दुई विश्वविद्यालयबीच जग्गा विवाद उत्कर्षमा

A+ A A-

कृषि तथा वन विज्ञान विश्वविद्यालय (एएफयू) र त्रिभूवन विश्वविद्यालय (त्रिवि) बीच जग्गाको विवाद बढेपछि वन विज्ञान संकाय हेटौँडा क्याम्पस मकवानपुरमा एएफयूले निर्माण गर्न लागेको भवनको काम रोकिएको छ ।

यही ९ असारमा एएफयूले शिलान्यास गरेर शैक्षिक भवनको निर्माण कार्य सुरु गरेको थियो । प्रदेश ३ का मुख्यमन्त्री डोरमणि पौडेलले भवनको शिलान्यास गरेका थिए ।

एएफयूका उपकुलपति प्राडा. ईश्वरीप्रसाद ढकालले दुई विश्वविद्यालयबीच भएको सहमतिअनुरुपको जग्गामा भवन निर्माण गरिएकोमा त्रिविले रोकेको बताए । उनले दुई विश्वविद्यालयका रजिस्ट्रारसहितको टोलीले दिएको प्रतिवेदन र त्रिविको सिनेटमा समेत बाटोछेउको जमिन एएफयुलाई दिने भनी गरिएको निर्णयअनुसार सोही ठाउँमा भवन निर्माण थालिएको जानकारी दिए ।

उनका अनुसार मन्त्रिपरिषद्ले रामपुरको ३ सय ३८ बिघा जमिनमध्ये ४० बिघा १९ कठ्ठा त्रिविलाई इन्जिनियिङ कलेज निर्माण गर्न दिने र हेटौंडाको १ सय ५८ बिघा जमिनमध्ये ६० बिघा एएफयूलाई दिने निर्णय भएको थियो ।

रामपुरमा त्रिविलाई भवन निर्माण गर्न १५ करोड र हेटौंडामा एएफयूलाई भवन निर्माण गर्न सोही बराबरको रकम दिने निर्णय भएको ढकालले बताए । दुई विश्वविद्यालयबीच रामपुरमा त्रिविलाई र हेटौंडामा एएफयूलाई बाटो छेउमा जमिन दिने सहमति भएको ढकालको भनाइ छ ।

तर, त्रिविका उपकुलपति प्राडा. तीर्थ खनियाले हेटौंडामा एएफयूलाई बाटो छेउमा नभएर बाटो दिएर भित्र जमिन दिने निर्णय भएको भए पनि एएफयूले त्रिविको जमिनमा भवन बनाउन सुरु गरेका कारण काम रोकिएको बताए ।

सरकारको र सिनेटको निर्णय मान्न त्रिवि तयार रहेको भन्दै उनले एएफयूले सहमतिअनुसार भवन निर्माण गर्नुपर्ने बताए। सो स्थानमा एएफयूले ९ करोड ८८ लाखमा शैक्षिक भवन निर्माणको काम सुरु गरेको हो ।

प्रकाशित मिति: शुक्रबार, असार १३, २०७६ १७:००