सातामा दोहोरो अंकले घट्यो शेयर बजार

A+ A A-

यो साता शेयर बजार दोहोरो अंकले घटेको छ । यो साता बजार मापक परिसूचक नेप्से ३१.६६ अंकले ओरालो लागेको हो । कारोबारको पहिलो दिन आइतबार २६९३.१० बिन्दुबाट सुरु भएको बजार कारोबारको अन्तिम दिन बिहीबार २६६१.४४ बिन्दुमा रोकियो ।

कारोबारको पहिलो दिन आइतबार ३९.४० अंकले घटेको शेयर बजार सोमबार २५.४१ अंकले बढ्यो । आइतबार ४ अर्ब ८ करोड ६४ लाख ७४ हजार रुपैयाँ बराबरको ७१ लाख २२ हजार कित्ता शेयर कारोबार हुँदा सोमबार २ अर्ब ९९ करोड ७६ लाख रुपैयाँ बराबरको ४९ लाख ९२ हजार कित्ता शयर कारोबार भयो । सोमबार बजार बढे पनि कारोबार रकम भने १ अर्ब ८ करोड ८८ लाख रुपैयाँ बराबरले घटेको छ ।

यस्तै, तेस्रो दिन मंगलबार पनि शेयर बजार दोहोरो अंक १७.४२ ले बढ्यो तर, पुनः बुधबार भने घट्यो । मंगलबार २७३५.९३ बिन्दु कायम गरेको बजारले बुधबार १५.५० अंकले घट्दै २७२०.४३ बिन्दु कायम गर्‍यो । बजार घट्दा कारोबार रकममा भने खासै घटबढ देखिएन । मंगलबार बढेको कारोबार रकम बुधबार स्थिर बन्न पुग्यो ।

साथै, कारोबारको अन्तिम दिन बिहीबार ५८.९९ अंकले घट्यो बजार । यसदिन ४ अर्ब २९ करोड ३८ लाख ६४ हजार रुपैयाँ बराबरको ८४ लाख ९० हजारभन्दा बढि कित्ता शेयर खरिदबिक्री भएको छ । बजार घटे पनि कारोबार रकम भने १ अर्ब बढिले वृद्धि भयो । यसको अर्थ बजारमा सामान्य गिरावट आउँदा बहिरिएका लगानीकर्ता पुनः लगानी गर्न आकर्षित भएको देखिन्छ ।

गत साताको तुलनामा यो साता नेप्से परिसुचक ७१.०७ अंकले घटेको छ । गत साता २७३२.५१ अंक कायम भएको शेयर बजार यो साता २६६१.४४ बिन्दुमा झरेको हो । अघिल्लो साता ३ करोड ५२ लाख २४ हजार कित्ता शेयर १८ अर्ब १९ करोड ९० लाखभन्दा बढी रुपैयाँमा कारोबार भएको थियो । तर, यो साता ३ करोड २९ लाख ३२ हजार कित्ता शेयर १४ अर्ब ७५ करोड ४४ लाख रुपैयाँ बराबरमा कारोबार भएको छ । यस साता कारोबार रकम ३ अर्ब ४४ करोड ४६ लाख रुपैयाँले घट्न पुग्यो ।

यो साता सबैभन्दा बढी शेयर कारोबार नेपाल दुरसञ्चार कम्पनीको भएको छ । कारोबारको दोस्रो, तेस्रो र चौथो दिन नै यस कम्पनीको सर्वाधिक शेयर कारोबार भएको थियो । यस साता उक्त कम्पनीको ६७ करोड ३७ लाख रुपैयाँ बराबरको शेयर कारोबार हुँदा शेयर मूल्य प्रतिकित्ता १ हजार ६९० रुपैयाँ कायम भएको छ । गत वर्षको लाभांश यस कम्पनीले हालसम्म पनि घोषणा गरेको छैन । सोही लाभांश घोषणाको अपेक्षाले पनि सर्वाधिक शेयर खरीदबिक्री भएको देखिन्छ ।

यस्तै, युनाइटेड आईडीआई मार्दी आर्वी हाइड्रोपावरको शेयर मूल्यमा कारोबारको चारै दिन सकारात्मक सर्किट लागेको छ । उक्त कम्पनीको शेयर मूल्य प्रतिकित्ता १ हजार १० रुपैयाँ कायम भएको छ ।

प्रकाशित मिति: शुक्रबार, फागुन १३, २०७८ १४:४५