स्वीकार्य कुरा थिएन । त्यसको अर्थ एउटा व्यक्तिका कारणले संस्थाप्रति वितृष्णा छ भन्ने होइन । त्यसैले अहिले हामी राजतन्त्रको पक्षमा छैनौँ तर आंलकारिक राजतन्त्र आउने अवस्थामा पार्टीले पुनर्विचार गर्न सक्छ । हामी अहिले पनि नेपाल निर्माता पृथ्वीनारायण शाहप्रति श्रद्धाभाव प्रकट गरिरहेका छौँ ।

प्रजातन्त्रको पक्षमा उभिएर राणा शासनको अन्त्य गराउने भूमिका निर्वाह गरेका कारण उनीप्रति पनि सम्मान छ । त्यसैगरी, नेपाललाई आधुनिकीकरण गर्ने, संयुक्त राष्ट्रसंघको सदस्यता दिलाउने भूमिकामा रहेका महेन्द्रप्रति पनि हामी सम्मान प्रकट गर्छौं । त्यसैले हामी संस्थाप्रति नकारात्मक छैनौँ । पार्टीका ससाना भूमिकामा हात हालेका कारण अहिलेको निर्मल निवासको भूमिकाप्रति भने प्रश्न उठाएका हौँ ।

जे–जसो सोचेर कमल थापाले पार्टी बनाउने प्रयास गर्नुभयो, त्यसरी उत्साह जागेको त देखिँदैन । स्थानीय चुनावमा भाग लिने कि नलिने ?

हामी चुनावमा भाग लिने तयारीमा छौँ । त्यसैअनुसार पार्टी संगठनको काम पनि भइरहेको छ । हाम्रो प्रभाव क्षेत्र कहाँ कति छ भनेर पहिचान गर्दैछौँ । त्यस आधारमा चुनावी रणनीति बनाउने प्रयास पनि भइरहेको छ । अहिलेसम्म केन्द्रीय समिति र जिल्ला कमिटीहरू बन्दैछन् ।

अहिलेसम्म १४ जिल्लामा जिल्ला कमिटी गठन भएका छन् । तीमध्ये कतिपय जिल्लामा राप्रपाका जिल्ला कमिटी नै समाहित भएका छन् । त्यसैले, परिस्थिति अनुकूल बनेका क्षेत्र र बनाउन सकिने क्षेत्रको पहिचान गरेर चुनावी रणनीति बन्छ ।

एमाले अध्यक्ष केपी ओली र कमल थापाको निकै दोस्ती छ । गठबन्धन पनि गर्ने कुरा हो ?

हो, अहिले हामी चुनावमा एमालेसँग गठबन्धन बनाएर जान सकिन्छ भनेर छलफलमा छौँ । अध्यक्ष कमल थापाले एमाले अध्यक्ष ओलीसँग छलफल पनि गरिरहनुभएको छ । हामी सकेसम्म गठबन्धन बनाएर जाने पक्षमा नै छौँ । कतिपय स्थानीय तहमा भने आवश्यकताका आधारमा दलीय समीकरण र गठबन्धन बन्न सक्छ ।

राजतन्त्र नै छोडेपछि चुनावमा के एजेण्डा लिएर जाने त ?

हामीले राजतन्त्रको नारा छोडेपछि सनातन हिन्दु राष्ट्र बनाउने पक्षमा उभिएका छौँ । त्यसैले, हिन्दु राष्ट्र र समुन्नतिको नारासहित हामी स्थानीय चुनावमा भाग लिने तयारीमा छौँ । त्यसैअनुसार पार्टीले आफ्ना नीति, कार्यक्रम र योजनाहरू तय गरेको छ । हामीले राजतन्त्रका बारेमा पनि केही स्पेस त बाँकी राखेका छौँ । अहिलेको गणतन्त्रप्रति पनि हामी खुसी छैनौँ । मुलुकसुहाउँदो नयाँ मोडेलको भू–अखण्डता र सार्वभौमिकता जोगाउने खालको शासनपद्धति चाहेका छौँ । जनकेन्द्रित राजनीतिअगाडि बढाउनुपर्ने भएकाले हामी त्यसैअनुसार अगाडि बढ्छौँ ।

प्रकाशित मिति: सोमबार, फागुन १६, २०७८ १३:२३