रामचन्द्रलाई प्रश्न : सत्ता घटक एमसीसीको विपक्षमा उभिए गठबन्धन के हुन्छ ?

A+ A A-

प्रधानमन्त्री शेरबहादुर देउवाले अमेरिकी सहायता परियोजना एमसीसी जसरी पनि पारित गर्ने अडान लिएपछि त्यसमा सत्ता घटकको पनि समर्थन जुटाउने उद्देश्यले कांग्रेस वरिष्ठ नेता रामचन्द्र पौडेल सोमबार सक्रिय बने । सोमबार उनले माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्‍यक्ष उपेन्द्र यादवसँग भेटवार्ता गरेका छन् । उनीहरूसँग पौडेलले के कुरा गरे र सत्ताघटका दलले एमसीसीको विपक्षमा मतदान गरे गठबन्धन के हुन्छ ? शिलापत्र संवाददाता शिशिर ढकालले पौडेललाई प्रश्न गरेका छन् ।

आज तपाईंले गठबन्धनका शीर्ष नेताहरूसँग भेटवार्ता गर्नुभयो, यो भेटको उद्देश्य के हो ?

अमेरिकी सहायता परियोजना एमसीसी संसदमा टेबल भएको छ । प्रधानमन्त्रीजी एमसीसी पारित गर्ने अडानमा हुनुहुन्छ । यो विषयमा सत्ता गठबन्धनका दल पनि सहमत हुनुपर्‍यो भनेर मैले भेट गरेको हुँ । गठबन्धन भत्किन लाग्‍यो यसलाई जोगाऔँ भन्ने मेरो उद्देश्य हो ।

तपाईंले भेट गरेका तीन नेताले एमसीसी पारितमा सहयोगका लागि सहमति जनाउनुभयो त ?

माओवादी केन्द्रका अध्यक्ष प्रचण्ड र जनता समाजवादीका अध्यक्ष यादवजी प्रक्रियाबाट टुंगो लगाउने विषयमा सकरात्मक नै देखिनुभयो । माधवजीले पार्टीले विपक्षमा मतदान गर्ने निर्णय गरेको कुरा सुनाउनुभएको छ । माधवजीलाई सहमति जनाउनुपर्‍यो भनेको त भर्खरै विपक्षमा मतदान गर्ने निर्णय गरेर आएँ भन्नुभयो ।

माओवादी केन्द्रभित्र एमसीसी पारित गरे सरकारबाट बाहिरिनुपर्ने दबाब छ, प्रचण्डले तपाईंसँग के भन्नुभयो ?

यो गठबन्धनलाई जोगाएर जाने विषयमा उहाँसँग कुराकानी भएको छ । गठबन्धन जोगाऔँ यसलाई उचित प्रक्रियाबाट टुंगो पुर्‍याउँ भन्ने कुरा गर्नुभएको छ गर्नलाई । तर, हेरौँ उहाँ कसरी अघि बढ्नुहुन्छ ।

एमसीसीको विषयमा गठबन्धनका दलले विपक्षमा निर्णय गरे यो गठबन्धन के हुन्छ ?

एमसीसीकै कारण गठबन्धन भत्किने स्थिति आउन लाग्यो । दलहरूले एमसीसी त गिजोले गिजोले गठबन्धन भत्कियो भने राजनीति पनि गिजोलिन्छ । त्यही भएर मैले नेताहरू अब गम्भीर हुनुपर्‍यो भनेको हो ।

कांग्रेसभित्रै पनि गठबन्धन गर्नुहुन्न भन्ने मत छ । तपाईं जोगाउने पक्षमा उभिनुभएको छ । यो गठबन्धन किन जोगाउनुपर्छ ?

राजनीतिक स्थिरताका लागि गठबन्धन जोगाउनै पर्छ । मुलुकले धेरै अस्थिरता र अनिश्चय व्यहोर्‍यो । देश सधैँ अन्यौलमै भइरह्यो, मुलुकले गति लिनै सकेन । मुलुकलाई अस्थिरताबाट बचाउन गठबन्धन जोगाउनै पर्छ ।

एमसीसीमा सत्ता गठबन्धनका दलले समर्थन नजनाएको स्थितिमा प्रधानमन्त्री गठबन्धन जाेगाउन तयार हुनुहुन्छ त ?

प्रधानमन्त्रीले त एमसीसीमा सहयोग नगर्ने पार्टीसँग गठबन्धन गर्न सकिँदैन भन्ने कुरा गर्नुभएको छ । त्यही भएर गठबन्धन जोगाउन पनि अरु दलले प्रधानमन्त्रीलाई सहयोग गर्नुपर्छ । मैले पनि गठबन्धन जोगियोस् भनेर नै सहमति जुटाउने कोसिस गरेको हुँ ।

गठबन्धनमा रहेका दल एमसीसीको विपक्षमा उभिए कसरी पारित गर्ने तयारी छ ?

सबै दललाई सहमतिमा ल्याउने कोसिस जारी नै छ । आजको छलफलमा प्रचण्डजी र उपेन्द्रजीले सकरात्मक कुरा गर्नुभएको छ । उहाँहरू पछि हटेको स्थितिमा संसदमा उपस्थित संख्याको बहुमतले पारित गर्ने कुरा हुन्छ । त्यसो गर्दा हाम्रै सांसदको बहुमत पुगिहाल्छ नी !

प्रकाशित मिति: सोमबार, फागुन ९, २०७८ २०:४७