स्थानीय चुनावको व्यवस्थापनमा जुट्यो प्रहरी, एआईजी थापाको कमाण्डमा तयार हुँदैछ सुरक्षा योजना

स्थानीय चुनावको व्यवस्थापनमा जुट्यो प्रहरी, एआईजी थापाको कमाण्डमा तयार हुँदैछ सुरक्षा योजना

A+ A A-

आगामी वैशाख ३० मा हुने स्थानीय चुनावका लागि चारवटै सुरक्षा निकायले आन्तरिक तयारी थालेका छन् । प्रहरी प्रधान कार्यालयले स्थानीय तहको चुनावमा चाहिने प्रहरी जनशक्ति र सुरक्षा चुनौतीबारे विश्लेषण गर्दै आवश्यक तयारी सुरु गरेको प्रहरी प्रवक्ता एवं एसएसपी विष्णु केसीले जानकारी दिए ।

त्यस्तै नेपाली सेना, सशस्त्र प्रहरी बल र राष्ट्रिय अनुसन्धान विभागले पनि चुनावमा खटिने सुरक्षाकर्मी, आवश्यक अन्य स्रोतसाधनको विश्लेषण गर्दै आन्तरिक तयारी थालेको बताएका छन् । चुनावमा मतदान केन्द्र र मतपेटिकाको सुरक्षाको विश्लेषण चारवटै सुरक्षा निकायले गर्न सुरु गरेका छन् । सुरक्षा निकायको विश्लेषणका आधारमा सरकारले आवश्यक जनशक्तिका लागि म्यादी प्रहरी भर्ना गर्नेछ ।

प्रहरीको प्रारम्भिक विश्लेषण अनुसार चुनावमा प्रहरी र सशस्त्र प्रहरी, नेपाली सेना र राष्ट्रिय अनुसन्धान विभागका कर्मचारीबाहेक करिब एक लाख म्यादी प्रहरी भर्ना गर्नुपर्ने आवश्यकता देखिएको प्रहरी प्रवक्ता एसएसपी केसीले बताए ।

‘एकै चरणमा स्थानीय चुनाव हुने भएकाले जनशक्ति अघिल्लो पटकभन्दा बढी आवश्यक पर्छ । त्यसैले म्यादी प्रहरीमात्रै करिब १ लाख भर्ना गर्नुपर्ने देखिन्छ,’ केसीले भने । म्यादी प्रहरीको तलब, रासनभत्ता लुगाको व्यवस्थापन गर्न ५ अर्ब रुपैयाँभन्दा बढी खर्च हुने अनुमान प्रहरीको छ । जनशक्तिबाहेक प्रहरीलाई सवारीसाधन, सञ्चार उपकरणको समेत अभाव छ ।

तर, सवारीसाधनका हकमा भने सार्वजनिक खरिद प्रक्रियाबाट खरिद गर्दा ढिलो हुने भएकाले चुनाव अवधिभरलाई प्रयोग गर्न भाडा र अनुदान सहयोगमा ल्याउन अनुरोध गरिने एसएसपी केसीले बताए । चुनावमा मतपेटिकादेखि निर्वाचन केन्द्रको सुरक्षाको पहिलो घेरामा प्रहरी रहने भएकाले प्रहरीलाई बढी सुरक्षाकर्मी र सवारीसाधनको आवश्यवता पर्छ । त्यसैले म्यादी प्रहरी भर्नाको सबै प्रक्रिया प्रहरी प्रधान कार्यालयले नै गर्ने गर्छ ।

चुनावी सुरक्षा व्यवस्थापनका लागि प्रहरी प्रधान कार्यालयको कार्य विभाग प्रमुख (एआईजी) सहकुल बहादुर थापाले गरिरहेका छन् । चुनावमा आवश्यक जनशक्ति परिचालनदेखि सुरक्षा व्यवस्थापनको जिम्मा एआईजी थापाले गर्ने एसएसपी केसीले बताए । प्रहरीमा कार्य विभाग प्रमुखको काम परिचालनदेखि व्यवस्थापन गर्ने हुँदा एआईजी थापाले त्यसको जिम्मेवारी लिने केसीले बताए ।

प्रहरीबाहेक मतदानस्थलको बाहिरी घेरामा आवश्यकताअनुसार सशस्त्र प्रहरी र नेपाली सेना खटिने गरेको छ । यसअघि २०७४ को स्थानीय चुनावमा ७५ हजार म्यादी प्रहरी भर्ना गरिएको थियो ।

नेपाल प्रहरीमा हाल ७९ हजार जनशक्ति छ । त्यस्तै नेपाली सेना ९७ हजार, सशस्त्र प्रहरीमा ३४ हजार र राष्ट्रिय अनुसन्धान विभागमा ३ हजार जनशक्ति छ । चारवटै सुरक्षा निकायले जनशक्तिको ८० प्रतिशत स्थानीय चुनावमा परिचालन गर्ने जनाएका छन् ।

स्थानीय चुनावका लागि केन्द्रीय सुरक्षा समिति बैठकले पूर्वसुरक्षाकर्मी, विदेशस्थित सुरक्षा निकायबाट अवकाशप्राप्त व्यक्ति तथा निजी सुरक्षा कम्पनीमा कार्यरत अनुभवी जनशक्तिलाई प्राथमिकतामा राखेर म्यादी भर्ना छनोटसम्बन्धी कार्यविधि बनाउन प्रहरी प्रधान कार्यालयलाई निर्देशन दिएको छ ।

मतपेटिकाको घेरामा नेपाल प्रहरी र मतदाताको लाइनमा प्रहरी तथा उनीहरूको खटनपटनमा म्यादी परिचालन गर्ने गरिएको छ । राष्ट्रिय अनुसन्धान विभागका कर्मचारीलाई मतदान केन्द्रमा निगरानीका लागि खटाउने गरिन्छ । चुनावको मिति घोषणा हुनुअघि नै १९ माघमा गृहमन्त्री बालकृष्ण खाँणको अध्यक्षतामा बसेको केन्द्रीय सुरक्षा समितिको बैठकले चारवटै सुरक्षा निकायलाई निर्वाचन सुरक्षा र बन्दोबस्तीसम्बन्धी विस्तृत कार्ययोजना पेस गर्न निर्देशन दिएका थिए ।

प्रकाशित मिति: बुधबार, माघ २६, २०७८ १४:२४