'शिखरले यसैवर्ष ४० करोडको कृषि बीमा गर्छ, कोरोना बीमा भुक्तानी हुने वातावरण बन्दैछ'

'शिखरले यसैवर्ष ४० करोडको कृषि बीमा गर्छ, कोरोना बीमा भुक्तानी हुने वातावरण बन्दैछ'

A+ A A-

लामो समयदेखि कोरोना बीमा अन्तर्गतको दाबी भुक्तानी हुन सकेको छैन । करिब १५ अर्ब रुपैयाँको दाबी भुक्तानी माग गरेको अवस्थामा अहिलेसम्म करिब ५ अर्ब मात्रै भएको छ । सरकारले कृषि बीमालाई बढी प्राथमिकतामा राखेको छ । यद्यपि अझै पनि कृषि बीमा अपेक्षित रूपमा बढ्न सकेको छैन । अहिले पनि समग्र बीमा पहुँच ३५ प्रतिशत माथि पुग्न सकेको छैन ।

अहिलेको बीमा बजार, बजारमा देखिएको प्रतिस्पर्धा र आगामी योजनालाई केन्द्रित गरेर शिखर इन्स्योरेन्सका प्रमुख कार्यकारी अधिकृत दिपप्रकाश पाण्डेसँग लिइएको अन्तर्वार्ता ।

बीमा क्षेत्रमा अस्वस्थ प्रतिस्पर्धा बढ्यो भनिएको छ, के पाउनुहुन्छ ?

मार्केट गतिशील छ । केही समयघि बजारमा नयाँ कम्पनी आएपछि अस्वस्थ प्रतिस्पर्धा भयो कि भन्ने होला ।तर, जसले नीति नियम पूरा गरेर काम गर्‍यो, सायद त्यस्ता कम्पनीलाई धेरै फरक पर्दैन होला । स्वच्छ प्रतिस्पर्धा गर्नेलाई नै बजारले पत्याउँछ । शिखर इन्स्योरेन्सले गएको वर्ष ३ अर्ब ९६ करोडको प्रिमियम संकलन गरेको थियो । यस आर्थिक वर्षमा ५ अर्ब भन्दा बढी गर्ने लक्ष्य राखिएको छ ।

हरेक क्षेत्रमा निश्चित संख्या पुगेपछि रोक लगाइन्छ, बीमामा पनि यो देखिन्छ । यसरी रोक्नु बजारलाई विश्वास नगरेको जस्तो लाग्दैन ?

हामी पनि १५औँ खेलाडी हौँ । त्यसअघि आएकोहरूले हामी चाहिँदैनौँ भन्ने पनि सोच्नुभएको थियो होला । अहिले हामीले पुग्याे भनौँला । तर, बजार अध्‍‍यन गर्नुपर्‍यो, दक्ष जनशक्ति हुनुपर्‍यो, पुँजीको अवस्था पनि हेर्नुपर्‍यो, अनि पोडक्ट गर्ने क्षमता छ कि छैन भन्ने विषयमा अध्ययनका साथै नियमनकारी निकायले नियमकीय भूमिका खेल्ने क्षमता पनि हुन्छ भने नयाँ कम्पनी आउन दिनुपर्छ ।

बीमाको दायरा विस्तार गर्ने भनिएको छ । तर अहिले पनि ३५ प्रतिशत मात्रै पहुँच छ । यस्तो अवस्थामा तपाईँहरूले कोराेना बीमाकाे भुक्तानी गर्न सक्नु भएको छैन नि ?

खासमा हाम्रो बजार विस्तार हुन नसक्नु हाम्रो क्रयशक्ति नबढेको कारण हो । हाम्रो मार्केट सधैँ दबाबमूलक नै रहेको छ । कोरोना बीमा समयमा भुक्तानी नभएकोमा चिन्ता लागेको छ । कोरोना बीमाको पैसा सरकारले प्रतिबद्धता गरेअनुसार तिरिदिएको भए यो मार्केट अझ फड्को मार्ने थियो । तर महामारीको बीमा थियो । विपत्तिको इन्स्योरेन्स गर्दा जहिले पनि पुनर्बीमा कम्पनीको सहयोग लिइन्छ । यो बीमा गरिब जनतामा पुर्‍याउन सकियोस् भनेर ल्याएका थियौँ ।

सरकारले अपनत्व लिएका कारण लोकप्रिय भयो । धेरै लोकप्रिय भएपछि धान्न सक्ने अवस्थाभन्दा माथि पुग्यो । किनभने यसमा पुनर्बीमा गरिएको थिएन । त्यसपछि हामीले एक दिनका लागि स्थगित पनि गरेका थियौँ । पछि सरकारले दायित्व बाँडफाँटको कुरा निकाल्यो । बीमा कम्पनीले निश्चित रकम तिरेपछि बाँकी सरकारले तिर्ने भनेका कारण अघि बढाइएको थियो ।

सरकारलाई विश्‍वास गरेर अघि बढाइयो । कोरोना बीमाको लोकप्रियताका कारण बीमा क्षेत्रमा यसले निकै सकारात्मक सन्देश जान्छ । केही ढिला भए पनि बीमा भुक्तानी भयो भन्ने हुन्छ । ढिला गर्‍यो भनेर नकारात्मक सन्देश गएको छ । सरकारबाहेक पनि ५ अर्ब तिरिएको छ । आगामी आर्थिक वर्षमा करमा समायोजन गरेर बजेटमा राखेर भए पनि हामीलाई सरकारले प्रतिबद्धता गर्‍यो भने हामीले भुक्तानी प्रकिया अघि बढाउछौँ । यो ढिला गर्नु हुँदैन, छिटो गर्नुपर्छ ।

अहिले बजारमा लगानीयोग्य रकमको अभाव पनि देखिएको छ र बीमामा करिब ५५ प्रतिशत योगदान गरेको अटोको आयातमा निरुत्साहित नीति लिएकाे सन्दर्भमा कस्तो प्रभाव देखिएको छ ?

तरलता अभावले बीमा क्षेत्रलाई पनि असर गरेको छ । अटोको विषयमा भने शिखर इन्स्योरेन्सले ३ वर्षअघि देखि नै अन्य क्षेत्रमा बजार विस्तार गरेका कारण हामीलाई त्यति धेरै असर नगर्ला । तर, समग्र बजारमा एक प्रकारको असर भने गर्नेछ । हामी निरन्तर बजार विस्तारमा छौँ । १५ वर्षअघि शहरबाहेक बाहिर जान सकेको अवस्था थिएन । अहिले शिखरले मात्रै १२५ शाखा खोलेर अघि बढ्न थालेकाे छ । साढे ७ सय कर्मचारी राखेका छौँ, यो मार्केट विस्तारको लागि नै ।

मौसम सूचकाङ्क आधारित कृषि बीमा गराइरहनु भएको छ । कृषिलाई बढी प्राथमिकतामा राखेको पनि दाबी छ । आकर्षण कस्तो छ ?

कृषि बीमालाई सरकारले पनि प्राथमिकतामा राखेको छ । ८० प्रतिशतसम्म अनुदान दिएको छ । कृषि बीमामा आकर्षण पनि बढ्दै गएकाे पाइन्छ । शिखरले २ वर्षअघि १० करोडको कृषि बीमा गरेको थियो भने गत वर्ष २१ करोड र अहिले ४० करोडको लक्ष्य राखेका छौँ ।

केही वर्ष पहिले फर्कियौँ भने हरेक चैत वैशाखमा किसानहरू कृषि मन्त्रालयमा आएर खेती मासिएको भन्दै अनुदान माग गरेका हुन्थे । अहिले बीमाले समेट्न थालिसक्यो । ६ वर्ष पहिले मौसमी सूचकाङ्कमा आधारित स्याउको बीमा गराउँदा २ लाख प्रिमियम उठाएका थियौँ । अहिले ६ करोड पुगिसक्यो । किसानमा आत्मविश्वास बढेको छ ।

भिडियो

प्रकाशित मिति: मंगलबार, फागुन १०, २०७८ १०:४७