बप्पीलाई जब राजकुमारले उडाउँदै भने- तिम्रो गलामा मंगलसुत्रकाे मात्रै कमी

A+ A A-

बलिउडलाई धेरै यादगार गीत दिने संगीतकार तथा गायक बप्पी लाहिरीको निधन भएको छ । लता मंगेशकरको निधन भएको केही दिनपछि बलिउडमा अर्को क्षति भएको भन्दै कलाप्रेमीहरूले शोक व्यक्त गरेका छन् ।

बप्पीले आज बिहान मुम्बईको एक अस्पतालमा अन्तिम स्वास लिए। बप्पी इन्डस्ट्रीमा ‘गोल्ड म्यान’ को नामले चर्चित थिए । उनलाई सुनका गहनाप्रति कति माया थियो भन्ने सबैलाई थाहा छ । तर एकपटक सुनले भरिएका बप्पीलाई बलिउड अभिनेता राजकुमारले खिल्ली उडाएका थिए । यो किस्सा बलिउडमा चर्चित छ‌ ।

बप्पी लाहिरी शान्त स्वभावका थिए । सुपरस्टार राजकुमारसँग उनको पहिलो भेट एक पार्टीका क्रममा भएको थियो । बप्पी लाहिरीलाई गहना मनपर्थ्यो । त्यसैले उनी पार्टीमा पनि गहना लगाएर पुगेका थिए । बप्पीलाई गहनाले भरिएको देखेर राजकुमारले उनको मजाक उडाए । उनले बप्पीलाई नियाल्दै भने, 'सान्दार छ, तिमीले यति धेरै गरगहना लगाएका छौ, अब मंगलसुत्रको मात्रै कमी छ, लगायो भने पनि राम्रो देखिन्छ ।'

राजकुमार साहबको यो कुरा बप्पी लाहिरीले केहीबेर बुझेनन्, जब बुझे उनले चित्त दुखाए । तर उनले पार्टीको वातावरण बिगार्न चाहेनन् । बप्पीको जन्मदिनमा गतवर्ष बप्पीका फ्यानले सोचेका थिए- उपहारका रूपमा उनले सुनका गहना पाउलान् । तर यसपटक श्रीमतीले उनलाई सुनको चिया सेट उपहार दिएकी थिइन् ।

बप्पी दाको नामले चर्चित आलोकेश लाहिरी ६९ वर्षका थिए । उनले भारतीय सिनेमामा डिस्को संगीतको प्रयोगलाई लोकप्रिय बनाए । सन् १९८० को दशकमा आफ्नो संगीत र गीतबाट मानिसको मन जित्ने बप्पी लाहिरीले डिस्को डान्सर, शराबी र नमक हलाल जस्ता सुपरहिट फिल्ममा गीत गाएका थिए । बप्पीको जन्म २७ नोभेम्बर १९५२ मा पश्चिम बंगालको जलपाईगुडीमा भएको थियो । उनी बंगाली ब्राह्मण परिवारका थिए ।