युक्रेनी शहरको बङ्करबाट नेपालीको चीत्कार- हामी सरकारलाई पर्खिरहेछौँ (भिडियाेसहित)

युक्रेनी शहरको बङ्करबाट नेपालीको चीत्कार- हामी सरकारलाई पर्खिरहेछौँ (भिडियाेसहित)

A+ A A-

रुस र युक्रेनबीचको बम हानाहानले शहर थर्किरहेको छ । युक्रेनको खार्किभस्थित अपार्टमेन्टको बंकरमा लुकी बसेका छन् सिरहाका अब्दुल बारीसहित केही नेपाली ।

रुसी बोर्डरबाट नजिकै रहेको यो शहरबाट भाग्न उनीहरूले धेरैखाले विकल्प प्रयाेग गरिसके तर सफल भएका छैनन् । खार्किभ टेक्निकल युनिभर्सिटी पोलिटेक्निकल इन्स्टिच्युटमा अध्ययरत अब्दुलका अनुसार खार्किभमा सार्वजनिक यातायात ठप्पजस्तै छ ।

ट्याक्सीमार्फत लभिव जान जनको ५ सय डलर भन्छ । उनीहरूसँग खानेकुरा पनि सकिँदो छ । एटीएम, बैंकहरू बन्द छन् । राशन पसलहरू पनि खुलेका छैनन् । बाहिरबाट कसैले पैसा पठाइदिए पनि निकाल्न मिल्ने अवस्था छैन ।

'खाना नै कसरी खाने भन्ने चिन्ता छ । ट्याक्सीमा जनको ५ सय तिरेर भाग्न हामी सक्दैनौँ', उनले भने, 'भारत, पाकिस्तान, केन्याले आफ्ना नागरिकलाई यातायातको व्यवस्था गरी सुरक्षित शहरतिर लान थालिसके, हामी आफ्नो सरकारलाई पर्खिरहेका छौँ ।'

याे पनि..

'गाडी भएकाहरू भाग्दैछन्, हामी अलपत्र पर्‍यौँ'

उनका अनुसार खार्किभमा ६० भन्दा बढी नेपाली अलपत्र छन् । खार्किभमै बस्ने भोजपुरकी निशा राई पैसा निकाल्न पनि नमिलेकाले आफू सुरक्षित स्थानतिर जान नसकेको बताउँछिन् । 'स्लोभाकियाले शरण दिने बताए पनि त्यहाँसम्म कसरी जानु, उपाय छैन । राशन सकिन लागेको छ । पैसा छैन । यस्तोमा ट्याक्सी पाए पनि रुमबाट बाहिर निस्कन हिम्मत आएको छैन', ह्वाट्सएप ग्रुपमा उनकाे अडियाे सन्देश छ ।

जर्मनीका लागि नेपाली राजदूत रामकाजी खड्का ह्वाट्स एप ग्रुपमार्फत युक्रेनका जोखिमपूर्ण शहरमा बस्ने नेपालीहरूलाई सचेत रहन भनिरहेका छन् । तर, दूतावासले खार्किभलगायतका शहरबाट आफ्ना नागरिकलाई सुरक्षित स्थानतिर सार्न प्रभावकारी पहल गर्न सकेको देखिँदैन ।

(रुस र युक्रेनबीच युद्धको निहुँ के हो ? थाहा पाउन यहाँ क्लिक गर्नुहोस्)

युक्रेनमा हवाई उडानहरू ठप्प छन् । 'मार्सल ल' लागू गरिएकाले सडकभरि सैनिकहरू छन् । कतिपय ठाउँमा मानिसहरूलाई सेनाले घरबाट बाहिर निस्कनसमेत नदिइरहेको त्यहाँस्थित नेपालीहरू बताउँछन् । यसैबीच युक्रेनमा रहेका नेपालीहरू पछिल्लो अवस्थाबारे गरिएको कुराकानी: