आफ्नालाई नियुक्ति गर्ने बागमती सरकारको पहिलो निर्णयमै धक्का

A+ A A-

तत्कालीन नेकपा एमाले सरकारबाट नियुक्ति पाएकालाई हटाउँदै आफ्नालाई नियुक्ति गर्ने बागमती सरकारको पहिलो निर्णयमै धक्का लागेको छ ।

उच्च अदालत पाटन हेटौंडा इजलासले स्वास्थ्य मन्त्रालयले जिल्ला आयुर्वेद स्वास्थ्य केन्द्र मकवानपुरको अध्यक्ष हटाउने निर्णय कार्यान्वयन नगर्न सोमबार अल्पकालीन अन्तरिम आदेश दिएको छ । जिल्ला आयुर्वेद स्वास्थ्य केन्द्र मकवानपुरका अध्यक्ष मधु बजगाईं क्षत्रीलाई हटाएर स्वास्थ्यमन्त्री निमा लामाले २८ माघमा कांग्रेस निकट सुदीप बर्तौलालाई नियुक्त गरेका थिए ।

मन्त्रीस्तरको निर्णयले अध्यक्ष बजगाईंसहित प्रदेशका सबै जिल्ला अस्पतालका अध्यक्ष र जिल्लास्थित आयुर्वेद स्वास्थ्य केन्द्रका अध्यक्ष हटाएको थियो । मन्त्रालयले १३ वटै जिल्ला आयुर्वेद स्वास्थ्य केन्द्रमध्ये मकवानपुरमा मात्रै बजगाईंलाई हटाएर बर्तौलालाई नियुक्त गरेको थियो । मन्त्रालयको निर्णयविरुद्ध अध्यक्ष बजगाईंले स्वास्थ्य मन्त्रालय, स्वास्थ्यमन्त्री, जिल्ला आयुर्वेद स्वास्थ्य केन्द्र मकवानपुर र सुदीप बर्तौलासमेतलाई विपक्षी बनाएर अदालतमा मुद्दा दायर गरेका थिए ।

उच्च अदालत पाटन हेटौंडा इजलासका न्यायाधीश मेरिना श्रेष्ठको इजलासले आयुर्वेद स्वास्थ्य केन्द्र मकवानपुरका अध्यक्ष बजगाईंलाई हटाउने निर्णय कार्यान्वयन नगर्न अल्पकालीन अन्तरिम आदेश जारी गरेको हो । मुद्दा दायर गर्ने बजगाईं र विपक्षीहरु सबैलाई ११ फागुनमा छलफलका लागि अदालतमा उपस्थित हुन आदेशमा भनिएको छ । बजगाईंका तर्फबाट अधिवक्ताहरु मदनकुमार दाहाल, धुर्वप्रसाद चौलागाईं, मनप्रसाद भट्टराई, प्रमिला केसी, ऋषी केवी, शिव प्रसाद बञ्जराले बहस गरेका थिए ।

६ जिल्ला अस्पतालमा अध्यक्ष नियुक्त

नेपाली कांग्रेस, माओवादी केन्द्र, नेकपा (एकीकृत समाजवादी) को बर्तमान गठबन्धन सरकारले अघिल्लो सरकारले प्रदेशअन्तर्गतका जिल्ला अस्पतालमा नियुक्त गरेका अध्यक्ष हटाएर नयाँ नियुक्ति पनि गरिसकेको छ ।

मन्त्रीस्तरीय निर्णयबाट प्रदेशका ६ वटा अस्पताल व्यवस्थापन समितिमा नयाँ अध्यक्ष नियुक्त भइसकेको मन्त्रालयले जानकारी दिएको छ । ललितपुरको बज्रबाराही चापागाउँ अस्पताल अध्यक्षमा कृष्णचन्द्र महर्जन, भक्तपुरको भक्तपुर जिल्ला अस्पताल अध्यक्षमा रमण कायस्थ, सिन्धुपाल्चोकको चौतारा अस्पताल अध्यक्षमा टंकबहादुर कार्की, दोलखाको चरिकोट अस्पताल अध्यक्षमा जयराम श्रेष्ठ नियुक्त भएको मन्त्रालयले जानकारी दिएको छ ।

रामेछाप अस्पताल अध्यक्षमा यमकुमार पाख्रिन, सिन्धुली अस्पताल अध्यक्षमा विजय कुँवर नियुक्त भएका छन् । नवनियुक्त अस्पताल अध्यक्षहरु सबै कांग्रेस निकट हुन् । हेटौंडा अस्पतालबाहेक अन्य ६ वटा जिल्ला अस्पतालमा भने गठबन्धनमा छलफल गरेर नियुक्त गरिने मन्त्रालय स्रोतले जानकारी दिएको छ ।

‘गत शुक्रबार कांग्रेसको कोटामा परेकाहरु अध्यक्षमा नियुक्त भइसकेका छन् । अब बाँकी अस्पतालमा गठबन्धनमा छलफल गरेर मात्रै नियुक्त गर्ने तयारी छ,’ मन्त्रालय स्रोतले भन्यो ।

हेटौंडा अस्पताल मदन भण्डारी स्वास्थ्य विज्ञान प्रतिष्ठानअन्तर्गत रहेकाले यहाँ तत्काल अध्यक्ष नियुक्त हुने छैनन् । हेटौंडा अस्पतालमा प्रतिष्ठानका रजष्ट्रिार नै अस्पताल व्यवस्थापन समितिको अध्यक्ष हुने व्यवस्था छ ।

१८ माघमा स्वास्थ्य मन्त्रालयले मन्त्रीस्तरीय निर्णय गर्दै प्रदेशअन्तर्गतका अस्पताल व्यवस्थापन समितिका अध्यक्ष हटाउने तयारी स्वरुप स्पष्टीकरण सोधिएको थियो । कतिपय अध्यक्षहरुले स्पष्टीकरण पठाएका थिए भने कतिले जवाफ दिएका थिएनन् । रामेछाप अस्पतालका अध्यक्षले स्पष्टीकरण सोधेपछि राजीनामा दिएका थिए ।

प्रकाशित मिति: सोमबार, फागुन २, २०७८ १९:११