खप्तड र बडिमालिका घुम्न जाने आन्तरिक पर्यटक बढे, २५० जनाले गरे हेलिकोप्टरबाट अवलोकन

खप्तड र बडिमालिका घुम्न जाने आन्तरिक पर्यटक बढे, २५० जनाले गरे हेलिकोप्टरबाट अवलोकन

A+ A A-

सुदूरपश्चिम प्रदेशको प्रमुख पर्यटकीय एवं धार्मिकस्थल खप्तड र बडिमालिका घुम्न जाने आन्तरिक पर्यटक बढ्न थालेका छन् । हेलिकोप्टर टुर प्याकेज सुरु भएसँगै अहिले खप्तड घुम्न आउने आन्तरिक तथा बाह्यय पर्यटकको संख्या बढ्दै गएको हो ।

सुदूरपश्चिमको प्रसिद्ध धार्मिकस्थल बडिमालिका र खप्तडको भ्रमणका लागि गत वर्षबाट हेलिकोप्टर टुर प्याकेज ल्याइएको थियो । यस बर्ष हेलिकोप्टरमार्फत २५० जनाले बडिमालिका र खप्तडको भ्रमण गरेका छन् । कोरोनाले सुस्ताएको पर्यटनलाई चलायमान बनाउन खप्तड होमस्टे झिग्राना डोटीले माउन्टेन एयरको हेलिकोप्टरमार्फत खप्तड र बडिमालिका घुम्ने प्याकेज ल्याएको थियो ।

हिउँदामा भारी हिमपात हुने भएकाले पैदल र सडक मार्गबाट खप्तड जाने अवस्था नभएपछि खप्तड होमस्टे झिग्राना र खप्तड टुर एडभेन्चर प्रालिले हिँउसँग खेल्न रमाउने आन्तरिक पर्यटकलाई लक्षित गर्दै फागुन १ देखि १५ सम्मका लागि हेलिकोप्टर टुरको प्याकेज ल्याएको थियो ।

लामो समयदेखि चर्चामा मात्र आउने तर, भौगोलिक कठिनाइका कारण सम्भावना हुँदाहुँदै पनि ओझेलमा परेपछि खप्तड र बडिमालिका घुम्न हेलिकोप्टर टुरको प्याकेज ल्याइएको खप्तड होमस्टेका सञ्चालक दीपक खड्काले बताए । उनले भने, ‘गत वर्षदेखि हेलिकोप्टर टुर प्याकेज ल्याएका हौँ । आन्तरिक पर्यटकको राम्रो आकर्षण देखिएको छ । त्यसैले पनि यसवर्ष कोरोना महामारीका कारण थलिएको सुदूरपश्चिम प्रदेशको पर्यटनलाई नयाँ तरिकाले प्रवर्द्धन गर्ने उद्देश्यले टुर प्याकेजको कार्यक्रम ल्याइएको हो ।’

१ फागुनबाट सुरु भएको टुर प्याकेजमार्फत २ सय ५० जनाले खप्तड र बडिमालिकाको भ्रमण गरेका छन् । एक जना अमेरिकी र एक जना फ्रान्सेली नागरिकले पनि हेलिकोप्टरमार्फत खप्तडको भ्रमण गरेका छन् । गत वर्ष माघको दोस्रो साताबाट सुरु भएको टुर प्याकेजमार्फत १ सय ३५ जनाले खप्तड भ्रमण गरेका थिए । यस वर्ष खप्तड र बडिमालिका भ्रमण गर्नेको संख्या झण्डै दोब्बरले बढेको छ ।

खप्तडमा पर्यटकका लागि उचित आवासको सुविधा नभएकाले हिँउदमा पर्यटक प्रायः शून्य नै हुन्छन् । गत वर्षदेखि हेलिकोप्टर प्याकेज ल्याएसँगै आन्तरिक पर्यटकको संख्या बढ्दै गएको छ । खप्तड घुम्ने प्याकेजको व्यवस्था भएपछि गत वर्ष हिउँदे सिजनमा पनि खप्तडमा पर्यटकको चहलपहल बढेको थियो ।

पर्यटन बोर्डसँगै सुदूरपश्चिम प्रदेश सरकार र खप्तड राष्ट्रिय निकुञ्ज प्रवर्द्धक तथा नाट्टा सुदूरपश्चिम प्रदेश, माउण्टेन हेलिकोप्टर प्रालि, नेपाल उद्योग वाणिज्य महासङ्घ सुदूरपश्चिम प्रदेश र होटल व्यवसायी महासंघ सुदूरपश्चिम प्रदेशको सहकार्यमा हेलिकोप्टर टुर प्याकेज ल्याइएको थियो । हेलिकोप्टर टुर प्याकेजमा दिपायल, झिग्राना, साँफेबगर, धनगढी र महेन्द्रनगरबाट बडिमालिका र खप्तड क्षेत्रको अवलोकन गर्न सकिने व्यवस्था मिलाइएको छ ।

तस्वीर: दीपकबहादुर खड्का पर्यटन व्यवसायी/डोटी ।

प्रकाशित मिति: आइतबार, फागुन १५, २०७८ १७:५५