चुनावका लागि जीटुजीमार्फत गाडी खरिद गर्ने गृहकार्यमा प्रहरी, १४ अर्ब बजेट आवश्यक

चुनावका लागि जीटुजीमार्फत गाडी खरिद गर्ने गृहकार्यमा प्रहरी, १४ अर्ब बजेट आवश्यक

A+ A A-

आगामी ३० वैशाखमा हुने स्थानीय चुनावका लागि प्रहरीले नयाँ गाडी खरिद गर्ने तयारी गरेकाे छ ।प्रहरीलाई जनशक्ति, सवारीसाधन र सञ्चार उपकरणको समेत अभाव छ ।

जनशक्तिका लागि करिब १ लाख म्यादी प्रहरी भर्ना गर्न लागेको प्रहरीले गाडी भने नयाँ खरिद गर्ने तयारी थालेको छ ।

सवारीसाधन नयाँ खरिद गर्ने कि भाडामा प्रयोग गर्ने भन्ने दुवै विकल्पमा छलफल गरेको प्रहरी प्रधान कार्यालयले केही सवारीसाधन भने नयाँ खरिद गर्नुपर्ने प्रस्ताव गृह मन्त्रालयलाई पठाएकाे छ ।

‘हामीलाई देशभर करिब १ हजार ५ सयवटा गाडीको अभाव छ । चुनावको समयमा गाडी अनिवार्य नै चाहिन्छ । हामीले प्रत्येक स्थानीय तहका लागि एउटा नयाँ गाडी खरिद गर्ने भनेर ७ सय ५३ वटा नयाँ गाडी खरिद गर्नुपर्ने प्रस्ताव गृह मन्त्रालयसँग राखेका छौँ । त्यसमा गृहले के गर्छ,’ प्रहरी प्रधान कार्यालयका एक अधिकारीले भने ।

चुनावका लागि खरिद गर्न लागिएका नयाँ गाडी किन्न सार्वजनिक खरिद प्रक्रियाबाट झन्झटिलो र समय लाग्ने भएकाले सरकारको पहलमा (जीटुजी) मार्फत सवारीसाधन खरिद हुने प्रहरी प्रधान कार्यालयले जनाएको छ ।

केन्द्रीय प्रहरी प्रवक्ता एसएसपी विष्णु केसीले भने अझै सवारी खरिद गर्ने कि भाडामै प्रयोग गर्ने भन्नेबारेमा टुङ्गो लागिनसकेको बताए । ‘हामीसँग स्थानीय चुनावका लागि जनशक्तिदेखि साधनस्रोतको अभाव नै छ । तर, कसरी व्यवस्थापन गर्ने भन्ने टुङ्गो अझै लागेको छैन । हामी तयारी र छलफल गर्दैछौँ,’ एसएसपी केसीले भने ।

गृह मन्त्रालयका प्रवक्ता सहसचिव फणिन्द्रमणि पोखरेलले पनि प्रहरीका लागि सवारीसाधन नयाँ खरिद गर्ने वा भाडामा लिने भन्ने टुङ्गो लागिनसकेको बताए । ‘हामीले दुवै विकल्पमा छलफल गर्दैछौँ, टुङ्गो लागेको छैन । केही दिनमा यसलाई टुङ्याउँछौँ,’ पोखरेलले भने ।

चुनावका लागि प्रहरी प्रधान कार्यालय र सशस्त्र प्रहरी बलले १७ अर्ब ६० करोड ५५ लाख बजेट आवश्यक रहेको जनाएका छन् । १२ अर्ब १४ करोड ८८ लाख चालु र ५ अर्ब ४५ करोड ६७ लाख पुँजीगत खर्च आवश्यक रहेको उनीहरूकाे भनाइ छ । यसमध्ये प्रहरीलाई मात्र १४ अर्ब रकम आवश्यक रहेको गृह मन्त्रायलये जनाएको छ ।

स्थानीय तहको चुनाव नजिकिँदै गर्दा प्रहरी, सशस्त्रबाहेक नेपाली सेना र राष्ट्रिय अनुसन्धान विभाग पनि चुनावको तयारीमा लागेका छन् । चारवटै सुरक्षा निकायले चुनावमा आवश्यक सुरक्षाकर्मी र अन्य स्रोतसाधनको विश्लेषण गर्दै आन्तरिक तयारी थालेका छन् । चुनावमा मतदान केन्द्र र मतपेटिका सुरक्षाको विश्लेषण चारवटै सुरक्षा निकायले गरेका छन् ।

३० वैशाखमा देशभर स्थानीय चुनाव एकै पटक हुने भएकाले जनशक्तिदेखि स्रोतसाधन धेरै आवश्यक पर्ने सुरक्षा संगठनहरूका विश्लेषण छन् ।

यसअघि मतपेटिकाको घेरामा नेपाल प्रहरी र मतदाताको लाइनमा प्रहरी तथा उनीहरूको खटनपटनमा म्यादी परिचालन गर्ने गरिएको थियाे ।

राष्ट्रिय अनुसन्धान विभागका कर्मचारीलाई मतदान केन्द्रमा निगरानीका लागि खटाउने गरिन्छ । बाहिरी सुरक्षाका लागि सशस्त्र प्रहरी बल र नेपाली सेनाको टोली परिचालन हुने गरेको छ ।