रुस-युक्रेन तनाव : युक्रेनतर्फ १३७ मारिए, १ लाख मान्छे भागे, आक्रमणकाे विरोधमा रुसमै प्रदर्शन

रुस-युक्रेन तनाव : युक्रेनतर्फ १३७ मारिए, १ लाख मान्छे भागे, आक्रमणकाे विरोधमा रुसमै प्रदर्शन

A+ A A-

युक्रेनमाथि आक्रमणकाे विरोधमा रुसमै हजारौँ मान्छेले सडकमा प्रदर्शन गरेका छन् । राजधानी मस्को, सेन्ट पिटर्सबर्गलगायतका मुख्य शहरमा भएका प्रदर्शनमा प्रहरीले अहिलेसम्म १७ हजार जनालाई गिरफ्तार गरेकाे त्यहाँस्थित स्वतन्त्र मानव अधिकार समूहलाई उद्धृत गर्दै बीबीसीले लेखेकाे छ ।

रुसले हिजाेयता युक्रेनका विभिन्न शहरलाई लक्षित गरी सैन्य आक्रमण गरिरहेकाे छ । युक्रेनका विभिन्न भागमा रुसी सेना तीव्र गतिमा अघि बढिरहेका अन्तर्राष्ट्रिय समाचार संस्थाहरूले जनाएका छन् ।

विपक्षीहरूकाे प्रदर्शनका क्रममा हुने गिरफ्तारीबारे सूचना राख्ने समूह ओभीडी इन्फोले मस्कोमा ९ सय र सेन्ट पिटर्सबर्गमा ४ सय जना प्रदर्शनकारी गिरफ्तारीमा परेका जनाएकाे छ ।

बीबीसीका अनुसार युद्ध र आक्रमणकाे विरोधमा प्लेकार्डसहित हजारौँ मानिस सडकमा रहेको सामाजिक सञ्जालमा राखिएका पोस्टमा देखिन्छ। रुसमा मात्र हाेइन, संसारका अरू देशका कतिपय शहरमा पनि युद्धको विरोधमा प्रदर्शनहरू भएका छन् ।

न्यूयोर्कस्थित संयुक्त राष्ट्रसंघका लागि रुसी नियोगको कार्यालयअगाडि सयौँ प्रदर्शनकारीले नाराबाजी गरेका छन् । युद्ध चर्किदै गएसँगै युक्रेनमा रात्रिकालीन कर्फ्यु लगाइएकाे छ ।

रुसले कब्जा गरेकाे भनिएको क्षेत्र पुन: आफ्नो नियन्त्रणमा लिएको दाबी युक्रेनले गरेको छ । युक्रेनी राष्ट्रपति भोलोदिमिर जेलेन्स्कीले लडाइँ जारी रहने बताएका छन् । भिडियाे सन्देशमा उनले बताएअनुसा अहिलेसम्म सेना र सर्वसाधारण गरी १ सय ३७ युक्रेनी नागरिकले ज्यान गुमाएका छन् ।

युद्धका कारण एक लाखभन्दा बढी मानिस युक्रेन छाेडेर भागेकाे अनुमान संयुक्त राष्टसंघले गरेकाे छ ।

प्रकाशित मिति: शुक्रबार, फागुन १३, २०७८ ०७:५५