एमसीसीमा माओवादी र एसकाे अडानले गठबन्धन वारपारतर्फ, अन्तिम छलफलकाे कसरत

A+ A A-

अमेरिकी सहायता परियोजना एमसीसीले सत्ता गठबन्धनमा तीव्र ध्रुवीकरण निम्त्याएको छ । एमसीसी संसदमा टेबल हुन नसक्दा सत्ता गठबन्धन टुट्ने अवस्थामा पुगेको हो । गठबन्धनको भविष्य संकटमा पर्न नदिने उद्देश्यले बिहीबार सत्ता गठबन्धनको शीर्ष नेतृत्वबीच छलफल हुँदैछ ।

कांग्रेसले एमसीसीमा जबर्जस्ती गरे सत्ता छाड्ने चेतावनी माओवादी केन्द्रले दिइसकेको छ । एकीकृत समाजवादीले यही भाषा नबोले पनि जबर्जस्ती सह्य नहुने बताएको छ । यता कांग्रेसमा पनि उग्रवापन्थीप्रति कांग्रेसको रुझान नरहेकाले आवश्यक परे गठबन्धन छोड्नुपर्ने मत बलियो बन्दै गइरहेको छ ।

बुधबार बसेको संसद बैठकमा एमसीसी प्रस्ताव सदनमा पेस गर्न कांग्रेसको जोड थियो । त्यसअघि माओवादी केन्द्रको संसदीय दलको बैठकमा अध्यक्ष पुष्‍पकमल दाहाल प्रचण्डले एमसीसीमा कांग्रेसको जबर्जस्ती स्वीकार्य नहुने ब्रिफिङ गरे । 'एमसीसीमा कांग्रेसको जबर्जस्ती स्वीकार्य हुँदैन । टेबल नगर्नका निम्ति म प्रधानमन्त्रीजीलाई अनुरोध गर्छु । जबर्जस्ती टेबल भयो भने त्यसको असर ब्यहाेर्न तयार छौँ,' प्रचण्डले संसदीय दलको बैठकमा भने, 'गठबन्धन तोड्ने स्थिति आए पनि परेको ब्यहाेर्ने हो ।'

संसदीय दलको बैठकलगत्तै माओवादी केन्द्रका अध्यक्ष प्रचण्ड प्रधानमन्त्री शेरबहादुर देउवालाई भेट्न बालुवाटार पुगे । त्यहाँ उनले बुधबारको बैठकमा एमसीसी अघि नबढाउन र यस विषयमा गठबन्धनका शीर्ष नेताबीच छलफल राख्न आग्रह गरे । प्रचण्डको आग्रहपछि प्रधानमन्त्रीले बिहीबार दिउँसो ३ बजे पाँचदलीय गठबन्धनको बैठक बोलाएका छन् । बालुवाटारमा एमसीसी अघि नबढाउने सहमति भएपछि कार्यव्यवस्था परामर्श समितिको बैठकमा सभामुख सापकोटाले बुधबारको कार्यसूचीमा एमसीसी नराख्ने निर्णय सुनाए ।

बुधबारको बैठकमा एमसीसी टेबल नभए पनि शुक्रबारका लागि आह्वान भएको बैठकमा एमसीसी पेस हुने कानुनमन्त्री दिलेन्द्र बडूले बताएका छन् । 'कार्यव्यवस्था समितिमा एमसीसीको एजेण्डामा सहमति बनेन, प्रधानमन्त्रीले गठबन्धनका अन्य दल र सभामुखसँग समेत छलफल गरेर आगामी बैठकमा पेस गर्ने तयारी छ,' संसद बैठकपछि कानुमन्त्री बडूले भने ।

प्रधानमन्त्री देउवा एमसीसी जसरी पनि सदनमा अघि बढाउने विषयमा दृढ रहेको उनले बताए । सडकमा चलिरहेको एमसीसी बहसलाई अब सदनमा चलाउने उनले बताए । 'सडकमा चलिरहेको एमसीसी बहसलाई टुंग्याएर संसदमा बहस चलाउने उद्देश्यले एमसीसी अघि बढाउन खोजिएको हो । दुईदिनभित्र सहमतिका लागि कोसिस गर्ने र एमसीसी अघि बढाउने हाम्रो प्रयास छ,' कानुनमन्त्रीले भने ।

गठबन्धनमा ध्रुवीकरण, टुट्न सक्ने चेतावनी

एमसीसीकै कारणले गठबन्धनमा ध्रुवीकरण तीव्र बनिरहेको छ । माओवादी केन्द्र र एकीकृत समाजवादीले आफ्ना जनवर्गीय संगठनलाई सडकमै उतारेका छन् । बुधबारको एमसीसीविरुद्ध भएको आन्दोलनमा माओवादी केन्द्रका नेता नारायणकाजी श्रेष्ठ सडकमै उत्रिएका थिए । माओवादीको संसदीय दलले नै एमसीसीमा जबर्जस्ती गरे सत्ता छोड्ने चेतावनी दियो ।

संसद बैठकपछि सञ्चारकर्मीहरूलाई प्रतिक्रिया दिँदै एकीकृत समाजवादीका नेता झलनाथ खनालले एमसीसीमा कसैको जोडबल आफ्नो पार्टीलाई मान्य नहुने प्रतिक्रिया दिएका छन् । 'एमसीसी सहमतिको विषय हो । सहमतिको विषयमा कसैको पनि धाकधम्की वा चेतावनी सह्य हुँदैन । यसमा जबर्जस्ती गर्न मिल्दैन,' खनालले भनेका छन् ।

माओवादी केन्द्र र एकीकृत समाजवादीकाहो नेताहरूले मात्रै इन, गठबन्धनको विषयमा कांग्रेसले पनि अब निर्णय लिने बेला आएको बताएकाे छ । मंगलबार कांग्रेसको संसदीय दलको बैठकमा सांसदहरूले एमसीसीका विरोधी शक्तिहरूसँग कांग्रेसले गठबन्धन गर्न नहुने मत राखेका थिए । त्यस मतप्रति सहमत हुँदै सभापति देउवाले भने, 'एमसीसीको विरोध गर्ने अनि भोलि चुनावमा भोट माग्न जाँदा हामीलाई राष्ट्रघाती र आफू राष्ट्रवादी भनेर सँगै जान पनि मिल्दैन होला ।'

कांग्रेसभित्र देउवालाई उग्रवामपन्थी शक्तिप्रति रुझान नराख्न पनि दबाब छ । आफैँ सहभागी भएर गरेको एमसीसी सम्झौतालाई कम्युनिस्ट पार्टीहरूले चुनावी नाफा-घाटाको विषय बनाएको भन्दै उनीहरूसँग दीर्घकालीन सहकार्य घातक हुने मत कांग्रेसमा बढ्दै गएको छ । संसद बैठकपछि कांग्रेस नेता मिनेन्द्र रिजालले कांग्रेसले एमसीसी अघि बढाएपछिको परिस्थितिको सामाना गर्न तयार हुनुपर्ने बताए । 'एमसीसीको विषयमा कांग्रेस प्रस्ट छ, यसलाई अघि बढाउनैपर्छ । उग्रवामपन्थीसँग रुझान राखेर यसमा पछि हट्ने कुरा हुँदैन । आफ्नो सिद्धान्तमा अडिग रहेर आवश्यक परे प्रतिपक्षमा बस्न पनि तयार हुनुपर्छ ।'

एमसीसीको विषयमा माओवादी केन्द्रका अध्यक्ष प्रचण्डले कांग्रेसलाई धोका दिएको कांग्रेस सांसदहरूको मत छ । मुलुकलाई कूटनीतिक रूपमा अप्ठ्यारोमा पार्नुभन्दा गठबन्धनको भविष्यमा चिन्ता नगरी कांग्रेस अघि बढ्नुपर्ने सांसद दिव्यमणि राजभण्डारीले बताए । 'यो सम्झौता मुलुक विकासका निम्ति आएको अनुदान हो । यसलाई अघि बढाउने सहमति गरेर बखेडा झिक्दै अहिले हामीलाई धोका दिने काम भइरहेको छ । कांग्रेस यस एजेण्डामा प्रस्ट छ, हामीले धोका पाए पनि मुलुकलाई धोका हुने स्थिति आउन दिँदैनौँ, गठबन्धनको चिन्ता नगरी अघि बढाउँछौँ ।'

गठबन्धनका दलहरू माओवादी केन्द्र र एकीकृत समाजवादी एमसीसी अघि नबढाउने विषयमा अडिग र कांग्रेस यसलाई सदनमा टेबल गर्ने विषयमा दृढ रहँदा गठबन्धन टुट्ने डिलमा पुगेको छ । यसबारे निर्णायक वार्ता बिहीबार हुँदैछ ।

प्रकाशित मिति: बुधबार, फागुन ४, २०७८ १८:४०